اجـــابات الشــاب العـــازب

كل شوية واحد يسألك مش هتتجوز بقي ؟ مش هتتم نصف دينك؟؟ هتعيش وحيد ؟؟
انا قولت اجمع كل الجمل دي واللي هي مردود عليها بامثلة ونماذج لاني بكره السؤال ده جدا
وكأن فعلا الزواج فرض الحياة مش سنة الحياة !

وكأن اللي مش بيتجوز ده يا عيني هيفوته الكتير مع ان اي متجوز بيقولك مش هيفوتك اي حاجة متقلقش..الا لو بتتكلم عن الملل !

ولو سألت اي متجوز ايه اللي العن من الجواز؟؟ هيقولك .المتجوزين طبعا ..

وهنبدأ بكل الالحاحات الخاصة بالزواج اللي الناس بتزن علي ودانك بيها وهنشوف اجابات شاب عازب :



1- انت بجد مش هتتجوز ؟

الاجابة: اه مش هتجوز ..انا عايش عازب اللهم احفظها نعمة وامنعها من الزوال يارب وده دعاء كل شاب عازب اكيد..



2- طيب ازاي هتشغل حياتك ؟

الاجابة: لو انت هتتجوز عشان تشغل حياتك يبقي بتضحك علي نفسك لان معني كده ان حياتك اصلا فاضية ومش الجواز اللي هيملاها الا بمشاغل روتينية وليست بطولية يعني كل الناس بتعمل كده ايه الجديد ! واللي بيتجوز بس عشان يملي حياته يبقي ميتجوزش احسن لان الحياة مليانة حاجات كتير ممكن تعملها بالعكس الجواز بيعطل معظم اللي عايز تحققه..


3- وهتعيش وحيد ؟

الاجابة: الوحدة ممكن تبقي موجودة اكتر بعد الجواز لان الوحدة اختيار ..وناس كتيرة متجوزين وعايشين كانهم لوحدهم وده موجود في بيوت كتير جدا


4- مش هتكمل نص دينك؟

الاجابة: يا عم الجواز مش فرض في الاسلام يبقي ازاي نص دين دي كلمة اتقالت والناس فهماها غلط وهاقولك ان ابن تيمية نفسه متجوزش وناس من ائمة المسلمين وناس من كبار العالم ده وقائدينه
متجوزوش خالص زي إسحاق نيوتن و بيتهوفين وفولتير و شوبنهاور وعباس محمود العقاد وغيرهم كتييييييييييييير
يعني الناس دي مماتش ولا حاجة ولا ابن تيمية هيخش النار عشان متجوزش لو هو نص الدين


5-طيب والحب ؟

الاجابة: الحب ده هو الحياة نفسها مش سنة الحياة وايه علاقة الحب بالجواز ما ناس كتير حبت ومتجوزتش وبعدين انا مريت بالتجربة دي ولسه عايش علي ذكرياتها بس في الحب قلبين بيشهدوا وفي الزواج بس
شاهدين بيشهدوا ..


6- طيب و الرغبة ؟

الاجابة: انا لو هتجوز هيكون مش عشان السبب ده ولكن اللي هيتجوز لازم يجوز كل حاجة فيه تجوز عقلك لعقلها وتجوز قلبك لقلبها مش مجرد ليلة دخلة كل فترة..


7- مش ممكن تندم ؟

الاجابة:زي ما قال انيس منصور ان العازب ممكن يندم مرة بس المتجوز بيندم الف مرة..والندم بيكون انك ما ارتبطتش بالبنت اللي بتحبها مش انك ما ارتبطتش والسلام وجواز الصالونات..

8- هتموت وحيد ؟

الاجابة: ياااا ناس كتير جداااا اتجوزوا وماتوا لوحدهم لسبب او لاخر سواء الشريك مات قبلهم او مخلفوش اولاد او ميت سبب تاني متضمنش ان الجواز ممكن يخليك متموتش وحيد
مافيش ضامن لحياتك او وحدتك ..

9- والسعادة؟؟

الاجابة: بجد لو كانت السعادة في الجواز معني كده ان الناس كلها ماشية سعيدة وده مش حقيقي لان نسبة اللي عايزين يعيشوا سينجل اقل من المتجوزين ومافيش علاقة للسعادة بالزواج ولكن
بالحب بس ولو انت مش سعيد الجواز مش هيخليك سعيد حتي لو اتجوزت اربعة..


10- بتفكر في نفسك بس

الاجابة: ما هو الجواز برضه في شئ من الانانية والتفكير في نفسك يعني هو مش تضحية هو اسعاد لنفسك لو حب واسعاد لرغباتك لو مجرد جواز عادي يعني الانانية واضحة في كل تفاصيل الجواز
مافيش حد بيتجوز عشان يسعد الطرف الاخر ولكن بتكون عشانك انت..

11- بتهرب من تحمل المسئولية ؟

الاجابة: ومين منا مش عايز يهرب من كده ..كل واحد متجوز تسمع منه اااه لو يرجع زمان واعيش وحيد ده الجواز ده كله مشاكل ومسئوليات..
ولكن العازب برضه بيتحمل مسئولية ممكن اهله او نفسه هي مسئولية النفس دي شوية ؟


12- مش بتستغرب اما تلاقي كل اللي حواليك متجوزين وانت لأ ؟

الاجابة: بالعكس بحس اني مميز..كله مشي مع سكة الحياة لكن انا اخترت اني اعيش عشان افهمها وده مش محتاج غير الوحدة ..


13- مش عايز حد تخاف عليه ويخاف عليك ؟

الاجابة: ايه يا عم نظام الخوف ده كله طيب ما العازب عايش في امان بقي ههههههه ليه القلق ده ..اكيد كلنا بنحس اننا محتاجين الاحساس ده
بس مش الجواز هو مصدر الطمأنينة وراحة البال في الحياة وأسأل الوف قبلك..وكلمات "استقرار" والحاجات الشائعة دي دايما بتتقال للبنت اللي بترفض العرسان
اهلها بيحاولوا يفهموها الكذبة البيضا الكبيرة في الحياة بان الاستقرار جاي وبعد تلاتين سنة بتقعد قدام قبر ابوها وتسال "كان قصدك ايه بقي بكلمة استقرار ؟ "



14- طيب متاخد وقتك ويمكن تلاقي بنت الحلال ؟

الاجابة: ده كلام كويس وفعلا في رواية 80 يوم حول الارض لجولز فيرن كان اتسأل بعد ما رجع من الرحلة "هل كانت الرحلة شاقة" قالهم "لو كانت 80 سنة حتي ورجعت بزوجة زي دي
فهي وقت قصير " وفعلا اهم عامل هو الوقت لانه ممكن تختار في لحظة وتندم 50 سنة ..


15- يعني في النهاية مش هتتجوز ؟

الاجابة: نفس احتمال ان ييجي وزير مش فاسد في مصر..لا تعليق