Thursday, May 5, 2011

عالم كومنتات..كومنتات ياناس







الكومنت بيدل علي صاحبه ؟؟ لا مش شرط..بس ساعات يقابلك كومنتات مسخرة وانت بتقلب في صفحة او علي الفيس بوك او حتي في اجابات جوجل واسئلتهم الغريبة
مثلا مرة في موقع رياضي تحت خبر معين مجموعة من الشباب اشتغلوا واحد وكانت جامدة جدا والظاهر الواحد ده اول مرة يدخل الانترنت عموما

كان الخبر عن ابو تريكة فالولد كتب تحت الخبر انه بيحب ابو تريكة وكده فمجموعة شباب اشتغلته باسماء مستعارة اي كلام وهو فاكر انها بجد لانهم حسوا انه جديد في النت وفعلا الواد افتكر انهم هم نجوم الكورة بجد وشوف الحوار كان ماشي ازاي وشوف الاسامي اللي هم دخلوا بيها ..دخلوا باسامي "ابو تريكة" وواحد سمي نفسه "حسن شحاتة" وغيره :


محمود : "يا سلام عليك يا كابتن ابو تريكة انا بعشقك واللهي نفسي اقابلك"
أبو تريكة: انا ابو تريكة يا حبيبي انا فرحان بيك يا محمود وياريت نتقابل
محمود : كابتن ابو تريكة انا بحب لعبك جدا
حسن شحاتة: قوم يا ابو تريكة عندك تدريب الصبح متقعدش ع النت
محمود: كابتن حسن كمان ؟؟ ربنا يخليكوا لينا يارب انا مش مصدق
احمد حسن: محمود شكله بيحبكوا قوي يا جماعة
محمود: واحمد حسن ...انا فرحان قوي باللمة دي
كابتن محمود بكر: ايه يا جماعة اللمة دي ومين محمود ده ؟
محمود: ازيك يا كابتن انا بحب تعليقك جدا
المرحوم الكابتن لطيف: ازيك يا محمود يا بني
محمود: ايه ده ؟؟؟كابتن لطيف؟؟ المرحوم؟؟ بتشتغلونا يا ولاد ال......

وقلبت التعليقات شتايم طبعا هههههه لما اكتشف الحكاية اما دخله المرحوم نفسه من الترب تقريبا عشان يعلق علي النت ههههه







واحد بقي في منتدي بيسأل سؤال مهم في احدي الموضوعات : "يا جماعة ازاي احلق لنفسي ؟"

الاجابات :


الاول : احلق لنفسك خالص من هنا
التاني: نفض لنفسك احسن يا برنس
التالت: انت عبيط ياد ؟؟
الرابع: هتحلق اي منطقة بالظبط
الخامس: وليه تحلق لنفسك ده واجب علينا واللهي انا ماشي
السادس: عليا النعمة الواحد قرف من الانترنت واسئلته الغبية
السابع: شعر ولا دقن ؟







مرة واحد سال بقي سؤال : هو مين رؤساء مصر علي مر التاريخ ؟

الاجابات من الناس :

الاول : اه ده علي اساس انك من الدنمارك مش مصري يعني
التاني:ابوك كان منهم ياد
التالت: انا اعرف معلمين امبابة بس
الرابع: انت في ثانوي يا بابا ؟
الخامس: لا مكانش فيه رؤساء دي اشاعة






في المنتديات بقي ساعات واحد يرفع لينك او فيديو مثلا فيه نسبة من الاباحية وتلاقي ناس تقوله "بارك الله فيك"

فعلا واحد رفع فيلم خليع قوي وواحد علقله تحت "بارك الله فيك وجعله في ميزان حسناتك"

التعليقات بقي اللي جت ع الكلمة دي :

الاول: ميزان حسناته ؟؟ ميزان حسناته فيه سكس ؟؟
التاني: عالم حافظة مش فاهمة كاتب التعليق وخلاص
التالت: مشكور اخي
الرابع: اهو واحد من نوعية مشكور دخل اهو
الخامس: لو كل واحد حط لينك سكس هنقوله بارك الله فيك يبقي هيبقي راجل بركة
السادس: يا جماعة دي افلام ثقافية برضه








واحد دخل مرة سال سؤال : فين الحب ؟ فين الحب فين انا مش لاقيه في الدنيا دي

التعليقات:


الاول: عند امك
التاني: اقولك فين ولا تزعلش ؟
التالت: عندها هناك هتلاقيه
الرابع: يلا يا سيس
الخامس: حب ايه ..حب اوووه..حب اااه







واحد تاني دخل يسأل "ايه اجمد نوع جيل يا جماعة عشان شعري مش ماشي قوي مع الكريمات وانا بحتاج اظبطه يوميا بالساعات"

التعليقات :

الاول : بتظبط شعرك بالساعات؟؟ تلاقيك بتظبطه وبعدين تلاقي نفسك اتاخرت تقعد في البيت
التاني: لعن الله المتشبهين بالنساء
التالت: حضرتك راجل ولا نص نص ؟
الرابع: تفاهتك بير مالوش قرار يا كابتن
الخامس: ايه يا جماعة الراجل بيسأل سؤال شرعي
السادس: سؤال شرعي ؟؟ في حكم الجيل ولا ايه ؟؟ هههه







موقع طبي واحد بيسأل فيه "يا دكتور هو انا لو بطلت العادة السرية هاستفيد يعني ؟ "

التعليقات :

الاول : انت بتسأل مين ده الدكتور نفسه تلاقيه بيعمل كده
التاني: هتستفيد اه ..هتكسب "...." هدية
التالت: يعني ايه عادة سرية ؟
الرابع: يعني ايه؟؟ انت عندك كام سنة يا حبيبي؟ اخرج من الصفحة دي للكبار فقط
الخامس: انا عن نفسي مش هابطل هههه







سؤال في منتدي حريمي "ياتري بتحلقي شعر جوزك زي ما انا بعمل ولا هو بيروح للحلاق ؟ "

الاجابات من النساء :

الاولي: لا انا بحلق لجوزي كله مش لشعره بس
التاني: لا انا بقرف
التالتة: بتقرفي؟؟ امال بتنامي معاه ازاي ؟
الرابعة: ايه قلة الادب دي ؟ايه بتنامي معاه دي؟
الخامسة: ايه قلة الادب فيها ؟ امال هم متجوزين وبيناموا في الصالة ؟
السادسة: انا عايزة اتطلق اصلا
السابعة: لا حول الله يارب ليه كده ؟





ودايما الصراعات الكبري بقي في المواقع الرياضية وخصوصا ايام ماتشات القمة :

الاول : هنحط عليكوا
التاني: الي مزبلة التاريخ يا نادي العملاء
التالت: الدوري لنا وموتوا بغيظكم

وتحس انها معركة فاصلة في حياة الامم من خلال الكلمات الرنانة اللي بتتقال في المواقع الرياضية
ومن كتر الصراعات تلاقي دايما يطلعوا علي نفسهم اسامي
الاهلاوي يقول علي الزملكاوية : "الزبلكاوية"
والزملكاوي يقول " الجهلاوية"






وفيه نوع بقي بتاع القلق الدائم ع المنتديات اللي تسالهم اي سؤال يعملولك فيلم هندي :

واحد يكتب "انا النت عندي بطئ النهاردة شوية ايه السبب مع انه كان حلو الصبح"

التعليقات :

الاول: يا ساتر ده تلاقي جهازك عايز يتفرمط
التاني: اكيد جهازك قديم وعايز يتغير
التالت: تلاقي الفيروسات بالهبل عليه
الرابع: يا ساتر ده انتوا وش فقر..سيبك منهم ده مجرد بطئ من الشركة ولا حاجة



وفي الناس المبالغة بقي ودول كتير اللي دايما يكتبوا "المشهد الذي ابهر الملايين " او "المشهد الذي مزق قلوب العالم "

واحد كاتب "اروع مشهد في التاريخ المشهد الذي ابكي العالم اجمع"

التعليقات:

الاول: ده ابكاك انت اساسا ؟؟ هو مشهد كوميدي ولا المفروض انه رومانسي؟
التاني: تلاقيه ابكاه هو وعيلته بس فقال ملايين وبتاع
التالت: اتقوا الله بقي يا بشر وكفاية فشر جتكوا نيلة مليتوا البلد
الرابع: الحق علي يوتيوب اللي سمح لامثالك يحط مشاهد عليه
الخامس: احب اقولك "اتفوووه " عليك وعلي اللي مسكك ماوس وكي بورد





دي كانت بعض التعليقات من واقع مشاهد انترنتية عجيبة وغريبة وبتحصل كي يوم في وسط التعليقات وبنشوفها كل يوم.






No comments: