Tuesday, May 31, 2011

انما للنت حدود يا حبيبي






عملوا لكل حاجة قواعد واخلاقيات وبتاع وسابوا الانترنت كده يعني ماشي حافي !!
لأ احنا لازم نحط قواعد واتيكيت لاستخداما لانترنت والفيس بوك عشان العملية كده بقت سداح مداح قوي يعني ولازم وقفة .




وصايا لاستخدام الانترنت والفيس بوك :


أولا : وانت بتبحث علي الانترنت ياريت تبحث عن كلام منطقي يعني متحاولش تبحث عن كلمات غريبة عشان هيطلعلك نتايج غريبة شوية يعني واحد مثلا يدخل يبحث عن كلمة "مؤخرتي"
يقوله الجوجل "لم يفلح بحثك عن مؤخرتي" اظن جملة محرجة قوي ..!! يعني الجوجل بيقولك مانتاش شايفها لو عملت ايه ده انا الجوجل ياد !!
ومثلا متعملش زي لاني كنت ببحث مرة علي جملة في اغنية قديمة بدور عليها وجملة في الاغنية بتقول "عطية يحب القلقاس" طبعا ده كان في فيلم اسمه "تحت الصفر" ومش لاقي الاغنية ابدا
وكنت في سايبر يعني اللي ييجي يقعد ورايا علطول ويدور هيلاقي اخر حاجة تم البحث عنها الجملة دي ويكون مذهول شوية من اللي الناس بتعمله !!



ثانيا : لو غاوي منتديات وبتاع يبقي جهز ملف وورد كده صغير حط فيه الردود عشان الناس الرخمة الللي تقولك "مش هتشوف الموضوع الا اما ترد" ردت المية في زورك يا اخي طب ما نيش هارد وهاشوف اي منتدي تاني تلاقي المنتدي التاني برضه بيقولك لازم ترد يا برنس يبقي تضطر ترد بقي وتجهزر الردود المتداولة في عالم المنتديات يعني تكتب مثلا "مشكور اخوي الغالي" لو منتدي خليجي او "شكرا يا برنس الليالي" لو منتدي مصري او "جزاكم الله خيرا" لو في منتدي اسلامي او كده يعني !!




ثالثا : متدخلش ابدا علي الفديوهات اللي هي مكتوب عليها "فتاة ابكت الملايين" او "البطة التي ابهرت العالم" لانها بتكون حاجات فاكسة والراجل بيحاول يعملها سوق يعني ..بطة ايه اللي ابهرت العالم يا عم الحاج ..ليه بتتكلم لغات ؟؟؟ ولا بتشرب ريد بول وطلعلها جوانح زيادة ؟؟؟


رابعا : الفديوهات اللي هي من نوعية "ممنوع لاصحاب القلوب الضعيفة" دايما خش رخم علي صاحبها وقوله انا من اصحاب القلوب الضعيفة بس هاشوف الفيديو ومجهز الدوا جنبي والجلوكوز كمان عشان لو الموضوع زاد قوي عن حده ..وهي اصلا بتكون فيديوهات ولا فيها تخويف ولا نيلة برضه مجرد عنوان مثير والفيديو اصلا تلاقيه كوميدي او اغنية والراجل بيستهبل.



خامسا : في بقي فيديوهات ممكن تلاقي مكتوب عليها "مشهد مثير للفنانة..." او "الفنانة...بالبكيني" تيجي تفتح المشهد يطلعلك حاجة دينية وتلاقي التعليقات تحت ايه بقي "جزاك الله خيرا يا اخي"
يعني اللي رافع الفيديو عامل كده قولنا ماشي انما اللي معلق تحت ده بيستهبل ؟؟ ما هو كان داخل يشوف البكيني واتفاجأ ..اكتبله علطول في الرد "ايه تبت يعني حالا بروح اهلك ؟؟؟"


سادسا : اما تخش ع الفيس بوك وتكون بتكلم حد وفجأة تقوله انا ماشي بقي او رايح في مكان يعني متخشش علي فيديو او لينك تاني تعلق تحته عشان كده بتتكشف وممكن يرجعلك يقولك "ممشيتش يعني؟؟" ويعرف انك بتحلقله ويبقي منظرك مش تمام خصوصا لو بينكم فريندز مشتركة..فاول ما تقول انا ماشي يبقي امشي فعلا او خش علي اي حاجة بس متعلقش عند حد الا بعدها بفترة منعا للاحراج !



سابعا : اذا لاحظت انخفاض ملحوظ في اعداد الكومنتات واللايكات فدي ظاهرة طبيعية في اي وول اصلها مواسم كده ! يعني ساعات تلاقي زحمة قوي علي وولك وساعات ولا كومنت ويسيبوك طفلة الحشرة مهما رفعت من فيديوز او اي حاجة تشيرها عموما فحاول تقلل اللينكات لتحظي بالكومنتات ..الافراط في اي حاجة وحش حتي لو كان مجرد لينك !
ومن العيب قوي انك تعمل لايك لنفسك لان كده منظرك زي حبل الغسيل مالكش لازمة !!
اللي يعمل لايك لنفسه زي اللي يحط دبلة في ايده وهو مش خاطب !


ثامنا : ممكن تخش في جروب مش تمام وتقول لواحد علي فكرة انا شوفتك في جروب كذا يا قليل الادب تحت الصورة الفلانية يبقي انت كده اتكشفت يا برنس لان اول سؤال "وانت ايه اللي وداك هناك ؟؟؟؟"



تاسعا : متحاولش تقعد كتير في وول غيرك لان الزيارة اما بتقل بتقلب بضلمة يعني يا بخت من زار وخفف.
يعني كل فترة انما مش طول النهار اعلانات علي وول غيرك.."يا باني في وول غيرك يا مربي في غير ولدك" !
ولما تلاقي مجموعة اصحاب اتلموا علي صاحب الوول وانت متعرفهمش متتحشرش في وسطهم زي الفاسوخة انت متعرفهمش ولا هم يعرفوك يبقي روح لوول اصحابك احسن !



عاشرا : متسألش حد ابدا "انت ليه مش بتيجي علي وولي" لان دي حرية شخصية لان منظرك بيبقي صعب وكأنك المفروض تبعت شكوتك لفقرة اسالوا رجاء !
عادي ان اي حد ميجيش علي وول حد دي مسالة تعود مش مهمة يعني ومش معني ان واحد مش علي وول واحد انه مخاصمه مثلا ولكن هو اتعود علي كده واتعود علي صفحات معينة !



حادي عشر : الاخوة اللي بيتصوروا ببدلة كاملة ع الفيس بوك ده مش خط "الخاطبة" او ده مش جواز سفر سعادتك يعني !
لابس بدلة كاملة عشان تتصور للفيس بوك ؟؟ يا راجل مزمز ميراندا وفكها شوية !!


ثاني عشر : متشتغلش نفسك ابدا وتملي صفحتك اصدقاء من الفنانين لانك مالكش علاقة باي حد فيهم هم بيقبلوك لانهم بيقبلوا الكل وخلاص واهي زيطة



ثالث عشر : حاول توازن الوول بتاعك يعني مش كله سياسة ولا كله هنتريش يعني ولا تبقي فهمي هويدي ولا تبقي الشاب مامي


رابع عشر : لو بتعمل شات حاول متستعملش جملة "ممكن نتعرف؟" لانها اتهرست في ميت فيلم عربي !!!


خامس عشر : لو واحد قالك "اوعي تتفرج علي الفيديو ده" متتفرجش عليه فعلا لان هو قصده خش اتفرج عليه فاخنق عليه زي ما هو خنق عليك


سادس عشر : متحاولش تعمل شير لحاجة علمانية او ليبرالية في وول اخوانجي ! او حاجة للزمالك في وول اهلاوي ..او حاجة لعمرو دياب في وول تمراوي ! او العكس برضه لانها بتقلب بما لا يحمد عقباه وحروب كومنتات ! يعني تقدر تقول "الكيف مناولة والشير مناولة"


سابع عشر : متحاولش تزود قوي جرعة الشير اليومي لان "الاوفر دوز" بتقلب عليك ب "هايد" و "ديليت" في الاخر وانت حر بقي في وولك .


ثامن عشر : وانت فاتح الشات متكلمش اكتر من اربعة في وقت واحد لانهم بيعرفوا وبتبان انك مش مركز معاهم والافضل تكلم واحد واحد الدنيا مش هتطير يعني .


تاسع عشر : لو بتعمل شات بالصوت اتاكد اما تخلص انك قفلت البرنامج عشان متسيبش المايك جنب الكمبيوتر وتبقي عامل زي الشيخ حسني في فيلم "الكيت كات" وتقول فضايح اون لاين !


عشرون : حاول وانت ع النت دايما تكون في وضع محدش يبص عليك من ورا لان ساعات بتكون قاعد عادي جدا واول محد يبص علي شاشتك من ورا يكون حظك ان في اعلان طلع "بوب اب" مرة واحدة مش سليم فيهموك غلط ياولداه .


حادي وعشرون: لو بتقعد علي البورصة او كده حاول تكون جنبك عضاضة او مساكة بتاعة تمارين الايد عشان تهدي نفسك شوية او خمسين كيلو لبان زي مدربين الكورة .


ثاني وعشرون : اعمل مجموعة اما تيجي تقسم الاصدقاء وسميها "عالم ولاد ..." عشان تبقي عارف انت بتعمل شات مع مين !




وسهرة سعيدة ع الفيس بوك واوعي ايدك وزرار "الهايد" .

2 comments:

Unknown said...

مفيش صفحة على الفيس بوك

Unknown said...

مفيش صفحة على الفيس بوك