Sunday, May 1, 2011

خطاب مبارك الشديد في عيد العمال الجديد






حسني مبارك في المستشفي :


حسني : النهاردة عيد العمال هو انا مش هاخطب ولا ايه ؟

الدكتور : يا عم هي عافية انت معدتش رئيس جمهورية

حسني : اخررررررررررس

دكتور تاني: يا عم خده علي قد عقله

الدكتور: طيب خلاص عايز ايه يا سعادة الريس

حسني: انا عايز اخطب

الدكتور: وتحبها تكون مصرية ولا لبنانية يا ريس

حسني: انت هتستظرف ؟

الدكتور التاني: يا عم هاتلوا كوز خليه يخطب

حسني: كوز ؟؟ دي اخرتي؟؟ اخطب في كوز؟؟ شايفني مجنون وبريالة قدامك؟ ولا بجري ورا عربية الرش؟؟

الدكتور: اه واللهي يا ريس انا بستغرب قوي علي موضوع عربية الرش ده ..هو كل واحد يجري ورا عربية الرش يبقي مجنون ؟؟

الدكتور التاني: واللهي دي تعتمد علي حاجات كتير يعني عندك مثلا ...

حسني: بسسسسسسسسسس..انتوا بتتناقشوا في ايه؟؟ احترموا وجودي..انا ماليش دعوة انا عايز اخطب ..عايز اخطب ..بقي بياكلني وعايز اطرش الكلمتين

الدكتور: هو فعلا انت كنت بتطرش الكلمتين ومبتعملش منهم اي حاجة يا عم حسني عشان نكون صرحة مع بعض يعني..بس انت لو طلعت للشعب تخطب هياكلوك بسنانهم

حسني: يبقي نشوف اي حد اعلامي انقل عن طريقه خطابي يعني

الدكتور: ازاي يعني يا ريس ؟

حسني: شوفولي اعلاميين وهادي لكل واحد ورقة للي عايز اقوله لاني مش هاعرف اقوله بنفسي

الدكتور: اااااه تقصد تعمل زي بن لادن يعني وتبعت للجزيرة وكده

حسني: بن لادن ؟؟ شايفني ماسك كلاشنكوف بروح امك ؟

الدكتور: ايوه يعني هتبعت لمين ؟

حسني: كل القنوات بس ناولوني القلم عشان اكتب الكلمة

الدكتور: انت هترسم ؟ ماكلنا عارفين انك مش انت اللي بتكتب الكلمة

حسني: هرسم ؟؟ في ريس يتقاله يرسم ؟؟

الدكتور: ماشي يا عم الريس اتنيل خد القلم من هناك ع الدرج ده

حسني: اتنيل؟؟

الدكتور: بقولك ايه انا مراعي حالتك م الصبح متخلنيش اطلع تلاتة...ولا بلاش

الدكتور التاني: اهدي امال..احم..بص ياريس اكتب الكلمة وهاتها وهنوزعها علي كل الاعلاميين يقولوها باسمك يعني
حسني: طيب سيبوني اكتبها بمزاج

الدكتور: ده علي اساس انك بتكتب اغنية لحماقي

حسني: ما تحترم نفسك ياد ..انت دكتور ولا فرارجي ؟

الدكتور الثاني: سيبك منه ياريس احنا هنطلع واكتب الكلمة براحتك




واثناء اجتماع الدكاترة في الخارج :


الدكتور الاول : يا عم الراجل ده جاب اخره معايا لازم يفوق بقي من حالته دي ويعرف انه مش ريس

الدكتور الثاني : يا بني ادم احنا بنعمل كده عشان مصلحته وصحته مثل انه ريس وخلاص هو يعني بجد..اضحك عليه بكلمتين وخلاص

الدكتور: مش قادر وشه بينرفزني ويجيبلي العصبي



وفجاة :

حسني: انا خلصت ..انا خلصت

الدكتور: ايه نيجي نفتحلك الشطاف يعني ولا ايه ؟؟

حسني: اه يا واااطي..تعالي خد الكلمة اهي

الدكتور الثاني: طيب عايزنا نديها لمين

حسني: كل الاعلاميين عشان توصل للشعب كله مني



وتم توزيع الكلمة علي كل الاعلاميين ولكنها وصلت بطريقة غريبة شوية لاول مرة مش بطريقة حسني ولكن بطريقة الاعلاميين :



محمود بكر اثناء مباراة الاهلي :

"طيب جالنا دلوقتي كلمة من مبارك بيقولكوا سيداتي انساتي سادتي ..مساء الخير..

الجمهور: بالذمة حسني قال كده ؟؟

محمود بكر: شعبي الحبوب ..طبعا واحد هيسألني انا عامل ايه وكده اقوله اتطمن انا صاج سليم

الجمهور: يا عم ده بيقول الكلمة بطريقته هو بالذمة حسني قال صاج سليم ؟؟

محمود بكر : كل سنة وكل العمال في التمام ومش ممكن يا برجاوي بقولك ظبط الصورة بقالي سنة كاملة مش شايف حاجة مش ممكن

الجمهور: برجاوي مين الراجل ده اتسطل ولا ايه ؟

محمود بكر: عزيزي الفلاح عزيزتي الفلاحة ايه اخبار الزرع والقلع والفلاحة ؟وحشتوني جدا وهوببببا كورة خطيرة اي حد يلط اي حد يلط

الجمهور: تصدق انت كرهتني في عيد العمال

محمود بكر : وطبعا كل عمال مصر يكونوا في احسن حال علي الدوام ويااااه خطررررة ها ها هاي اللعيبة نازلة كانهم غية حمام

الجمهور: الله يخربيتك يا عم بكر ده انت ولا عم بخ

محمود بكر: طبعا يا شعبي انتوا اسقطتوني مع النظام بس انا جاي اقولكوا ايه النظام

الجمهور: اقفل يا عم التليفزيون ده ده الراجل مالف الكلمة هو باين





وفي المستشفي:

حسني: الله يخربيت اللي كان السبب..حد يدي الكلمة لمحمود بكر ؟؟

الدكتور: مش انت قولتلنا اديها لكل الناس

حسني: واديتوها لمين تاني..شكلكوا هتنفخوني

الدكتور هتشوف بنفسك في البرامج




وفعلا راحت الكلمة لكل المذيعين وكل واحد قالها بشكل :



مدحت شلبي : "الريس بيقولكوا..مساء الانوار يا شعبي العزيز..من وجة نظري اللي مالهاش قيمة طبعا خالص..ملهاش اي قيمة يعني انا حثالة المجتمع وطفلة الحشرة..بقولكوا كل عام وانتوا بخير
وياريت تكونوا كونتوا جمعية عمومية ولا حاجة للشعب ياخد مطالبه ويوصلها للجبلاية..لان من وجهة نظري المتواضعة الحقيرة لازم كل واحد ياخد حقه ..وانا دايما اقولكوا مش مهم ايه اللي اتقال المهم مين قال..وهنا "حيدر الدبش" باعتلي رسالة بيقولي "بطل هبل" اقوله شكرراا يا دبش "




عمرو اديب : "مساء الخير عليكوا واهلا بيكوا في حلقة جديدة وقبل ما اتحرك قيد انملة اقول مساء الخير يا مستر عزززززززت..

مستر عزت: ههههههههههههههههه مساء الخير يا عمرو هههههههههههه

عمرو اديب: بيضحك علي ايه العبيط ده ؟ احم المهم معايا النهاردة خطاب مهم جدا بيقول ايه بقي "ايها الشعب كل سنة وانتوا بخير وبتاكلوا كده حتة الدهنة الصغنونة دي من فوق الخروف كده وهي سايح فوقها المايونيز بقي وفي بقك النونو وهوببببا..كل سنة وانتوا فلة شمعة منور وحالكم دايما في الهنتريش المحلق باجنحة من العالي قوي

مستر عزت: ههههههههههههههههههههه هههههههههههههههه كفاية يا عمرو ههههههههههههههه

عمرو اديب: ايه العبيط ده يا جدعان ؟؟؟..طيب نكمل الجملة "وبقولكوا يا شعبي الحبوب القطقوط الصغنطوط عيد سعيد واديها مية تديك طراوة يعني واراهنكوا بدولار لو حد قاللي مخرج اعلان ريري بتاع زمان





مني الشاذلي : "مساء الخير اعزائي احبائي..النهاردة جالي خطاب ووجب عليا وحقكوا عليا وحق الاعلام عليا وحق الشعب عليا وحق ال..

المخرج: انجزي قرفتي امي

مني الشاذلي : احم احم..ولابد وحتما وياحبذا وياليت وي..

المخرج : اقوم اجيبلك كتاب نحو ؟؟

مني الشاذلي: ولعل الخطاب يشمل ويحتوي ويضم او يمتلئ عن بكرة ابيه او

المخرج: اقسم بالله انا ممكن اقفل الحلقة

مني الشاذلي: الخطاب يقول التالي..الاتي ..القادم..ساقول واعبر واحاول ان اقتنع معكم بكل جملة ونحاول ان نفند ونعرف دهاليز كل..

المخرج: دهاليز؟؟ طب ايه اللي جاب الكلمة دي في النص يا ست عربية فصحي ؟

مني الشاذلي: الخطاب يقول والعهدة علي الراوي..وما علي الرسول الا البلاغ واني لا ابرئ نفسي مما ساقول و..

المخرج: اقطع الحلقة يا ابني كتتتتتتتت




ابراهيم حجازي : سلاموا عليكوا ..جالي كلمة النهاردة ووجب عليا اني هاقولها ..فين الشاي يا ابني ؟
الريس اللي فات عارفينوا طبعا باعتلكوا كلمة كده من المستشفي وبيقول فيها "فين الشاي يا ابني ..وايه الصورة اللي ع المونيتر دي يا ابني؟ فين الاعادة يا ابني ؟
متعصبونيش متنرفزونيش بدل ما اقوم اخربهالكوا ع اللي فيها يا ابني
الريس بيقول شعبي المناضل الابي الايه ؟؟؟ اقري الكلمة دي كده مكتوب ايه ؟؟ الحنطور ؟؟

المخرج: مكتوب الغيييور

ابراهيم حجازي: ايه الخط المعفن ده ؟؟ دي حاجة تفور الدم

بتاع الشاي: الشااااااااااااااااااااااي

وفجأة يقع الشاي كله فوق البدلة

ابراهيم حجازي: ااااه كملت ده انا كنت مستني اللحظة دي يا ولاد م..ال... تعالوا بقي
بووووم طرااااااااااخ بووووووووووووم

وينقلب الاستوديو الي مجزرة مع بتاع الشاي





وفي المستشفي :

حسني: يا ميلة بختك يا حسني..يا ميلة بختك يا حسني

الدكتور: يا عم احنا قاعدين نبيع خضار ؟

حسني: بص انا مخنوق من امك اساسا ..هم دول الاعلاميين اللي باعتلهم الكلمة ؟؟ ده الست قعدت في المقدمة ساعة ومقالتش حاجة

الدكتور: وانا مالي دول الاعلاميين المشهورين وبعت للباقيين كانوا في اجازة

حسني: طيب امشي من قدامي دلوقتي



وخرج الدكتور ورجع تاني لحسني:


الدكتور: انا جيبتلك الحل

حسني: قول

الدكتور: خد الكوز ده واقف في الشباك قول اللي انت عايزه

حسني: كوز ؟؟؟ برررررررررررررررة




ولم يصل خطاب عيد العالم زي كل سنة معلش بقي يا عم حسني ..!

4 comments:

Anonymous said...

بجد مدونة جامدة اخر حاجاااات

محمد الأير مروان said...

راااااااااااااااااااااااااااااااااائعه

Mohmed Mahrous said...

الناس كلها دلوقتي عرقت قيمة مبارك و نفسها تعود ﻻيامه تاني

Mohmed Mahrous said...

الناس كلها دلوقتي عرقت قيمة مبارك و نفسها تعود ﻻيامه تاني