المصري وارقامه السحرية

هو ليه كلنا كمصريين مهتمين قوي دايما بموضوع الارقام بتاعة ثروة مبارك وعائلته كلها ؟ يعني مبارك سرق وخلاص فاسد وخلاص انما ليه عايزين نعرف الرقم بالجنيه وبالقرش ؟

كل يوم تطلع الجرايد تقول رقم شكل وارقام بعيدة قوي عن بعضها والناس تقعد تحسب الموضوع من الاول وعايزة تعرف كل وزير كمان معاه كام بالظبط وبالجنيه !
ولكن المصري من زمان في كل كلامه هتلاقيه مهتم بلغة الارقام مش بس عشان ثروة مبارك وكده لا ده من زمان جدا وهو بيقول مصطلحات في حياته اليومية كلها ارقام زي ما اتكلمنا قبل كده عن مصطلحات تانية تعالوا نشوف مصطلحات الارقام المصرية اللي دايما بيستخدمها كل مصري :


الجملة الشهيرة قوي "ده انا بضرب اخماس في اسداس"
دي يعني الحيرة بعينها انه يضرب اخماس في اسداس ونفسي اعرف مين اول واحد قال الجملة العبقرية دي ؟ اكيد موظف في المعاشات ولا حاجة ولكن ايه اللي هيخليه يضرب الارقام دي اصلا ؟؟ واي حد ليه اصلا يضرب كسور في بعض عشان يتسلي ؟؟ بس هي جملة فريدة من نوعها وغريبة جدا

كمان الجملة بتاعة "ومتقولش تلت التلاتة كام" دليل علي الحزم بقي يعني متقولش حتي تلت التلاتة وبرضه جملة اغرب من اللي فاتت ومعرفش ايه علاقتها بالحزم في الموضوع بس شاع استخدامها زي العجين اللي متلخبطوش كده !
واما واحد بيغيب قوي عليك هتقوله برضه جملة بلغة الارقام "انت غبت وقولت عدولي" يعني برضه ارقام وعد ودايما العقلية المصرية رقمية قوي "ديجيتال" !!

وصل الامر لدرجة ان اما نيجي نشتم برضه بنستخدم الارقام زي مثلا "اه يا بنت ستين في سبعين" وايه يعني الشتيمة في دي ؟؟ هي الظاهر شتيمة ومكملتش اساسا !
لا والشتيمة التانية برضه "يا ابن ستين..." او الجملة بتاعة "دي حاجة ملهاش اي تلاتين لازمة اساسا" .
وحتي اما بيتكلم المصريين عن الحقوق بتاعتهم يقولك "هاديك حقك تالت ومتلت" وكمان ممكن يقول "علي داير مليم" .
وفي كمان اما ييجي الناس تتقي شر الناس الاخري بيقولوا ايه "خمسة وخميسة" في وشهم ويشاورا بايديهم كلها
وحيت العربيات الناس بتلف بيها في الشارع وتعمل "خمسات"
وفي الماتشات كلها لغة ارقام زي الكورة في "التمانيات" مثلا ومعظم مصطلحات الرياضة فيها ارقام بالطريقة دي
وكمان اما واحد يعلي قوي او يحصله موقف سئ جدا بيتقال انه كان "في سابع سما ونزل سابع ارض"
وكمان الواحد اما ييجي يشهد علي حاجة انها حلوة بيقول "انا ابصم بالعشرة" علي كده وكمان ممكن يقول رايه في الحاجة دي ويقول "دي مية مية" او "عشرة علي عشرة" !

اما المبالغة الرقمية المصرية فدي موجودة يعني اما تقوله شوفت فيلم كذا ممكن حد يقول "ده من ميت سنة يا عم" وهو من سنتين مثلا !
او واحد تاني يقول "ده من ايام اهل الكهف" !!
ولو كلمت واحد علي التليفون وابنه مثلا رد وتقوله اديني بابا هيقولك" ثانية واحدة" مع ان الواقعي بيقول دايما "دقيقة واحدة اناديه" اما المبالغ فممكن يقول "عشر دقايق اناديهولك" !! ده علي ساسا انه هيناديه من سطح العمارة مش من الاوضة التانية !

والحاجة اللي المصري متأكد منها قوي بيستخدم فيها برضه لغة الارقام زي مثلا "شوفتهم بعينيا الجوز"
ولو جيت تطرق حد من قدامك تقوله "وريني عرض كتافك" وساعات "هز طولك" !
وطولك بالمتر ونظرك يتقال عليه "ستة علي ستة" ووزنك بالكيلو ! كل حاجة رقمية جدا مش بس مصطلحاتنا .


وحتي اما تتكلم عن واحد تالت بتقول "فلان وعلان وترتان" والجملة الشعبية الشهيرة بتقول "سبعة صنايع والبخت ضايع" !
ودايما الناس عندها اعتقاد في تكرار المحاولة في الجملة "التالتة تابتة" ليه بالذات المحاولة التالتة محدش عارف !!
وعن التضحية بيتقال "اولعلك صوابعي العشرة شمع" برضه باستخدام لغة الارقام.

والجواز اكتر حاجة بنتكلم فيها بلغة الارقام زي "اليوبيل الفضي" و"الذهبي" و"الماسي" وغيره حسب عمر الزواج.
ولو واحدة زي القمر بيقولوا عليها "قمر 14"

وحتي الطلاق بيكون بالتلاتة ! رقم تلاتة دايما رقم تأكيدي في كل الحالات ولكن بالذات في الاستخدام المصري زي الشتيمة حتي "ده انت طلعت تلاتة...." وشتايم من انوع ده.

يعني مش غريب علينا ابدا اهتمامنا بالارقام واحنا معظم مصطلحاتنا وكلامنا اليومي كله ارقام في ارقام اصلا ايها الشعب الديجيتال .