Saturday, September 4, 2010

التــوت والشــلوت فيما يقال في مــناور البيــوت..دليلك لمنور سعيد





منور العمارة هو اكتر مكان تسمع فيه دهاليز كلام البيوت وغرايبه وعجايبه وكنت برجح نعمل برنامج اسمه "المنور" نحط فيه تسجيلات صوتية لاجمل جمل بتتقال في المناور..
انا من كنت ما عانيت من موضوع المنور ده قولت لازم اتكلم عنه .واحد هيقول طيب وايه اللي يقعدك تسمع كلام المنور هاقوله اصل معظم حياتي مقضيها في الحمام والمطبخ يعني باستمرار زميل كفاح المنور..

من اسوأ الجمل اللي ممكن حد يسمعها وهو قاعد متمزج في الحمام
يلاقي صوت عالي فجأة بيقول "هات التليفون اللاسلكي يا حسين اصل انا عريانة" هههههههه
ايه يا ستي الكلام ده..عريانة؟؟ مافيش الفاظ احسن من كده؟ يعني قولي ملط مثلا؟ او سلط ملط يا حسين..وبعدين انا كواحد قاعد بيسمع الكلام ده اكيد هيقول "يا بختك يا عم حسين" ولا اعمل ايه يعني؟ اقوم ابص؟؟

جارة تانية بقي بجد 24 ساعة بتغني في الحمام وفي المطبخ وفي بلكونة بيتها كل ما اروح مكان الاقيها بتغني ..اغاني مايعلم بيها الا ربنا بجد ..المصيبة انها بتسلطن الاغنية الشعبية يعني تقعد تغني كلمات" شرب العسل حلو بس النحل بيقرص..شرب الحشيش مزاجه عالي قوي والراجل اللي هييجي ويكرس" بشكل محترف كانها بتغني جفنه علم الغزل مثلا او امان يلا لالي امان..فبيدي للاغنية نغمة مقززة اكتر ما هي ..
وبتغني كلمات "اه ياني ياني ياني مش هاعمل كده تاني" كانها بتغني لماجدة الرومي
بتقعد تسلطن وتعمل طلعات زنزلات في صوتها بما يثير الاشمئزاز..


وطبعا في كل عمارة فيه شخصية "طفل العمارة المدوحس" طول اليوم تسمع في المنور "قفلت الباب علي اختك ليه يا صاصا" .."رميت الزهرية م البلكونة ليه يا صاصا؟ "هتموت اخوك يا صاصا".."الله يحرقك يا صاصا"...
واصوات ضرب من فئة ميكي جيب زي "بوم طرااااخ ااااه " وصاصا يطلع صوت واحد جهوري مينفعش يكون لطفل
ويقول "عااااااااااااا" اه بجد بيقول عاااااا مش موسيقي تصويرية او مش بيقول ابدا اااااه زي الاطفال الطبيعية..

امه تقوله يا صاصا اقعد هادي بقي انا هافتح قرأن..يقولها لا يا ماما انا عايز ميلودي..تقوله احترم نفسك يا صاصا..يقولها وانا عملت ايه انا عايز ميلودي..لحد ما تتنرفز عليه وصاصا يورم تاني م الضرب لانه بصراحة لو كان عايش معايا كنت قتلته من سنتين فاتوا..

اسوا حاجة بقي اما بيكون في تصليح سباكة في مواسير المنور وابقي قاعد في الحمام الاقي صوت واحد بيتنفس ورايا..ابص فجأة الاقي واحد متشعلق ورايا بيصلح المواسير ..انا ببقي قاعد مرعوب واسال نفسي طب ده لو عفريت هيقعد ورايا يتنفس هو خايف مني ولا ايه ؟؟..وبعدين هو ساكت ليه هو العفريت بيتفرج عليا وانا لامؤاخذة يعني بلبي نداء الطبيعة ؟؟ اما عفريت قبيح صحيح؟

ومرة دخلت المطبخ ع الصبح الاقي راجل كان بيصلح برضه بس ده اتكلم عشان ميخدنيش قال سلاموا عليكوا وانا بكل لقائية قولت "عليكم السلام" ما انا لسه صاحي بقي..وبعدين اتجمدت في مكاني وبصيت لقيت الراجل متشعلق برضه الظاهر اني اتعودت اصلا علي ام المنور ده معدتش بخاف منه ..

وياسلام بقي علي يوم عزومة الجيران اما بيجيبوا قرايبهم في المطبخ وهاتك يا عاصفة نكت من فئة "اخنقني شكرا" ..والمشكلة مش في النكت المشكلة اني بسمع عاصفة ضحك في المنور تهز ارجاء العمارة..

والاغرب بقي "جارنا اللي عمره ما عطس" ده واحد بيقف في المطبخ كل وقته وطول النهار اسمعه بيعمل صوت كده "اه اه اه اه.." والعطسة ما تكملش..حظه وحش اوي ابن اللذينا عمره ما عطس تقريبا بس عنده مهارة انه يتاوب كل ما يدخل مكان انما في العطس مش قد كده..

ومرة صحيت بدري قوي سمعت في المنور جارتنا بصوت عالي بتقول "انت ايه اللي مصحيك بدري كده؟" انا اتخضيت قولت ايه يا ستي انتي مرقباني ولا ايه ؟ بس هي طبعا كانت بتكلم جوزها وهو رد عليها الرد المناسب وقالها "حكمة ربنا بقي اخش اتخمد تاني؟؟" بصراحة رد مية مية هي تساهل كده عشان سؤالها الغبي..

وفيه واحد تاني اسمه مستر "علامة استفهام"
ده طول اليوم اسمعه بيقول "انتي بتكلمي مين؟؟ " "انتي بتاكلي ايه؟؟" "انتي بتطبخي ايه؟؟" .."انتي نازلة؟؟" ..ياعم ارحم امي بقي ده انا بقيت بخاف انزل قدامه لحسن يقولي انت رايح فين ..يا عم بطل اسئلة بقي خنقتني انا شخصيا فما بالك باهل بيتك..

ومستر "هزأني شكرا" ده طول اليوم بيغسل مواعين في المطبخ وتجيله تعليمات تسمعها العمارة كلها "شطب كويس يا حامد" .."انشر الغسيل يا حامد وخد المشابك من الحمام".."واللهي لو لقيت بقعة يا حامد هاعرفك شغلك" ..
لدرجة اني سالت امي هو ده شغال عندهم ولا جوزها وعرفت انه جوزها انا كنت متاكد متاكد مع اني كنت شاكك

علي راي فيلم "كلمني شكرا" ...


وفي السيدة "زغزغني" ودي طول اليوم بترقع كل ضحكة والتانية تشيب ..تبقي فاتحة تليفزيون المطبخ وانا سامع صوت الفيلم ومتوقع صوت الضحكة الجاية لاني عارف المشهد ده في الفيلم ..وفعلا تديها "هي هي هي هي" من النوع الحياني زي ما بيقولوا ..وتقول انت لنفسك "اموت ياهوه" بطريقة توفيق الدقن ..
السيدة "زغزغني" لا تتوقف عن الضحك الا اما يكون في ميتم في العمارة ززاو تقدر تقول بتوطي صوتها بس..

والحاجة اللي بتقلب المواجع تحت سمعتها بتقول لواحد دخلها الشقة الظاهر قريبها "عامل ايه يا حسين؟؟" وكان هذا السؤال هو الصاعقة شوف بقي الاجابات الجاية
"واللهي يا حاجة مش بخي الواد محمد لسه في المستشفي"
قالتله "وامينة عاملة ايه حالتها يعني بعد الطلاق"
قال "واللهي لسه في حالة مش كويسة يا حاجة"
قالتله" واسماعيل ابنك عمل ايه في الملحق بتاعه"
قال" واللهي شكله هيعيد السنة يا حاجة"
انا كنت هازعق في المنور وهاقول "طيب ايه لزمة السؤال الاولاني يا حاجة بتاع "عامل ايه يا حسين"..حسين اكيد عايز يموت يا حاجة ده انتي قاعدة تقلبي عليه المواجع اساسا الله يخرب بيتك يا حاجة..


وفيه شخصية "السيد عاشق الكنبة" ..ده طول اليوم تقوله هات الكوبايات م الصالة يا حسن..يقولها مش قادر تعالي انتي خديها..وتفوت ساعات وهو برضه مش قادر ..
وتفوت ايام وهو برضه مش قادر ..ولسه سامعه حتي من يومين بتقوله "فين الريموت يا حسن" يقولها" مش قادر تعالي دوري عليه" ..انزل يا حسن..مش قادر..
شيل معايا الانبوبة يا حسن..مش قادر..تقوله في الاخر خليك كده مبرطع ع الكنبة..وهو فعلا يعضق الكنبة اكيد بشكل هستيري وممكن يشترك في جمعية عشاق الكنبة علي الفيس بوك..


يعني تقدر تقول المنور هو زي برنامج "نافذة علي العالم" تقدر تشوف فيه كل الشخصيات موجودة في العمارات..او بالفلاحي ينورك يعني بالموضوع..يمكن عشان كده سموه المنور..


1 comment:

Anonymous said...

ههههههههههههههههههههههههههه
هههههههههههههههههههههههههههههههههه
هههههههههههههههههههههههههههههه

جاااااااااااااامدة