وظايـف الإشتـغالات في مصـرنا المحـروسة

في مصر عندنا دار الافتاء في كل مكان في الشارع في القهوة ع المصطبة حتي في الوظايف ساعات بنفتي فيها وهي مش محتاجة غير حاجة بسيطة قوي يمكن تكون وظيفة وزير عايزة مؤهلات اقل من السايس لأن عندنا الوضع مختلف تماما بالنسبة لمؤهلات الوظايف وساعات بنخترع وظايف اصلا وانت اكيد في مصر :



الوظيفة الاولي: الوزير:

الوظيفة دي البعض بيتهيأله انها عبأ بقي والراجل ده شايل هم البلد وكده ..مع ان الراجل ده قاعد في مكتب ولا قصر الملكة اليزابيث وتليفزيوناته وتكيفاته وفين وفيييين لما بينزل الشارع عشان يشوف حاجة علي ارض الواقع ده عايش في برجه العاجي زي اعضاء مجلس الشعب اللي مبيشوفوش الشعب اساسا ولابس في ايده خاتم ايه وساعة ييجي بمليون جنيه وعنده ميت سكرتير وخدم وحشم ويقولك بيشقي يا عيني يا ضنايا يا اخويا تصدق صعبت عليا
بس هي الفكرة ان في متطلبات لازم تكون موجودة في الوظيفة دي مش عند كل الناس زي مثلا البجاحة في التصريحات والنفاق والكذب وطبعا الشرط الاساسي موت الضمير المهني والضمير الشخصي وقابلية الشخص لاستقبال رشاوي ومكافات وهمية وطلبات علي بياض وحاجات كيتر قوي مش اي حد يعملها وقابليته لعيش حياة الترف بكامل انواعها من مارينا الي باريس
وانا اظن انها وظيفة سهلة قوي علي معظم الناس ولو خرجت منها بفضيحة ومستندات عليك وبتاع متقلقش الحكومة هتكافأك برضه وهتديك رئاسة شركة كبيرة او هتخرجك من ازمتك حتي لو دخلت بلدك مسرطنات وبلاوي متقلقش خش وعلي بركة الله وده بيفكرني بجملة "اقلعي واستهدي بالله" في فيلم الفرح



الوظيفة الثانية : سايس :

تمسك فوطة وتطلع تجري علي العربيات وترمي بلاك عليهم يا اما تكون بلطجي مع الحريم لاما تكون من النوع اللي بيتحايل عليهم عشان تاخد منهم فلوس وتمسح العربية مسح حلمنتيشي محصلش اصلا وغالبا لازم صاحب الوظيفة دي يمسك مطوة وموس في بقه وكل واحد شايل فوطة صفرا علي دراعه تعرف انه بقي سايس ودي مؤهلاتها فوطة ومطوة وشوية الفاظ وتلقيح جتت وتعامل الناس بجليطة وقذارة
يقولك ايه : تلاتة جنيه يا ابلة..
تقوله :ليه ان شاء الله
يقولها : هو كده يا ابلة دي تسعيرة المنطقة ولازم تدفعي
هي: ومين اللي حط التسعيرة دي
يقولها : انا

هههههههه بقمة البجاحة ولو مش عاجبها ومدفعتش ترجع تلاقي العربية لاما مرشوش عليها حاجات مقرفة او متجرحة او كاوتشها نايم طبعا


الوظيفة الثالثة : المخلصاتي :

وده اختراع فرعوني مصري لتخليص الامور سواء في المرور او كل الجهات الحكومية وهي مش من انواع الرشوي ولكن اسمها تخليص امور للمستعجلين
يعني تدخل المرور هتلاقي خمسة ستة من النوع ده تديله خمسين جنيه مثلا هيعملك الاجراءات بتاعة التلات ساعات في ربع ساعة وينجزلك نتيجة علاقاته بابناء المكان ده زي المرور او التامينا او غيره وبعضهم بيبني عمارة وبعضهم غني جدا من كتير التخليص وهي وظيفة لا تحتاج الا مؤهل التباتة والزن علي الودان


الوظيفة الرابعة : لبيس الفنانات :

يا سلام..يالها من وظيفة خصوصا لو كنت بتلبس هيفاء كل يوم الصبح ..دي احلي وظيفة في العالم تقريبا ..واحلي اصطباحة كل يوم
ولكن متطلباتها ان تكون عديم الاحساس تماما وبااارد وتكون "قرني" وعلاقتك بالجنس الناعم شبه معدومة عشان تتحمل مصاعب الوظيفة دي
لان الوظيفة دي مش لاي "راجل" ..!



الوظيفة الخامسة : عم بشندي :

عم بشندي بيقف كل يوم قدام المصالح الحكومية وبيستغل الناس اللي جت وفاتها حاجة معينة في الورق اللي بتقدمه فبيصور الورق بضعف التمن ويبيع الطوابع باضعاف التمن وانت لازم تدفع ليفوت عليك الدور وده موجود في كل حتة في مصر بتلاقيه بماكينة تصوير وطرابيزة كده في الشارع وده بعتبره اكبر اثبات اننا لسه في مرحلة العالم الخامس مش التالت ولا حاجة



الوظيفة السادسة : حاسب من ع السور :

ده بيكون في المولات كلها ولابس لبس امن وبيقولك اوعي من ع السور يا استاذ وهو مش عارف ليه بس هم قالوله كده في تعليمات الوظيفة لو شوفت واحد ع السور ابعده بسرعة والناس بتغلس عليه برضه ويقعدوا يقولوله ليه وعشان ايه ولا واعمل اللي انت عايزه والراجل طهق من ام الردود دي اساسا وزهق الوف برضه منه



الوظيفة السابعة : مؤلف كلمات لمطرب شعبي :

دي ليها شروط معينة انك تكون عاشق للحشيش والبانجو وعلطول عامل دماغ ومتسلطن طبعا لزوم السلطنة وتقعد تتكلم عن الدنيا بقي الدنيا مش عارف زي الغمازات ولا زي المرجيحة ولا زي الخيارة واي كلام تعبان وهلس وخلاص ودي وظيفة ليها شروطها لازم يكون معاك مطوة برضه باستمرار خصوصا لاعدائك في المهنة المؤلفين الحشاشين التانيين..ومافيش حقوق ملكية ولكن في حقوق للحشيش بس



الوظيفة الثامنة : عضو في حزب سياسي :

وظيفة جامدة قوي ومش هتعمل فيها اي حاجة تقريبا لان شعار الاحزاب "اللي ذاكر ذاكر يا ابني" والحزب الوطني هو اللي ذاكر طبعا واحنا مش هنلحقه..ده خلص المقرر كمان..ودي تخش الحزب بس وتطلب الشاي المتين بتاعك وتحضرلك كام اجتماع ملهومش اي تلاتين لازمة وتكتب في صحيفة سيس وخلاص..واسمك ليك نشاط سياسي وبتعمل حاجة حتي لو انت مبتعملش اي حاجة ومبتغيرش اي حاجة ..



الوظيفة التاسعة : تايم شيرنج :

تشتغل الناس في حاجات التايم شيرنج زي مثلا لو مقاس اندر وير حضرتك من واحد لعشرين هتكسب معانا او لو معاك جنيه في جيبك هتكسب معانا بس محتاجين منك عشرين جنيه رسوم بس وتحضر الحفلة وان شاء الله هتكسب ..وطبعا دي عايزة شروط انك تكون تعرف تشتغل الناس وتقلبهم صح وتقنعهم انهم هيفوزوا والجايزة عند ام حسين ان شائ الله..



الوظيفة العاشرة : انك متعملش اي حاجة :

ودي اسهل وظيفة وبيمارسها ملايين الشباب في ظل رعاية الحكومة الموقرة العزيزة تحت مظلة الديموقراطية والرخاء بس هم بيطولوا شوية تحت المظلة معلش..
بس الدولة بتوفر ليهم اساليب الرعاية زي البانجو وخلافه والقهاوي والعاب حديثة مثل الطاولة والدومينو وكمان بتوفرلهم شيبسي بطعم الكباب لو محرومين من الكباب
وشيبسي كمان بطعم الجمبري لو محرومين من الفوسفور ..
وبتوفرلنا كمان الفيس بوك لو محرومين من ممارسة الديموقراطية اقعد خرف وارفع فيديوهات سياسية وسب واشتم شوية واهو كله في اطار خطة الجعجعة العامة للدولة
وربنا يجعله عامر ان شاء الله.



الوظيفة الحادية عشر : محلل كروي :

ومن مؤهلاتك انك تشوفلك كام ماتش وتقعد تقول الكلمات المحفوظة اللي اتكلمنا عنها قبل كده في التحليل الكروي زي "لياقة ذهنية" و "التمانيات" و "البليند سايد"
و "من مواليد منطقة الجزاء" وشوية كلام فاضي معقول وتكون بتعرف تتخانق وقت اللزوم لو جالك مداخلة من واحد لمض حبتين في الاطار الكروي المشاكس
واي واحد ممكن يقعد يحلل واكثر الاماكن شهرة للتحليل ع القهاوي والمصاطب..الكل محلل هناك.



الوظيفة الثانية عشرة : صاحب وصلة دش او انترنت :

ودي بقي كله عاملها وبيقولك اهو اسمه صاحب مشروع وخلاص وهو اصلا يعتبر عاطل رسمي فاضطر يعمل المشروع اللي هو لا يستحق ان يطلق عليه لقب مشروع طبعا اسمه الحقيقي "صاحب وصلة" يعني شوية سلوك وريسيفرات تنقله من الفقر وفيلم حين ميسرة اللي هو عايش فيه توديه لمنطقة ابعد شوية ..



الوظيفة الثالثة عشر : مفسر احلام :

اقرا كام كتاب تفسير والف انت الباقي يعني لو شوفتي قطة تبقي مش عارف ايه ولو شوفتي بتنجان تبقي هتخللي مش هتتجوزي وكده يعني ولو شوفتي توم كروز ابقي غطي نفسك كويس وشوية حلمنتيشي كده والعملية تمشي وتعيش في فيلم احمد زكي البيضة والحجر وتغني الدربندوخ الدربندوخ وتلبس جلبية وتشتغل ام الناس طول النهار في الفضائيات اللي هتلقطك طبعا بسرعة



الوظيفة الرابعة عشر : تنمية بشرية :

اشتغل في المجال ده اليومين دول تاكل عيش روح خدلك كورس عند الفقي ولا غيره وتاخد الدبلومة بفلوسك في اسبوع وتقعد بعدها تصيع ع الجميع وتمشي باسلوب "بص في المراية تبقي احمد عز" والحاجات دي ..قول "انا نجيب سويرس..عشر مرات " لان مافيش حاجة اسمها مستحيل..مع اني مبصدقش في الكلام الفارغ ده هو بس مع تايد للغسيل ما فيش مستحيل انما غير كده في مستحيلات بالهبل..انما بتوع التنمية البشرية يروح للقصير يقوله هتبقي بطل العالم في السلة..وصاحب السمنة المفرطة يقوله هتلعب باليه ع الجليد واي كلام بس بص في المراية وظبط نفسك ..



ودي اسهل وظايف في مصر في الوقت الحالي.