مــربي يا معــلمي مــربي..هم النم يا روحي

تاكل ايه او تشرب ايه ؟..
ده اول سؤال الناس هتسأله في اي مكان بس المشكلة ان الموضوع عندنا اتطور قوي في حب الاكل يعني مش بس السؤال ده لكن امتد لكل مناحي الحياة ..الكلام عن الاكل او كلمات لها علاقية بالاكل دايما في حياتنا بشكل يومي بدون معرفة مصدرها او ايه علاقتها باللي احنا بنقوله ..

زي مثلا اول ما تقعد خالص وقبل ما يسألك الشخص عايز ايه هيقولك تشرب ايه ؟ لو في مكان رسمي اما لو مع خطيبتك او حد قريب هيكون السؤال تاكل ايه قبل اي حاجة وكأنك لازم تكون جعان او عطشان يعني هي مش حاجة فسيولوجية لا ده انت المفروض تبقي جعان علطول او عايز تشرب حاجة !

كلمة مثلا زي "قشطة "..علي كل اتفاق يقولك قشطة..او لو عجبته الفكرة قوي يبقي "قشطات" حتي واحنا بنتصالح مثلا يقولك "صافية لبن" يرد الطرف الاخر "حليب يا قشطة "
ونمسك الطفال طول اليوم نجري وراهم عشان موضوع الاكل اكتر بكتير من موضوع المذاكرة ونسمعهم اغاني عن الاكل زي "هم النم يا روحي يلا جايبالك مم" عشان يحب الاكل وياخد معاه ساندويتشاته المدرسة ويخلصها مش مهم اتعلم ايه النهاردة اول ما يرجع امه هتسأله سؤال واحد "كلت ساندوتشاتك ؟ " ده السؤال المهم لاي ام ..
واحد تاني ممكن يقول "عجوة" علي حاجة عجبته برضه وهي موازية لقشطة ولكن احيانا تستخدم في المواضيع الملخبطة يعني موضوع اتلعبك يقولك بقي "عجوة".

ولو واحد بيتقرطس ..وحتي يتقرطس ده مصطلح اكل برضه مشتق من قراطيس اللب..الي بيتقرطس يقولك اسمه "كيس جوافة" طيب ايه علاقة كيس الجوافة بانك اتقرطست مش فاهم ؟ هو الاكل في كل حاجة وخلاص ..
واللي عايز تعرف اصله تقول عليه "بانت لبته" ..حتي يا اخي في الكلام الدارج يقولك "كاني وماني ودكان الزلاباني" برضه جيبنا سيرة الزلابية هنا بدون داعي تماما ..هو احنا جعانين علطول ولا ايه ؟
وعلي فهم المواضيع يقولك "قارش؟" من القرش بالسنان يعني ..

والمعاكسات بقي وياعيني علي مصطلحات الاكل في المعاكسات هي الاكتر والاشهر ..زي البنت يتقالها ايه في المعاكسة "ملبن"...."قشطة"..."مربي يا معلمي مربي"..

ولو رقيقة قوي بنقول "بسكوتة " ..حتي ان في ناس يقولك البنت دي "تاكل صوابعك وراها" ولو تخينة يقولك "كاملة الدسم"

ايه هي البنات دي برضه بتفكركم بالاكل؟؟ هو اي حاجة جميلة او غريبة او عادية بتفكركم بالاكل ؟؟ طيب ليه ؟
يا راجل ده حتي في السياسة يقولك "المطبخ السياسي" ولو ماتش حلو في الرياضة يقولك "وجبة كروية دسمة" !
وفي البيوت اللي تبقدملك عصير يقولك لو سيبت شوية "كمل العصير احنا عندنا بنات" ..اتحجج اتحجج قال يعني انا اللي مخليهم ميتجوزوش يا عم الحاج عشان شوية عصير !

حتي ان اللي بني مصر كان في الاصل حلواني ..! للدرجة دي الجوع ضاربنا يعني ؟ ولا هو ده السبب الرئيسي ؟ ان اللي بني مصر حلواني فمن ساعتها بنفكر في الاكل بشكل هستيري..!

وفي كمان المبسوط يقولك "مزاجي عنب " برضه ليه العنب بالذات ؟ وطالما انت مبسوط يبقي لازم برضه الاكل في الموضوع ؟
وفي الالوان حتي في المحلات ساعات يقولك "احمر شربات" "اخضر بطيخي" "اصفر مانجاوي" حتي الالوان برضه نديها تشبيهات اكلية ..
وحتي اللي في وضع مزنوق قوي دايما يوصفوهم انهم في "علبة سالمون" يقولك ايه الميكروباص الضيق ده ده احنا اكننا في علبة سلمون !
ولو واحد ملخبط حاجة يقولوله "ايه العك ده ؟ " ودايما كلمة العك تحس ان ليها علاقة بالاكل
وفي الوسايط والرشاوي يقولك "كووووسة" ولو واحد بيخرف ويبيقول اي كلام يقولوله "انت بتقول اي بتنجان "
وفي حالة الشراء سعات يقولك "هو احنا بنشتري سمك في مية ؟ "



يعني الاكل ومصطلحاته ضاربين فينا من ساسنا لراسنا .."قشطة"..ولا "عجوة" ؟