Friday, May 6, 2011

الواد بتاع الدليفري






جالك الواد بتاع الدليفري ؟؟؟

ليه دايما بتقول الواد بتاع الدليفري..برة بقي بيبعتوا مزز بالدليفري انما عندنا في مصر مافيش احتما اصلا ان تلاقي مزة دليفري انما دايما هو مش ولد ولكن "الواد" بتاع الدليفري !
هو اللي استحق لقب "واد" عشان افعاله وتصرفاته الغريبة جدا ..الناس اتعقدت من بتوع الدليفري
انا بطلت اطلب من بعض المطاعم بسبب العامل بتاعهم مثلا ..فظيع مريع شنيع..من ما وراء البحار يعني .

اول واحد طلبته والمفروض كان ييجي من ساعة مثلا..اتأخر أتأخر..فجأة انا معدي بالصدفة في الصالة لقيت واحد بينده برة قدام الباب "يا استاذ معتز..يا استاذ معتز" !
بينده بصوت عالي قوي وبيخبط علي شقة تانية كمان ..يعني حتي لو افترضنا ان دي شقتي مش شقة الجيران ..انت بتنده في بير السلم ؟؟ ده اسلوب اقوي من الجرس يعني ؟؟انت شايف كده ؟؟
بيقولي "اصلي خبطت كتير محدش رد فقولت انده " !!
طيب اتعلموا منه بقي لو محدش رد ع الباب اقف زي العبيط واندهاسم اللي انت رايحله في بير السلم عشان يرد..المهم انا فهمته ان مش عشان هو نده انا رديت ولكن انا كنت معدي بالصدفة في الصالة سمعت اسمي برة !


واحد تاني جه ع الباب ووقف بقوله "فين باقي المية جنيه اللي قولتلك عليه"
قاللي " ما هو مدنيش انت ممعاكش؟
قولت "لا امال انا قولتله ليه في التليفون ؟"
قال "اه..طيب هنعمل ايه دلوقتي ؟ "

اجابة ذكية جدا من عامل الدليفري.. "هنعمل ايه دلوقتي" ؟؟ ..نطلع ع القسم مثلا ؟؟..ما تنزل تغور تفك من اي داهية ولا يعني المفروض انزل معاك ونتفسح في المحلات عشان نفك الفلوس ؟؟
وتحس انه متضايق انه هينزل مثلا وانا عندي سؤال مهم..ازاي متضايق ينزل لحد السوبر ماركت اللي تحت وهو بقاله مثلا خمس ساعات بيلف علي كعوب رجليه دليفري ؟؟ ولا المشوار ده اللي هيجيب داغه يعني ؟؟


ده مرة قاللي "طب هاجيبلك الباقي بليل اصل الدنيا حر قوي "
ده طبعا علي اساس ان البقال اللي هيفك منه في الصحراء الشرقية مش تحت قدام البيت !

في نوع بقي من بتوع الدليفري اللي هو بيرجعلك بالفلوس ..يعني تديله زيادة عن الفلوس مثلا نفترض تلاتة جنيه يرجعلك فجأة يخبط ع الباب ويقول "حضرتك ده في زيادة"
تقوله" اه تمام ماشي لا كده مظبوط"
يقولك"لا في زيادة علي الحساب"
تقوله" طيب خلاص مش مشكلة"
يقولك" لا واللهي في زيادة"

قدامك حل م الاتنين لما يزهقك وانت عايز تقوله انه بقشيش
تقوله "اه ماهو ده اسمه بقشيش بروح اهلك امال انت عامل دليفري ازاي؟"
يا ما تقوله "هات ام الزيادة في الفلوس ومنتاش واخد ولا مليم وعليا النعمة"


اما عجايب يعني واحد بتديله بقشيش يرجع يقولك في زيادة في الحساب ياعم طب ما انت فاهم انه بقشيش حتي انا حاططلك البقشيش في جنب لوحده غير الحساب نفسه !

في عامل دليفري بقي بييجي كل ما يشوفني بيبتسم وفي واحد تاني كل ما يشوفني احس انه بيزغرلي مش عارف ليه كاني جوز امه !
اما يبصلي النظرة دي احس ان الاكل اللي هو جايبه فيه سم قاتل مثلا ..او هو عاملي خطة معينة عشان يسمني ..بطلت اجيب من المطعم ده لان الراجل بصراحة مريب قوي .

في مطعم بقي يبعتلك واحد بتاع دليفري ماسك موبايل اخر موديل وبيتكلم فيه وهو بيديك الطلبات كانك انت اللي جايبله طلب وانت خارجله بالفانلة مثلا وهو لابس الحتة اللي ع الحبل وماسك موبايل فاجر في ايده !
يطلع مين بقي !! صاحب المطعم نفسه !!!
صاحب المطعم هو اللي بيوصل في بعض المطاعم الفقرية جدا وبيكون لسه فاتح مثلا او هو مستوي المطعم كده مبيصدق يلاقي زبون
واما تشوف المنظر ده ..اعرف انك هتاكل اكل زبالة يعني اذا كان صاحب المطعم هز طوله عشان زبون معني كده ان المطعم شبه مهجور وتلاقي عليه عناكب محيطة بيه من كل مكان !


ولا معاملة البواب بقي مع بتوع الدليفري دايما العلاقة بينهم سيئة مش عارف ليه في اي عمارة.
تلاقي الباب بيخبط تيجي تفتح تلاقي البواب ورا الراجل وبيقول "الراجل ده جايلك" ؟
اقوله "اه يا عم امال يعني متنكر في زي دليفري وجاي يغتالني ؟..حد قالك ان دي شقة رافت الهجان مثلا ؟

تحس ان البواب دايما قافش في ضهر اي واحد طالع لحسن يكون متنكر مثلا زي الافلام وادي تاثير "وصلة الدش" علي البوابين ..خلاهم يشوفوا الافلام كلها ويعيشوا الجو البوليسي الجديد مش زي بواب زمان اللي كان بيشرب شاي وبس وبيلعب طاولة !
ده النوع الجديد "بواب الوصلة" .


مرة واحد بتاع دليفري جاللي وانا كنت مشغل فيلم علي التليفزيون ودخلت اجيب الفلوس وخارج الاقيه بدل ما كان برة دخل جوة شوية وبيبص ع التليفزيون !!
انا استغربت قوي لقيته بيقول "القناة دي بتجيب افلام حلوة قوي "
ايه ده ؟؟ ده دخل جوة الشقة تقريبا ده ناقص يقعد ع الكنبة وناكل لب مع بعض وبتاع ..
قولتله "طب ما تتفضل"
قاللي " الف شكر يا باشا ربنا يخليك"

ده صدق الدعوة كمان !! افتكر اني هاعزمه ع الغداء بقي ونقعد نشوف الفيلم كل ده مكافأة انه جابلي الطلب يعني ؟؟
لو عزمت كل بتاع دليفري علي حاجة يبقي هاصرف عليهم دم قلبي بقي !


مرة جاللي بقي في طلب انا كنت طالبه اتنين بتوع دليفري مع بعض !! وعلي ما جيبت الفلوس كانوا بيبعتوا لبعض بالبلوتوث !!
ايه المطعم اللي عنده وفرة في بتوع الدليفري ده !!
كل طلب بتبعت اتنين ؟؟ ليه هيزف الزبون ع الباب ؟؟

ولا اما تطلب دليفري بقي في رمضان قبل الفطار بشوية عشان تفطر بيه تحس ان الراجل شاكك فيك انك فاطر !!
يا عم انا طالبه عشان الفطار كمان ساعة ..انما هو تحس ان فيه نظرة شك كانه ابوك مثلا او من بقية اهلك.


وفي النوع بتاع "ملقتلكش"
يقولك دايما في الطلبات "ملقتلكش كذا فقولت اجيبلك كذا "
يعني بيشكلك الطلب علي كيف كيف سعادته مثلا..طب انت ملقتليش ايه اللي خلاك تجيب التاني ده ..؟ هو انا يعني بيعجبني ذوقك قوي ؟؟ ولا انت عاملهالي مفاجأة مثلا ؟؟
تكونش خطيبتي ؟؟

وفي النوع اللي بيخبط كتير قوي ع الباب تحس ان في مصيبة برة مثلا
"تررررن تررررن تررررررن"
مرة جريت بسرعة فتحت لقيت بتاع الدليفري "قولتله في ايه يا عم هو الاكل سخن للدرجة دي ؟؟ انت كنت بتجري بيه في الشارع ولا ايه ؟ "
اصله كان بيخبط بجنون كان في وحش قرمزي بيجري وراه في الشارع او الاكل بيلسع فيه وهو واقف .



بتوع الدليفري طلعوا عيني..مافيش احسن من اكل البيت بدل قرف الدليفري وتصرفاتهم العجيبة والمريبة.
فكك م الدليفري وكل في بيتك احسن.
يا دليفري يا معلي حسي.


1 comment:

Anonymous said...

ههههههههههه جامد جدا

انا متابع دائم للمدونة بتاعتك وبتعجبني كل المواضيع بتاعتك

انت المفروض تكتب مجلات او اي حتة يعني مش بس ع النت بجد والمصحف