Saturday, October 17, 2009

رقــصــة غــــرام







أنا عايز أموت وانا بعشقك..
هتكون أمالي اتحققت..
وهأموت سعيد..
وأكتب نهايتي بدمعتك..
وأشوف في دنيا رقتك..
عالم جديد..
أنا عايز أموت وأنا بكتبك..
علي ورقة بيضا أو ارسمك..
يتبقي حبر من القلم..
وأسقط في غيبوبة الألم..
وأشرب ملامحك ع الورق..
لحد ما اشبع م الغرق..
ولحد ما انتي تقولي لا..
وتعيشي تتمني الحياة..
وتقولي ليا انا عايزة اعيش..
انا عايزة اعيش وانا بنطقك..
وأعبر بروحك للندي..
أنا عايزة اعيش وأنا بخطفك..
للشمس والنور والهنا..
أنا عايزة اكون لحظة وجود..
بين زهر نفسك والخلود..
أو عايزة أكون رقصة غرام..
وأرقص علي نبضك وأنام..
أو نفسي اكون لحظة فصام..
بين نبض قلبك والغرام..
وأقول انا..
أنا نفسي اكون لحظة جمال..
وأعبر بحسنك للكمال..
او نفسي أكون لحظة حنين..
مخلوقة من عشق السنين..
وتقولي انتي..
انا عايزة اكون نور من عنيك..
او دعوة تخرج من ايديك..
انا عايزة اكون زهرة حياة..
ياسمينة تكتب لك نجاة..
انا عايز اموت..
وانا بحضنك..
حضنك هيخلق فيا روح..
ويداوي عمري من الجروح..
انا عايز اموت ..
وانا بنبضك..
نبضي ساعتها يموت رقيق..
ويرش عطرك ع الوريد..
في عنيكي لحظة..
بكل شئ..
وعشان اعيشها..
سيبيني اموت..
سيبيني اموت ..
علي كحل عينك..
نقطة ندي جارية في جبينك..
وسيبيني اموت..
فوق الشفايف..
وساعتها اموت مش هأبقي خايف..
سيبيني اموت..
صوت غنوتك..
او ريش نعام في مخدتك..
وأنساب غرام من دمعتك..
أرجوكي مرة سيبيني أموت..
بس تكون وأنا بعشقك..
ده الموت جميل وأنا بعشقك..

4 comments:

Unique said...

........................

:)

Unique said...

قريتها للمرة التالته -او غنيتها-

تحياتي لاكتوبر يبدو انه موسم لعطاياك السخية

اسنمر وامتعنا

معـــــتز هــاني said...

يارب اكون عند حسن ظنك دايما وانا سعيد جدا بجد ان انتي دايمابتسعديني بحضورك دايما ده انتي بقيتي صاحبة مكان ههههههه

Unique said...

اعمل ايه ؟؟ مضطرة اجي هنا دايما
كيبوردك بتحرض على المتابعة جدااا
لولا خشية ان يكون فيها شبهة غلاسة كنت علقت على كل موضوع .. -مش هتكون كلها تعليقات ايجابية على فكرة-
رغاي اوي سعادتك بس قادر تخلق حالة من البيييييس والادهاش مش معقولة
بجد بجد شكراااا