Friday, September 17, 2010

الحـرق بالجــاز في لــيالي الجــواز..الجــزء الرابـــع





من كلمة "اللي في وسعي" الي كلمة "اللي حيلتي" :


في مرحلة "الوعود التي تسبق العاصفة" اللي هي الخطوبة بيكون كل الكلام عن الراجل "الهالك" المارد الشديد اللي هيعمل كل اللي في وسعه عشان يسعد خطيبته وشريكة حياته لكن بعد الجواز بفترة تبدأ المصطلحات دي في الظهور تدريجيا بعد كل سنة :

"وانا اعملك ايه يعني هو انا حاوي"
"اللي جاي علي قد اللي رايح" ... "هم دول الفدانين اللي حيلتي" .."هو حد شايل الليلة غيري" .."ما انتي ايدك في المية" .."ما انتي مش تعبانة في حاجة" .."

وتبدأ الطاقة والراجل الهالك في التلاشي تدريجيا ويتحول الي فارس مهزوم علي حصانه وده طبعا الحصان بتاع الاميرة وكده اللي هو في الخطوبة واللي بيتحول ال توك توك بعد الجواز علطول..الحياة بتبي عادية روتينية تبدأ مرحلة المكاشفة العاطفية والحياتية كاملة بعد ان غلب الطبع علي التطبع وطبعا الخطوبة هي التطبع..


أمي > حماتي :

هي دي علامة اكبر من..وممكن نقول امي "اكبر من او يساوي " حماتي بعلامات الرياضة..لأ ده احنا ممكن نقول حماتي تساوي "فاي" بلغة الرياضة برضه..!
لكن لازم تخلي امك في المقام الاعلي ولا تقع في هذه الهفوات اللي جاية :

في ليلة من ليالي الخريف والذئاب تعوي "اعوووووووه" عزمتك حماتك علي العشا عندها وفجأة سألتك :

حماتك : ايه رايك في الاكل ؟
انت : جميل جدا تسلم ايدك
حماتك : يعني هو ولا اكل امك ؟

ويضرب الرعد في السماء بالخارج زي افلام الرعب وتكمل الذئاب "الاعوووووه" بتاعها..وتبدأ انت في الوقوع علي الارض زي نور الشريف في فيلم الرقص مع الشيطان
ولكن لازم تخلي بالك جدا من اجابتك لان لو قولت انتي احسن يا حماتي يبقي انت انسان منافق وعايز تكسب الجولة ومالكش خير في امك
ولو قولت لا طبعا امي احسن يبقي انت خسرت حماتك وجزء من مراتك كمان ..يعني لازم تنافق وتنافق ثم تنافق بس برضه مش علي حساب امك

يعني مثلا :

"لا طبعا امي ليها طعم وانتي ليكي طعن تاني يا حماتي" ...." الاكل من ايديكم انتوا الاتنين زي العسل"... "انا حاسس اني باكل من ايد امي..انتي زي امي"..

وكلام هنتريش من ده كتير انما متخليش اي رد يطغي علي امك لحساب حماتك بتاعة ليالي "الاعوووووووووووه"..


مواصفات العروسة :

واللهي ما حد عارف هو عايز مواصفات ايه اصلا كل شوية بتختلف ووضع مواصفت كمبيوتر اشتريه من عند الشيخ سيد اسهل كتير من وضع مواصفات عروسة عايزها..
وكذلك الحال للبنات برضه في فتي الاحلام هي كل ليلة ليها فتي احلام معين
ولكن بعد الجواز بتكتشف انه كان "فتي الكوابيس"..اللي كان بيطلع دوبلير ورا في
الاحلام يقولها اوعي الجمبري يعضك وكده..
كلمة "مواصفات" طبعا تنطبق علي الجواز مش علي الحب واي كلمة فيها اختيارية وحرية بتنطبق فقط علي الجواز مافيش حاجة اسمها مواصفات الحبيبة..
لكن جوازات
الصالونات كلها مواصفات وممكن تمسكها في ايدك في ورقة كمان وتعاين وتقارن وتعلم علامة صح قدام صفة لقيتها ..!

لكن الصفة المشتركة انك اكيد مش هتلاقي "حريفة البلاي استيشن" ولا "الفاهمة في الكورة" حتي لو كانت عارفة اسامي اللعيبة برضه مش هينفع..
المستطيل الاخضر بعيد عن احلام البنات تماما لان المستطيل الاخضر اللي تعرفه هو الملوخية اللي ممكن تطبخها في البيت وبس..انما الكورة شئ خيالي ليها زي برامج الموضة بالنسبة لك..



ليلة الحنة :

أسوأ حاجة في الجواز هي ليلة الحنة وهي ليلة للناس يتكلموا فيها عن العريس والعروسة وينموا عنهم في وشهم وقدام اهاليهم لان في قاعة الفرح مش بيبقي الصوت مسموع انما في الحنة احيانا اول ما توطي الدجي تسمع بواقي الكلام اللي كان بيتقال بصوت عالي زي مثلا :


الدي جي شغال واصوات بتتقال ومحدش سامع حاجة والصوت عامل كده : ولاووشه شوشنبيمبنميخق مبلمبقخل منبلمبنلخقلنبمل
واول ما الصوت يوطي :نبتلنبتلبنتلب والعريس شبه السيدة ملعقة
وبعدين يعلي الدي جي وتبدأ الاصوات في التلاشي وتسمعها كده: منميبلخهقملني لمينلمكيبلخملي بلميبنلمكيبنليبل
ويوطي الدي جي وتسمعها كده : يمنلمينليل والعروسة شبه قرش الحشيش قبل ما يتوتك..

ومعظم الشباب اللي جايين الحنة جايين يرقصوا وياكلوا وكأنهم بياخدوا عرقهم عن صحوبية صاحبهم او مستنيين اجر عشان هم اصحابه مثلا تلاقيهم بياكلوا كانهم مكلوش قبل كده في حياتهم والهدف الاهم طبعا جايين يشوفوا بنات جديدة في الحنة يمكن يلقط عروسة ولا حاجة

وتبدأ الاغاني الجاهلية في الظهور احيانا من طرف عيلة العروسة وكانهم مسمعوش اغاني محترمة قبل كده او وكأن الحنة لازم تكون بيئة مش لازم نفتح فيها سيلين ديون
ولكن لازم اغاني "ادحرج واجري" وكلام ابشع من كلام المحششين..

وطبعا صاحبات العروسة وسطهم بياكلهم موت اكيد مش فرحة لصاحبتهم ولكن محاولة لخطف عريس من وسط الحنة البايخة دي مع ان اللي ترقص دي هتكون اخر واحدة تتخطب الا للدغف طبعا..



جوازوفوبيا :

بعد الفوبيا الكتير والاسلاموفوبيا وغيرهم من انواع الفوبيهات والخوف المرضي اكيد دلوقتي في الجوزازفوبيا المنتشر في العالم العربي خصوصا مع كتر حالات الطلاق اللي بنسمعها في كل حتة والمشاكل الزوجية والزوج الباكي والزوج المخلوع والزوج اللي مش عارف يشوف ابنه تاني والقصص دي
فلازم الاعلام يكون ليه وقفة ويعمل
اعلانات تحفز علي الجواز زي :

"اتجوز ناني وسالي..ولا هتقضيها تسالي ؟ " ..تظهر في الاعلان ناني وسالي علي الجنبين وانت قاعد تاكل لب وفاضي

" البلاي استيشن مش هينفعك..انت عايز زوجة تدلعك ".. ويحطوا في الاعلان ده بلاي استيشن بيتحرق وتظهر مكانه واحدة بفستان فرح

" سريرك واسع وبراح..بس انت عليه مش مرتاح" ..ويجيبوا صورة واحد علي سرير بيتحرك في الشارع وهو بيعمل زي التباع "ايوه السرييييييير..السرييييييير وااااخر "

" اتجوز يا نني العين..انت متعرفش الدهب علي فين" ..ويجيبوا صورة اتنين ويكتبوا تحت بعد 15 سنة ..وهم بينتحروا في الصاغة..


يعني لازم نحفز الشباب جامد لان الفوبيا بتزيد والعلاقة بين الرجالة والستات بقت زي العلاقة بين ادوارد والكوميديا..!



برطعة البيوت :

برطعة راجل البيت في بيته تسير الاستياء وبيكون بعدة شخصيات :

1- رجل الحقل : ده بيكون لابس بيجامة كستور وبالفانلة ومشمر رجل البنطلون من تحت وكانه لسه راشش ارضه كيماوي حالا..

2- صبي الحلاق: ده بيمشي ينضف بواقي التراب بعد تنضيف زوجته اللي هو مش واثق في تنضيفها واحيانا بيبقي ماشي بفوطة في ايده..

3- السحت بيه : ده بيمشي بسيجارة ماركة محترمة ولكن بالفانلة والاندر وير ..وشبشبه فيه حتة مقطوعة..

4- المبالغ : اللي قاعد طول اليوم لابس اشيك حاجة كأنه قاعد في انتظار هيئة دبلوماسية طول اليوم..

5- اتباع داروين : وده ماشي بشعر طويل ودقن طويلة وشعر صدر طويل وكل حاجة فيه تخلي مراته ترمي موز وفول سوداني علي الارض يمكن يلقطها ويسقف..

6- المبقع : ده اكله كله بقع اكل ودايما بيدلدق مية وهو بيشرب علي هدومه وتلاقي هدومه خليط عصاير واكلات

لكن الست بتتعود بعد فترة وبتجهز اسلحتها برضه وتتحول لفتاة من فتيات الميتال في الشقة شعرها منكوش ومتبهدلة وهدومها واقعة وكانها لسه خارجة من حفلة هيفي ميتال حالا..




وربنا ينصفكم في جوازة حلوة كده ومتكونش جوازة من بتاعة "الغراب جوزوه احلي يمامة " والنظام ده ..!




3 comments:

Anonymous said...

ههههههههههههههههههههههههه
ههههههههههههههههههههههههههههههه

مصر اليوم said...

مجهود رائع منك

جفرا said...

والله معاك حق