الدلـيل المغـوار في دخلات المصـريين في الحــوار

عندنا الكلام ليه طعم تاني لذيذ ومختلف ودخلاته غريبة جدا او بتكون ممكن الاستغناء عنها او بتكون دخلة غريبة ولا دخلة الاندرتيكر وطقم المصارعين يعني لازم تبدأ كلامك بشكل من الاشكال اللي تحت وكل دخلة وليها ظروفها :


1- بيقولك :

ودي اشهر دخلة مصرية وفي اي موضوع كان سياسي فني رياضي قصة عنك اي حاجة لازم بيقولك ..وكل مصر بتتسائل من زمان هو مين الل بيقولك لكن مش دي المشكلة ..المشكلة انها اكيد اتطورت مع تطور العصر يعني دلوقتي بيقولك ممكن تكون قائمة علي النت مثلا زمان كانت كلمة "بيقولك" فقط علي اشخاص قبل ظهور النت دلوقتي المصادر متعددة وكمان الفتي والتأليف والهمبكة زادوا فممكن تكون "بيقولك " دي قايمة علي اشاعة من بتاع الفرن او غيره انما زمان كانت بتكون اشاعات سياسية مثلا في البلد من مصادر عليا..وممكن تكون "بيقولك" قايمة علي جرايد اجنبية كمان قراها علي النت يعني كلمة "بيقولك" اتطورت جدا ومصادرها زادت ممكن دلوقتي جورج كلوني "بيقولك " او براد بيت "بيقولك " غير زمان خالص



2- عرفت :

واحد ييجي يقولك "عرفت اللي حصل امبارح؟ " طيب ايه الدخلة دي ما انا لو قولتله اه عرفت يبقي خلص الحوار ومش هيكمل وبعدين لو كنت عرفت هتقولي تاني ولا هتسكت ؟ وبعدين كان ممكن يقول علطول "عرفت ان كذا كذا" بدل مايسأل ام السؤال ده وبعدين يكمل باقي الحوار وممكن يتسأل بطريقة تانية زي "شوفت " "سمعت"
وكلهم نفس المعني ..ودي من اكتر الدخلات شهرة عندنا وخصوصا اما تكون دي لازمة عند واحد بتبقي مقززة طول القعدة يقول "عرفت..عرفت..عرفت" كأنك قاعد مع موسوعة مثلا او فقرة اضف لمعلوماتك ..عكس كلمة شوفت فهي اقل وطأة ..



3- اضحكك :

دي ارخم كلمة بقي تبقي قاعد جنب سواق الميكروباص يقولك "اضحكك يا استاذ امبارح حصل كذا كذا"..طيب هو هتضحكني بالعافية؟؟ ومين قالك اني عايز اضحك دلوقتي ومين قالك انك اصلا هتضحكني بحكايتك مع الامين امبارح هي ناقصاك يعني؟ وكأنه بيحجز ابتسامة بالعافية بكلمة "اضحكك" في اول الحوار او بيقول "تنبيه هذه القصة مضحكة" او زي المنولوجست "النكتة الجاية دي جديدة" ..ودي ممكن يكون ليها رد سهل "لا مش عايز اضحك" يبقي انت كده قتلته قبل ما يحكي القصة اصلا..


4- بقولك ايه :

دي ساعات بتكون قبل اتفاق معين او امر مهم هيتعمل مش زي بيقولك او الكلمات التانية وبرضه جملة غريبة ما انت بتمارس فعل الكلام اهو يعني مش محتاج تقولي انك بتقول ما انا شايف بام عيني انك بتقول وشفتك بتلعب يبقي قول علطول والاغرب منها لو قال الاسم كمان وانتوا الاتنين بس مع بعض زي مثلا "بقولك ايه يا محمد" تعرف ان الموضوع خطير بقي ..هو بيقول اسمي ليه؟ وليه اصلا بيقول بقولك ايه ..اكيد عايز حاجة او اقتراح غبي لان لو كان اقتراح لذيذ كان قاله علطول انما هو عارف جواه ومتردد انه اقتراح مش لطيف ومكسوف يقوله فبيحاول يمهد قبله..


5 - بص:

ودي بداية غريبة برضه لبدأ حوار طيب ما تقول وانا هابصلك ليه؟ ماهو انا بسمع بوداني علي فكرة مش بعيني يعني اديني الحوار في وداني علطول ما انا جنبك مش محتاج ابص لعيونك الساحرة يعني يا عم الامور ..



6- ينفع؟ :

دي بتكون قبل حاجة انت عارف انها غلط او مش هتنفع بس بتتأكد ..زي مثلا "هو ينفع اخرج مع مراتك النهاردة ؟ " او حاجات مشابهة بتكون انت عارف انها مستحيل فبتتطمن بس قبلها عشان احتمال واحد في المية انها تنفع ولا حاجة لكن بدايتك بالكلمة دي معناها انك عارف كويس انها مش هتنفع اكيييد..
"ينفع اكل ساندوتشك ؟ "
"ينفع استلف الكتب دي منك ؟ "
"ينفع اخد منك الجهاز ده النهاردة ؟ "
يعني هي كلمة استغلالية جدا وكأنه بتقشط صاحبك بالكلمة دي ..


7 - تيجي ؟ :

ودي بتكون لاقتراحات اسهل شوية من ينفع وهي كلمة جماعية مش فردية زي "ينفع" لان ينفع بتكون لحاجة انت عايزها انما تيجي يعني حاجة هنعملها كلنا مع بعض
وبتكون اقل حدة من كلمة "بقولك ايه " برضه لانها دايما بتيجي بعدها اقتراحات كويسة "تيجي نجيب ساندوتشات"
"تيجي نروح النادي"
وهكذا



8- ممكن اسألك سؤال؟ :

ده بقي بييجي بعده لاما كلام عن الحب وجو القناة السادسة زي انت مؤمن بالحل الاول والحوار ده لأما هيكلمك عن انت ليه متجوزتش لحد دلوقتي او اي حاجة تانية المهم انها اكيد حاجة شخصية سئيلة جدا وخاصة بس هو اكنه بيقولك "ممكن اتطفل عليك وازنقك واطلع مصارينك واسألك السؤال ده ؟ "



9- مش هتصدق :

ودي برضه دخلة في قمة الغباء واحد يبدأ بكلمة "مش هتصدق" طيب يعني انت هتكذب دلوقتي يعني ولا ايه ؟؟ وطالما نويت تفشر بتقولي ليه انك هتفشر ما تفاجأني احسن يا عم الحاج ..وطالما هي قصة لا تصدق انت صدقتها ازاي وليه عايزني اصدقها ما يمكن اللي قايلهالك اصلا بيكذب



10 -تخيل :

وده واحد بقي بيقولك تخيل الموقف اصلا اللي هو كان فيه وساعات بيكون موقف مقرف يعني اما تكون بتاكل وواحد يقولك "تخيل امبارح وانا في الحمام سمعت صوت كذا كذا" وليه اتخيلك وانت في الحمام وانا باكل دلوقتي؟ ومش لازم تقول تخيل يعني لانك بتخش الحمام عادي مش حاجة خيالية ساحرة يعني السيرة دي فممكن تحكي الموقف علطول لاما تستني بعد الاكل احسن بكتير وكلك نظر يعني..



وياعيني علي دخلات كلام الشعب المصري عجيبة غريبة فريدة فعلا