Wednesday, September 15, 2010

الحـرق بالجــاز في لــيالي الجــواز..الجــزء الثالـث







كلمني عن نفسك يا ابني :

السؤال الأقدم والأعرق في عالم الجواز واللي انا برفضه جملة وتفصيلا..تحس كده ان فيه لهجة استعلائية اكن الراجل ده مثلا عنده كنز سليمان عشان بنته او انه يعني صاحب مراجيح مولد النبي طيب ما تكلمني انت عن نفسك يا عمي ولا هي عافية يعني ؟
صعب قوي ان واحد بعد ما عاش العمر ده كله ومرينا بالتجارب دي تحس ان واحد لسه عايز يعرفك من الاول وكأنك هتبدأ لسه باعطاء انطباع عن نفسك المفروض ان كل صحابك عارفينه او اهلك لسه بعد كاااااام سنة عايز توصله لراجل جديد وعمره ما هياخد الانطباع اللي اصحابك خدوه فعلا من زمان ..
وانك تتحط تاني تحت المجهر ده شئ صعب قوي بعد العمر ده كله..خلاص يا عمي لو مش عارفني مش مشكلتي انما مش هتقيمني ولا هتديني كام من عشرة عشان عندك المحروسة النغنوشة ..اشبع بيها هههههههه

بتحب ايه؟ :

دايما البنت في مرحلة الخطوبة بتبقي عايزة تعرف الراجل بيحب ايه .وبيكره ايه ..لو هي بتاعة مطبخ كده ومحترفة هيكون السؤال عن الأكل..
او عن الكتب لو هي مثقفة وبنضارة بتقع من علي عنيها او هيكون السؤال عن الطبيعة والاغاني الرومانسية لو هي رومانسية حالمة
والسؤال ده بيعتمد عليه حاجات كتير قوي قدام يعني هيبان كذبك يعني هيبان لو كذبت في السؤال ده وهيبان علي كل جوانب شخصيتك اكيد


مثلا بنت المطبخ :

هي: بتحب ايه في الاكلات ؟
ممكن تدي تلات اجابات :
هو : المكرونة الفرن "تبقي شخصية طفسة"
هو: الكريم كراميل "يا سلام رومانسي وحد جميل"
هو : البط والحمام "تبقي شخصية بيئة..مش عارف ليه"


اما بنت الثقافة :

هي: بتحب تقرا ايه ؟
هو : فلاش وادهم صبري راجل المستحيل "تبقي عايز ضرب الصرم"
هو : جبران خليل جبران وامل دنقل "يا سلام مثقف ودحيح "
هو : لا انا بقرا كتب اجنبي بس ماليش في العربي "تبقي بترسم "

اما الرومانسية :

هي : بتحب تسمع مين ؟
هو : سعد الصغير ومصطفي كامل "انسان لا يطاق"
هو : محمد حماقي وتمورة "ده المفروض يلبس حلق"
هو: ماجدة الرومي وفيروز واصالة "يا عيني ع الفن "


وعشان كده السؤال ده بيترتب عليه حاجات كتيييييييير قوي قدام اما تقول مثلا انك بتحب اصالة وطول ما انت ماشي بتدندن لمصطفي كامل


افهمك غلط :

ساعات في مرحلة الخطوبة ممكن تفهم خطيبتك غلط ومتكونش متوقع منها كده يعني مثلا وممكن تبينها علي حقيقتها اللي هي بتداريها عنك وبتوريك الوش الكوول :

هو : ازيك يا حبيبتي
هي: ازيك وحشتني اوي..بقولك ايه استني هاكلمك من الارضي اصلي معنديش رصيد
هو :طيب استني احولك شوية رصيد
هي : بجد ؟ يا شقي
هو: شقي ايه مش فاهم ؟
هي : ايه؟.احم لا خلاص مافيش حاجة

طبعا دي اتكشفت

واحدة تانية بقي :

هو : ازيك وحشتيني
هي : وانت كمان
هو : نفسي المس انعم حتة فيكي
هي: يا قليل الادب هي هي هي
هو : قصدك ايه مش فاهم؟؟ انا بتكلم عن شعرك ..انتي فهمتي ايه؟؟

هههههههه وطبعا دي فضيحة تانية لما مكالمة ممكن تبين كل حاجة وتكشف المستور عن شخصية جديدة في البنت اللي بتكلمها



رز بالخلطة :

فعلا الجواز ملخبط زي الرز بالخلطة او الكشري المصري اللي هو تخاريف واي محتويات فوق بعض ولو عايز تقول انه ملوش لازمة اصلا يبقي تقدر تشبهه بالفول الحريتي لان هم الاتنين ملهومش لازمة في الحياة..وشاف معايا كام مصطلح مادي في الجواز وكام مصطلح رمانسي عشان بعد كده متقولش انها مش مجرد بيعة


المصطلحات المادية :

عفش-مهر-شبكة-بنشتري راجل-قايمة-فرح-ادفع من جنيه لمليون-بنتك تتاقل بالدهب-يبقي اتفقنا-علي بركة الله-انا عايزك بشنطة هدومك-هاعيشك ملكة-اكتبهالك باسمك-مؤخر صداق-شهر العسل فين؟-بوفيه-معازيم-قاعة-تشطيب-تجهيز-ع المحارة-عفش-امريكان فورنيتشر-دمياط-خاتم دهب-شنطة-جزمة-مصاريف البيت-

المصطلحات الرومانسية :

نعيش طول العمر مع بعض-تكوني نص التاني-اعيش معاك في عش العصفور

طبعا دي مصطلحات الجواز الرومانسية مش الحب..ودي بتفرق كتير انا بتكلم عن المصطلحات اللي تتقال قدام حماتك وحماك

يبقي طبعا المادي يكسب ويكتسح..وده واضح جدا



الخوف من المرأة :

انا متجوزتش قبل كده بس مش فاهم ليه في الافلام يوضحلك ان الراجل بيخاف من مراته وانها الحاكم في البيت وانه بيخض يتسلل علي طراطيف صوابعه لو أتأخر
ده فين الكلام ده؟؟ ايه اللي هيخوف الراجل؟؟ طيب بالعكس هي اللي تخاف اكتير بمراحل لو وصل الموضوع لمشاكل وطلاق حتي يتقال "يا بنتي متخربيش علي نفسك"
انما ايه اللي هيضر الراجل ؟؟ من بكرة الصبح يجيبله عروستين تلاتة في البيس يعني ده لو الموضوع وصل لطلاق وكده..
يمكن خايف من لسانها واسلحتها الفتاكة زي صحباتها او حماته و التسييح والفضايح وكده ؟..اهو ده فعلا السلاح القاتل للستات التسييح علي اي حاجة قدام صحباتها وخصوصا لو شاف النظرة من عيون صحباتها ليه ومصمصة الشفايف ههههههه علي حاجات كتير انتوا عارفينها
فين ايام كلمة "يا اميييييييييينة" ايوه يا سي السيد..هو صحيح كان مبالغ شوية بس ارحم من دلوقتي يعني سي السيد دلوقتي بيقول "تحت امرك يا بيبي"
كلمة بيبي خربت البيوت وخلت الستات هم الحاكم الامر في البيت


كتب عن الجواز:

عمرك نزلت سوق الكتب وعديت كام كتاب بيشكر في الجواز وكام كتاب بيشتم فيه؟؟
طبعا الاحصائية هتكون لصالح الكتب اللي بتشتم باكتسااااح انما كل الكتب اللي هتكون في صالح الجواز هتكون كتب دينية فقط طبعا لانه حاجة مهمة دينيا
ولكني انا بتكلم من ناحية اجتماعية مجردة طبعا مافيش حد هينزل يمدح في الجواز بكتاب ولو حصل مش هيتباع اكيد
كل المقالات والكتب اليومين دول بتشتم وتسب في الموضوع ده واولهم عمنا الكبير انيس منصور ما شاء الله مطلع عين ام الجواز واللي عايزين يتجوزوا
من كتر السخرية من الجواز بقت الناس بتحب الكتب الساخرة عموما شوف كام كتاب ساخر قدام كتاب ادبي كل سنة
لان الكتاب الساخر هيثبتنا علي موقفنا كعزاب انما الادبي ممكن حد ينخ ويتجوز ولا حاجة فمبيجيبش همه في المبيعات الا لو كانت قصص وروايات مش شعر وكتب رومانسية حالمة..


عالم المرأة :

لو دخلت عالم المرأة للأسف لازم تعود نفسك علي كل شئ كنت بتسخر منه زمان..ازاي؟
يعني كل برامج الموضة الخنيقة مضطر تقعد تسمعها اللي كنت زمان بتقول اول ما تبدأ "انا مش فاهم ام البرامج دي بيعملوها ليه؟ "
وكل برامج لف الايشاربات والمطبخ علي حساب الكورة والافلام الاجنبي
وتسمع نور ومهند وغيره من التركي علي حساب مسلسلات الست كوم الاجنبي
وتلاقي صفحات علي اللاب توب بتاعك متخزنة عن طرق وضع المونكير الجديدة
وحاجات بالنسبة لك "بول شيت" من العيار التقييييل
او كتب متخزنة من نوعية "100 وصفة لمعدة جوزك" او "كيف تحبين زوجك" او "طرق التربية السليمة"
وطبعا كتاب "طرق التربية السليمة" كل الامهات بتجيبه في الاول وتعيش في الوهم وفي الاخر بيبقي في حلين يا الشبشب يا اما الدادة ههههههههه
وده شوفته قدام عيني في كثيييييير من الامهات اللي جابوا الكتب دي واترمت في الزبالة لان الواقع مختلف قوي بجد
والاطفال بقوا مينفعش معاهم مراجع الا لو كانت عن "طرق اللسع ع القفا الحديثة "


حاجات مبحبهاش في عالم الجواز :

"كل حاجة"

وبالذات زيارة العروسين تاني يوم الصبح وهم بالروب وتحس انك لازم تسأل "انتوا كنتوا بتعملوا ايه ؟ " هههههههه
ومقابلة الاصحاب بزوجاتهم يعني ياريت عشان يبقي في حرية مطلقة تبقي الستات تقابل بعض وسيبوا الصحاب في حالهم بحريتهم لوحدهم
وعياط البنت يوم فرحها مع امها قال يعني راحة تستشهد وحياة امها مش راحة تتجوز بعدما كانت هتموت ع اليوم ده معرفش ليه
والفرحة العارمة للعريس في يوم الجواز وكانه هيعمل حاجة جديدة عمرها ما حصلت للبشرية وهي اكتر فعل مكرر في العالم اكتر من طرقعة الصوابع كمان


يعني باختصار
مبحبش الجواز وبقولها لو اتسأل..ان شا الله اموت عازب او اخش المعتقل واييييييييييه..
ياليالي الجواز يا حرقانا بالجاز.

1 comment:

Anonymous said...

هههههههههههههههههههههه مسخرررررررررررررة