حمادة التبـت من جبال التـبت

التباتة شئ مختلف تماما عن التغتيت والغلاسة لان التباتة كلمة مشتقة من جبال التبت
وده لان كان في راجل تبت جدا قاعد فوق الجبال دي كل ما حد يقوله انزل يقول الجو حر تحت بمنتهي التباتة وقاعد ومش بردان ولهذا سميت الجبال جبال التبت..

واتطورت كتير انواع التباتة مع دخول عصر المحمول والفيس بوك بعد ما كانت تباتة زيارات ومواقف بس بقي في التباتة الالكترونية الحديثة اكيد
يعني كان زمان اشهر نوع هو " تباتة الزيارات " وده ان الضيف ييجي فجأة ويدنه قاعد متبت في البيت مهما حاولت تتاوب قدامه او تعمل نفسك وراك حاجة او تكون عايز تخرج هو قاعد برضه ملوش دعوة بظروفك تماما لان التباتة عنده موقف وجدعنة مش مجرد صفة..
والتبت اللي يقولك انت فاضي بعد بكرة تقوله لأ يقولك قشطة هاجيلك بكرة بقي ..ده من اتبت الشخصيات اللي ممكن حد يقابلها ..
او تباتة الاولاد الصغار وامهم يعني تقعد تقولك الست انت مبتلاعبش حمادة ليه؟ مش تلاعب حمادة؟ ده بيحبك..يا ستي انا مش طايق حمادة ولا طايقك انتي يا ام حمادة اصلا ..الاعبه ايه هو انا في سنه متلاعبيه انتي مش ابنك استحمليه بقي بقرفه وريالته يا ستي..

بينما التباتة الالكترونية في منها النوع الشهير بتاع الموبايل اللي هي واحد يكلمك عشرة ميسد كول متردش يروح مكلمك من خط تاني ويقولك ايه يا عم مبتردش ليه ؟؟
المهم تروح انت مسمي الخط الجديد بتاعه عندك "تباتة سعيد" ..يبقي كده عندك نمرتين لسعيد واحد اسمه "سعيد" والتاني اسمه "تباتة سعيد"
متردش ع الاتنين يكلمك من خط واحد صاحبه ويقولك ايه ياعم انت مبتردش ليه ع النمرتين بتوعي تروح انت مسمي الخط التالت "تباتة سعيد واصراره علي التباتة" يبقي عندك تلات نمر لسعيد ..لحد ما سعيد ده يجيلك البيت في الاخر ويقولك ايه يا عم انت مبتردش علي نمري ليه يا عم ؟ ودي ضربة تباتية حادة في مقتل بقي بدل التليفونات طب عليك مرة واحدة..

بينما في تباتة الفيس بوك المشهورة ان كل شوية واحد عايز يضيفك تعمل رفض يبعتلك طلب تاني تعمل رفض يبعتلك تالت ورابع ومافيش فايدة يروح مكلمك ويقولك "يا عم ضيفني بقي انت مش شايف الطلب ولا ايه ؟ " ..
اما عيل تبت صحيح يا اخي خلي عندك دم اه شفت الزفت الطللب بس مش عايز اضيفك ايه الراجل ده ؟

واحد كمان تبت ممكن يقولك "بقولك ايه انت في البيت؟" تقوله بكل شفافية اه ..يقولك "قشطة انا جايلك حالا" ..يعني حتي مبيسألش "ممكن اجيلك" او "انت فاضي دلوقتي؟ "
لا يقول علطول "انا جايلك حالا" كانه بيتعامل مع كائن السلطعون بدون ادني اداب للزيارة..!

في تباتة البنات احيانا في الطوابير زي مثلا ناس بتدفع النت وكلهم ولاد واحدة تبتة تدخل تقول "معلش يا جماعة انا عايزة ادفع الاول عشان امشي لو سمحتم " ايه يا حاجة احنا بقالنا تلات ساعات قاعدين ارحمينا بقي هو عشان انتي بنت بتاخدي ميزة في الطوابير كلها ؟ ليه ؟ ايه اللي يخلي البنات تاخد الميزة في كل الطوابير ؟ بيقولك عشان تروح بدري خليك شهم يا اخي ..
ممكن عندك حق بس الساعة الللي كنت بدفع فيها كانت متأخر جدا يعني اصلا مش فارقة اما تروح 12 من واحدة مجتش ع الساعة دي ما هي قاعدة برة ل 12 جت علي ساعة يعني ؟ ولا الساعة واحدة بقي هي ساعة الذئاب البشرية والزمبي وكده وشغل الافلام الهندي ؟
المهم كان في ناس اتبت منها وقالولها "لا مش هينفع احنا ورانا حاجات كتير بعد الدفع" هههههه واتدبست في الطابور اللي قاعد ..!

اما التباتة في المصالح الحكومية فده فرض اصلا المفروض يكتبوا عليها"منظمة التباتة الدولية"..

وتباتة الجيران اما واحد يخبط عليك الساعة واحدة بليل عشان ملابس حمادة الداخلية وقعت في البلكونة ..يا ستي ارحمي امي يعني هي ملابسه الداخلية مش هتستني للصبح الناس نايمة دلوقتي ولا الواد يعني ماشي لامؤاخذة من غير نصه التحتاني وبردان ولا ايه نظامك في ليلتك الكوبية دي ؟
وبعدين ماهو اكيد حمادة عنده ملابس داخلية تانية ولا ده اخر ما يملكه من قطعة تحتية؟؟ واللهي ساعتها بقي تصعبي عليا وهاقدم لحمادة في جمعية "اتبرع ولو بلباس" اهو ينفعه برضه ..ولا ايه يا حمادة ؟

وساعات تباتة المحلات زي السوبر ماركت كل ما اقوله حاجة يقولي لا مش عندي "ابعتلك كذا بداله؟" اقوله لا طب عندك كذا يقول "لا ابعتلك كذا بداله" يا عم ما تيجي انت تطلب احسن ولا ابعتلي شوية حاجات علي ذوقك انت وقرايبك واللي جايبينك وحطلي صورتك في الكيس مع الطلبات بالمرة ..ده ايه القرف بتاعك ده ؟

اما اسوأ نوع اما يكون الطفل البرئ تبت للأسف..اسوا تباتة تباتة الاطفال بالذات النوع اللي بيعلق اللي هو يقعد يقول عشر مرات "ممكن تفتحلي دي؟ ممكن تفتحلي دي؟ مممكن تفتحلي دي ؟"
لحد ما تبقي عايز تلبسه في اتخن حيطة بكف ايدك ..




يعني انواع التباتة كتير لكن التباتة الحكومية كل يوم علي صفحات الجرايد كلها