الموكب عدي عليا زي ما عدي ع الصعيدي اللي شرب كوباية شاي مع الريس ..عربيات وزحمة وهيصة وامم واقفة بتحي الريس وبتشاور ليه وفجأة :
انا : يا ريييييييييس (وطبعا كنت عامل حسابي انه ميردش عليا )
الريس (فجأة) : أيوووه يا سيدي في ايه بتزعق كده ليه م البلكونة ؟
انا (مذهول) : متتفضل يا ريس تاكل معايا فول وطعمية
الريس: طيب خليك انا طالعلك حالا
طبعا ده اي كلام بيتقال ريس ايه بس اللي واحد بيناديه يقوله يارررريس .هههههه
انا: اتفضل يا ريس ده احنا زارنا النبي
الريس: انت زارك الريس
انا: ايوه ده شرف طبعا بس انا بقول زارنا النبي علي اساس انه شرف كبير يعني
الريس: امال انا شرف ايه ؟
انا: ياريس ما علينا انا فخور بمجيتك دي واللهي علي راسي
الريس: قولي يا سيدي انت متضايق من حاجة ؟
انا: ازاي يعني يا ريس؟
الريس: لا يعني بتشتكي من حاجة في مصر ؟
انا: هههههههههههههه
الريس: انت بتضحك علي ايه ؟
انا: ياريس اصل السؤال ده كوميدي قوي بصراحة ياريس احنا في جمهورية الشكوي العظمي..بشتكي من حاجة؟؟ مفرد؟؟ ياريس زي ما في جونتانامو في مصرنامو
الريس: ياااه ده انت شايل المر ..ده انت علي كده مخطيتش صوتك ليا في الانتخابات الرئاسية بقي اللي فاتت
انا: لا ما هم خدوا صوتي البركة فيهم بقي
الريس: هم مين دول؟
انا: هو حضرتك الريس بجد ؟؟
الريس: متحترم نفسك ايوه طبعا انا بشحمه ولحمه مش عارفني؟
انا: كلنا عارفينك ياريس ده انت مغرقنا ب ...مش عارف اقول جمايلك ولا ايه ؟
الريس: ممكن تقول افضالك او كرماتك ..يا ساتر ايه ريحة الدخان دي ؟؟
انا: دي عربية ناموس ياريس بتبخ مبيدات كل يوم في الميعاد ده وبتموت الناموس وبتموت اللي عندهم امراض صدرية مع الناموس
الريس: ايه ده دي ريحة تموت كح كح كح انا بتخنق
انا: بعد الشر عليك ياريس ان شاله شعبك الكريم
الريس: ايه يا ابني ده البيت بيتهز ليه ؟زلزال ؟
انا: لا يا ريس ده القطر اما بيعدي بيهز البيت كله اصله فيه تصدعات بس احنا دفعنا رشوة المهندس وخلصنا الاجراءات
الريس: رشوة المهندس؟ في الحي ؟
انا: اه يا ريس اهو الحي ابقي من الميت ههههههه
الريس: انت مرحتش الشغل ليه ؟
انا: لا ماهو مافيش ياريس
الريس: ليه انت متخرج امتي ؟
انا: بقالي بتاع 12 سنة ومافيش امل بس الحمد لله مستورة يعني
الريس: ايه الريحة المقرفة دي يا ابني ؟
انا: دي ريحة المجاري يا ريس اصل الفلوس مكملتش عشان نرشي بتوع الصرف الصحي
الريس: اه..احم..طيب انت عندك انترنت ؟
انا: لا ياريس بس سمعت عنه من جيراننا وبيقولوا أسود من قرن الخروب وبطئ طحن
الريس: ياااااه لا انا لازم اخد اجرائاتي فورا
انا: ايه هتشغلني ؟؟ وهتظبط الحي؟ وهتلغي عربية الناموس اللي بتقتلنا دي ؟ هتشيل المجاري دي ؟
الريس: لا طبعا يا بأف هاكلم وزارة الاتصالات يشوفوا ايه موضوع النت البطئ ده
انا: اطلع برة يا ريس
الريس: نعمممممم ؟؟؟؟؟؟؟؟؟؟؟
انا: اطلع برة عشان معملش معاك الدنيئة في البيت
الريس: تعمل الدنيئة كمان؟؟ ده انت ضعت يا ابني ده انا بتليفون انسفك
انا: هتنسف ايه؟؟ النسف بيكون لحاجة ينفع تنسف اساسا ..انا شاب مصري منسوف زي الوف وانت قنبلتنا الكبيرة..اطلع برة ومش هتكمل طبق الفول ده
الريس: انا الحق عليا اني كنت هاصلحلكم الانترنت في المنطقة
انا: روح صلحه في قصرك وسيبنا في همنا ..في بلدك دي يا ريس "برة القصور..قصور" قصور في كل حاجة في التعليم وفي الصحة وفي كل شئ ..قصور وتقصير كمان
الريس: طيب ايه مشكلة بلدنا يعني ؟ انا عمر ما حد اشتكالي غير م الفقر
انا: مش مشكلة فقر يا ريس..مشكلة افتقار..الفقر بيكون لحاجة بتملكها وقليلة عندك..انما احنا لا نملك الحاجة دي اصلا
الريس: ايه الحاجة دي ؟
انا: الضمير
الريس: طبعا الكلام ده مش موجه ليا
انا: والله يا ريس الاحساس نعمة زي ما بيقولوا
الريس: انت بتهزأني؟؟؟ هي حصلتتتت؟؟؟؟ يا فهمييييييييي يا حسيييييييييييين يا عااااااااادل
انا: انا جاي معاك ومجهز الكلابشات بس كنت عايز افضفض في وشك شوية ..خدني واعمل فيا اللي انت عايزه بس المهم انا قولتلك اللي انا عايزه
الريس: شيلوه من قدامي
وبعد خمس سنين علي قهوة :
احمد: شفت بيقولك واحد كان بيتهجم علي بيت الوزير
سعيد: يا عم هو في اكتر م اللي اتهجم ع الريس في بيته وكان عايز يقتله من كام سنة والموكب معدي
احمد: اه ده بيقولك عزمه في بيته وفجأة خرج حزام ناسف وهدد الريس ..هو فين دلوقتي؟
سعيد: مش عارف انا عرفت انه مات في المصحة ..!
الحالة ايه في مصر ؟:
ماتت في المصحة !
Posts
No comments:
Post a Comment