قولوا للي أكل الخروف يـنام

طبعا كل حاجة اتحولت النهاردة عشان العيد ..عيد اللحمة بقي وكل سنة وانتوا طيببين ..ايه اللي اتغير في العيد عن السنين اللي فاتت في عصر ما قبل الانترنت ؟ حاجات كتير قوي اتغيرت بسبب الانترنت والموبايلات
يعني مكنتش تلاقي زمان الخروف بدل ما تدبحه تشيره لصاحبك ع الفيس بوك ياتري تتحسب دي اضحية؟ والله اسأل شيخ من بتوع الفضائيات والعجيب انه ممكن تلاقيه هيجاوب مع ان السؤال لا مؤاخذة بس هم بيجاوبوا علي اي حاجة !..
وهتجيلك رسايل الموبايل اياها بتاعة العيد بالذات لو شركة الموبايلات عملت عرض مجاني عشان تبعت الرسايل حتي التهاني بندورها علي عرض عشان نهني الناس ده احنا شعب يعني واعي قوي ..

وهتلاقي في العيد السنة دي ناس بتخبط ع البيوت تقولك تعالي انتخب فلان وصوتك معانا ان شاء الله من غير ما يقول ايه خطط الراجل ده ولا ليه ارشحه يعني وايه ميزته عن غيره لكن احنا في مصر بقي ام الدنيا وام العجايب تعالي انتخب وخلاص مالكش دعوة هو مين !
وغير شحاتين الاصوات دول في شحاتين الفلوس اللي بعتبرهم اشرف من التانيين لان دول بيشحتوا فلوس هم محتاجينها انما بتوع الانتخابات بيشحتوا اصوات هم محتاجينها عشان يسرقوا ويقلبوا وينهبوا بس!

وهتلاقي شخصيات الناس كلها في كلمة التهنئة بالعيد يعني الراجل القديم هيقول "كل سنة وانتوا بخير وصحة وسعادة" والراجل المودرن قوي هيقول "هابي عيد يا جماعة" او الكلمة الدارجة اللي كله بيقولها "هابي فيست" ههههه قال يعني كلمة عيد سعيد حرمت خلاص بقي في في عصر الفيس بوك "هابي فيست " و "هابي رمضان" وبقت المناسبات الدينية
تحسسك اننا في امريكا مش في مصر او اننا جالية عربية في بلدنا !..
وهتلاقي واحد بيقول "كل سنة وانت طيب" ودي الكلمة العامة او كلمة "عيد سعيد" ده للراجل المتزن الراسي الارستقراطي ..او كلمة "كل عام وانتوا بخير" في بعض القري المصرية وطبعا الخليج ليه الفاظه العجيبة زي مثلا "عساكم من عوادة" ..

وطبعا في خناقات الاطفال مع الاهالي اللي معاهم ع الفيس بوك لان العيدية بتتبعت ع الفيس بوك فئة 100 جنيه وخلافه انما هم عايزين كاش يا عم الحاج مش مجرد صورة ع الفيس بوك انك اديتهم 100 جنيه واللهي هو زمان اصلا كانت العيديات عشرة وعشرين جنيه انما جيل تمورة وسيتي ستارز هياخد كام دلوقتي؟؟ وكام بقي يقضيهم اصلا في الزمن
ده ؟

ويهجم الناس في بعض القري او المدن اللي جمبها قري علي الاحصنة ويركبوها في الشوارع ولكن في العصر ده بقي بياجروا موتوسيكلات شعبية رخيصة مضروبة ويجروا بيها كاننا في المصيف بروح امهم مش في مدينة عيانة عادية يعني ..والكارثة اني شوفت بعنيا "بيتش باجي" في الشارع ؟؟؟ طب تيجي ازاي دي ؟؟

وطبع الاهالي عايزة تروح القري لقرايبهم ولكن الابناء المودرن اكيد مش عايزين لانهم متعلقين جدا بجو المدينة والانترنت والشبكات وميت حاجة تخليهم ميطيقوش يروحوا قرية مصرية وده طبعا معروف ان التكنولوجيا عموما زي ما قصرت المسافات هي برضه بعدت الاجيال الجديدة عن قرايبهم خصوصا لو قرايبهم في قرية !

واكيد الاغاني القديمة زي اغنية صفاء ابو السعود او غيره لسه بتيجي بس الطفل الجديد دلوقتي بفكره الجديد اول ما يشوف حاجة زي دي هيقول كلمتين "اقلبي يا ماما" (واحد سخيف قوي هيقولي دول تلات كلمات يا عم اللطخ اقوله ياااباي هو لسه في كده؟ )

والاب ممكن يقنع الاطفال ان صفاء ابو السعود دي نجمة استعراضية لاطفال وياما عملت اوبريت الطفولة وغيره ولكن الطفل دلوقتي هيقول" نجمة استعراضية؟؟؟واضح يا بابا انك مشوفتش شاكيرا او مريام فارس" ..!

وجو الطبيعة الخلابة للاطفال معادش بياكل والطفل عايز "سيبر نت او صالة فيديو جيم"..انما الشمس والوجه الحسن والحوارات دي كانت ايام شريهان ياسيدنا..!

وكل واحد هيحط النهاردة استيتس "عيد سعيد" هياخدله ييجي ميت لايك ع الاستيتس دي ويمكن كمية لايكات عمره ماخدها في حياته..حتي لو كان بيكتب حوارات انما الكلمتين دول اضمنلك هيلمولك شوية لايكات جااامدة كيك..

تفتكروا العيد كان قبل النت احسن ولا بعد النت يعين ايام الفيلم الهندي ولمة العيلة عليه في السهرة ع القناة التانية؟ ولا دلوقتي وكل واحد علي الاكونت بتاعه ع الفيس وعمال يبعت خرفان وخلاص وحتي اللي ربنا كارمه وفاتح مزرعة يعني علي لعبة الفارم فيل هيحط كام خروف برضه بمناسبة العيد وكله هيبعت خرفان محدش عاد هيبعت بقر اليومين دول !



وكل سنة وانتوا طيبين جميعا وعيد سعيد وياريت محدش يشير خروف تاني ولا يبعت عيدية لانها كترت قوي اليومين دول هههههه عيد سعيد