عايزين نشرة حقيقية واخدة حبوب صراحة لمجلس الشعب ولا كلام هجايص من بتاع النشرات اللي بتتوزع وتطلع في التليفزيون وخلاص؟ انا هاقولكوا النشرة الحقيقية الغير معلنة لكن الصريحة للانتخابات:
عزيزي الناخب ..اختي الناخبة..ان انتخابات مجلس شعب وصوتكم فيها امانة من اجل مصر ومن اجلكم..
وهي حق اصيل من حقوق المواطن واحد واجباته..
من اجل انتخابات شريفة نظيفة ومن اجل مستقبل افضل لمصر ..نهديكم بعض النصائح لاتمام العملية علي اكمل وجه باذن الله :
أولا: لازم تختار المرشح اللي هيمنجهك ويزبط معاك الامور ويفيش الهوامش واللي ممكن يقبل رشوة عشان يعملك اي حاجة .اي حاجة.انما المقفل بقي اللي هيقولك حلال وحرام ابعد عنه خالص لانه لو مشي بمنطق الحلال والحرام في مصر يبقي مش هيعمل حاجة خالص لان مصر الحرام فيها اتعمله اغنية من كتير ما هو منتشر
ثانيا: حاول تروح الانتخابات بدري عشان تلحق الناس اللي بتوزع الفلوس وشوف اعلي اجرة للصوت كام واتكل علي الله
ثالثا: اللي هيوزع برنامج انتخابي عليك يبقي هو ده الكذاب اللي مبيوزعش في مصر برنامج واللي معندوش رؤية اصلا هو ده اللي ممكن يعمل حاجة لاننا جربنا كتير قوي موضوع الرؤية والبرنامج والوضع زي ما انتوا شايفين
رابعا: المرشح اللي في ايده سبحة هو ده اللي مش هيعمل حاجة خالص لان صدقوني مافيش متدين ماشي بسبحته في ايده طول اليوم الا "مختار باشا " وامثاله
خامسا: شوف مين الافيد لمنطقتك مش مهم البلد مين اللي هيرصفلك البلد بتاعتك ويظبطها انما من اجل مصر والكلام ده كله في الهجايص فالانتخابات من اجل المرشح بس
سادسا: اوعي تصدق انه عشان اسمه مجلس الشعب انه بيكون لاجل الشعب هو اسمه الحقيقي مجلس مليونيرات الشعب والصوت معروف تمنه والمرشح معروف بيدفع كام للحزب
سابعا: حاول تتمحك وتلزق لاحد المرشحين وتجمعله اصوات وبتاع عشان ينوبك م الحب جانت بعد الانتخابات
ثامنا : بالنسبة لكل الشعارات اللي في الانتخابات خليك انت مع شعار واحد وفكك م الباقي "الفساد هو الحل" وخليك ناصح
تاسعا : عشان تحمي نفسك من بعض موجات الديموقراطية العالية حاول تشيل مطوة في جيبك او مسدس لو امكن او ازازة ملتوف لزوم الديموقراطية اللي هتحصل يعني
عاشرا: "ابدأ بنفسك اولا" و "من اجلك انت" و "مصلحتك اولا" هش شعارات حكومية اصيلة وعشان كده شوف مصلحتك فين وظبط امورك في المرشح اللي هيظبطك ان شالله حتي يكون مش هيعمل حاجة لغيرك خالص
حادي عشر: ابدا شوف مين مرشحين الحزب الوطني واختار بينهم انما طبعا بالنسبة للاحزاب التانية ولا تفكر فيهم اصلا واعتبرهم ناس جاية تهرج هم والاخوان لان مافيش غير حزب واحد في مصر والباقي طبعا خدام الست
ثاني عشر : يمكن المرشح ميظهرش تاني خالص بعد ما ينجح ولا يخدم حتي اللي انتخبوه ولكن متلموش هو ده بس مبدأ "انكار الذات" بس هو مزودها شوية في المبدأ ده
ثالث عشر: بالنسبة ل "كوسة المرأة" اللي طالعة في البخت فمش فارقة مين فيهم ينجح اصلا اذا كان الرجالة خاربينها يعني جت ع الستات ..اختار المزة وخلاص واهي تدي شكل حلو للمجلس
ودي بعض النصائح لكم ايها الاخوة والاخوات ..ويارب يعدي الانتخابات علي خير وعلي فلوس كويسة وبطاطين للناس
Posts
No comments:
Post a Comment