شمس وقمر 7

حبك ليا كان شئ سهل
حبي ليكي كان شئ أسهل
قصة حبنا كانت السهل الممتنع

سبت قلبي فوق جبال الألب
بعد شهر سألته مش حاسس بوحدة؟
بصلي وهو متجمد وقاللي
انت حاسس بايه؟

الدنيا كلها ملكي
انما قلبي
ملك للدنيا


الظروف والزمن
أغنيتين
بكرههم
لكن بسمعهم وانا تحت الأرض

كل سنة وانت طيب
قالتلي مرة
ساعتها بجد
عرفت انا عايش ليه

كل يوم بسافر لجزيرة
عشان اتنفس
الدينوجين

انا عايش تحت وفوق الأرض
فوق الأرض بقابل ناس
وتحت الأرض بقابل مقابر قلوب

كل يوم في الأخبار
مصرع خمسين
مصرع ستين
وانا كل يوم اقولهم
زود واحد
زود واحد

مابين الحياة والموت
حب
ولا
ما بين الحب ونهايته
حياة وموت؟