ريشة ملاك

مش عايز أعرف من عيونك سكتي..
غيرت منك لون ملامحي
وصوت عذابي
ودنيتي
غيرت اسمي
ولون ربيعي
وصوت بكايا
وضحكتي
مثلت نفسي لقلب نفسي
لقيتني لسه جوه نفسي
لسه حلم السوسنة
ريشة ملاك
كتبت هلاك
تقدر تعيش بيه كام سنة
؟
زي خدك كذبتي
ماكياج وكريم أساس
وكلام مالهوش أساس
وقلوب دايقة الحجر
والشمس تخون صباحها
وملايكة تبيع جناحها
علشان تنزل بشر
بعد كام مليون ميعاد
زي غيري في المزاد
رغم إنك فكرتي
إخدعيني كمان وتاني
مش عشانك ده عشاني
عايز أخلق قوتي
عايز أصبح كل همي
وأشيل رحيلك ده في دمي
وأصرخ أنا تحت المطر
أناني أيوه هأعيش لمين
والدنيا لحن لناي حزين
سكة عذاب مش منتظر
حبيه بجد
مش قادرة بس تحبي نفسك
هو حاسك
هو جاي بحصان كبير
يمكن أمير يمكن سراب
شيلي علي عنيكي التراب
ده هو أنا
فكرتي مين؟
فيه كام أنا؟
لون أنوثتك مين خالقها غير كلامي وحبي ليكي
مين اللي راسم لون ملامحك الا حبي وعيشتي فيكي
مين هياخد كل حاجة وهو ماشي غيري انا؟
لو لسه سامعة
أنا مش هاسيب فيكي إلا دمعة
وحاجات كتيرة مزيفة
زي الغرام
لو لسه مكسورة وبتلومي الزمان ده مش حرام
تمثال غرامك كسرته
وعش قلبي انا دمرته
وكفاية كلام عليها
خاتمي هييجي في ايديها
وانتي خاتم وضاع
وسيبيني ذكري عندك
خليكي عند وعدك
وسيبيني للضياع
قلبي اللي مات جوة مني
معادش معني لأهاته
ايه معني عصفور يغني
والعش محروق رفاته؟
وقصيدة الحب اللي كان
أبياتها دمعت وحدها
بلغ سلامك للي خان
ما الكل مات من بعدها
قلبي اللي مخلوق حبيبك
بعتيه في مزاده لخاتم
مش نادم إني أسيبك
لكن علي الحب نادم