حكــومة المفــتش كــرومبو وتشــكيلها الجــديد

كتير عايزين حكومة مختلفة وتوصلنا لشط الامان لا انا هقولكم علي حتة تشكيل حكومي ميخرش المية بجد وهو ده اللي هيوصلنا صح وهيعمل معانا الواجب الصح :

الوزارات :


اولا : المالية :

ودي هنديها لمختار "مصطفي شعبان" من مسلسل العار..وده احسن واحد يمشي الامور المالية في بلدنا وحتي لو هيشفط شوية بس اهو هيشغل فلوس الشعب في جميع النشاطات ويجيب ارباح بالهبل سواء نشاطات ممنوعة او مش ممنوعة المهم الارباح ما هو مش هيفرق عن الموجودين دلوقتي في حاجة يعني بس هيمشي دايما بنظام "اذا كان كده مااااااشي" ويخلص صفقات واستثمارات بالمليارات بالكلمة دي وممكن يحلل كمان معظم الصفقات المالية ويمشي الامور مع نفسه ومش محتاج مفتي ولا ازهر ولا حاجة هو مفتي نفسه



ثانيا : الثقافة :

ودي ممكن يمسكها سعد الصغير او عمدة ومش هيعملوا حاجة اسوأ من اللوح اللي بنشوفها لوزراء الثقافة يعني بالعكس ده سعد ده ابن بلد واكتر واحد داري ببلده وياما غني للحمار وللعنب وعمل قصة الحي الشعبي يعني مش ده تراث برضه؟ دي الاحياء الشعبية اللي بيقعدوا يدرسوا في تفاصيلها سنين هو عملها فيلم لانه واد مجدع وابن بلد وعشان كده مناسب ليه قوي منصب وزارة الثقافة وكمان غني للبلح وغني للحنطور مع امينة يعني غني لكل ما هو مصري واصيل يبقي هو ده وزير ثقافتنا اللي هو ادري بثقافتنا



ثالثا : الداخلية:

واللهي ما في احسن من المفتش كرومبو..راجل واعي وبيحل كل الالغاز بتاعة البلد وعمره ما خسر قضية مسكها في ايده وبيحل الخيوط كلها ويمسك المجرم ومعاه مساعدين جامدين قوي وكفاية اساميهم ..وبعدين الشعب كله بيحبه وهيساعده للوصول للمجرم هو صحيح عملوه فانوس بس ايه يعني ما حسن شحاتة اتعمل فانوس برضه يعني دي مش اهانة ده دليل حب الشعب ليه وهو من اكثر الشخصيات تاثيرا في مصر في الفترة الاخيرة بس ممكن نغير بدلته الصفرا دي ونلبسه واحدة سودة عشان الهيبة برضه



رابعا : الاوقاف :


دي ممكن نمسكها لفاروق الفيشاوي..واحد هيقولي ازاي يعني؟ اقوله هو فاروق ياما جرب في الحياة وياما غلط وتاب ورجع غلط وتاب ورجع غلط فهو عارف التوبة الحقيقية وهيقدر ينصحنا نصايح تفيدنا في حياتنا زي مثلا
"لو اتجوزت عرفي ابقي اعلنها بدل ما تبقي فضيحتك بجلاجل" ..
او "لو جبت كوكايين اوعي حد م الاعلام يعرف وخصوصا الجرايد"
ودي نصايح هتفيدنا في دنيتنا جدا وكمان ممكن يدينا خطبة الجمعة اجازة يعني يعملها جمعة اه وجمعة لا واخر روشنة يعني وانا مش شايف حد انسب منه وخصوصا في انه ممكن يطلع اجيال ممكن تطلع فتاوي احسن بكتير من فتاوي الزلابية والميكي ماوس وفتاوي ارضاع الكبير والجو ده



خامسا : وزارة الري:

مش عارف دي ايه اصلا بس ممكن اي حد يمسكها امسكها انا يا عم قال يعني كل المشاكل الزراعية اللي احنا فيها دي وفي وزارة ري اصلا وبعدين الواحد ساعات ميبقاش عارف مين هو وزير الري الحالي اساسا او ايه لازمة الوزارة دي وهل ليها علاقة بالسباكين؟ طيب نمسكها لسباك محترف مش مهم



سادسا : وزارة البيئة :

دي نمسكها لعماد بعرور علي اساس انه "بيئة" زي ما الناس الهاي اوي بتطلق عليه..وهو هيكون اكثر الناس قدرة علي التعامل مع الفلاحين وحل مشاكل قش الرز بدل الوزراء اللي بيجوا والسحابة هي هي يمكن هم شايفين انها مشهد طبيعي مش موجود في اي دولة فسايبينه للمصريين او يصوروه السياح زي الاثار كده وطبعا هيطلع زاهي حواس يقولك "اصل السحابة السودا من ايام الفراعنة وهي شئ متحضر وقيم جدا" علي اساس انهم كانوا بيشربوا حشيش زمان
وكمان عوادم السيارات هيلاقيلها حل لانه هيعمم التوك توك وهيخلي تصريح العربيات هو اللي بصعوبة ولازم تطلع تصريح بيئة قبل ما تسوق عربيتك انما لو توك توك هيطلعلك التصريح في ثواني وخصوصا لو توك توك بالغاز الطبيعي عشان البيئة..




سابعا : الاعلام :

نظرا للتشليق اللي بقي بيحصل دلوقتي والردح اللي علي ودنه في كل المحطات والخناقات والشتايم ساعات فدي يمسكها "بوحة الصباح" وهو اللي هيعرف يدير المليطة الاعلامية دي وصبح صبح يا عم الحاج لانها عايزة واحد شلق بتاع بلاده عشان يعرف يتعامل مع كل الاعلاميين دول وخصوصا الاعلام الرياضي والردح اللي فيه كل يوم في البرامج الرياضية والردح اللي في الجرايد الصفرا ويطلع له تصريحات بقي تسكت الجميع علي صفحات الجرايد

في الصفحة الاولي : الوزير بوحة يرد علي الاعلاميين "يعني اللي عنده في خانة البطاقة دكر..يطلعلي وش..يعني اللي يتهور يتعور ..والضرب في الوش ما فيهوش معلش"

وهو ده الاسلوب المناسب في الرد اليومين دول بدل ما يقعدوا يشتموك وانت متردش عليهم لا رد بقوة وبغباء كمان..




ثامنا : الزراعة :

اه دي بقي عايزة جميل راتب في فيلم الكيف ...يعني تاجر مخدرات كبيييير ومتوتك في الصنعة دي لانه هيجيب حاجات مسرطنة وهيدخل قمح مغشوش وهيدخل مبيدات ممنوعة وهيعمل البدع فلابد من تاجر مخدرات كبير قوي ويكون خبرة كمان لان الوزارة دي ليها متطلبات اجرامية خاصة جدا غير اي وزارة تانية يعني ممكن وزارة التموين برضه نحتاجلها راجل حرامي بس انما الوزارة دي عايزة تاجر مخدرات


تاسعا : الدفاع :

مافيش احسن من كابتن "حسن شحاتة" ده بيخطط جامد جدا وممكن يمسك وزارة الدفاع ونعمله وزارة هجوم بالمرة اهي تنفع برضه ولا احنا يعني هندافع بس؟
الراجل ده عنده تكتك عالي وتخطيط وهيحافظ علينا باي طريقة لعب مع العدو ان شاء الله وممكن يستشير الكباتن الكبار برضه زي حسام حسن وحسام البدري..
ما هو كله لمصلحة البلد




وياريت يعجبكم التشكيل الحكومي الجديد ده ويقدر يحافظ ع البلد