الحـرق بالجــاز في لــيالي الجــواز..الجــزء الحـادي عـشر

بيقولك الخطوبة هي فترة لاكتشاف العيوب والتقرب والتعارف والتعرف علي كل خبايا الطرف الاخر والتألف بينهم وقراءة افكار بعضهم ويشوفوا هم مناسبين لبعض ولا لأ

طيب اقنعني ازاي وهي كلها اصطناع وتأليف وبتنقلب الست بعد الجواز من الرقة للركاكة احيانا والراجل من مرحلة الشهم الي مرحلة الكرش والشحم..ولو هي مرحلة مصارحة فعلا يبقي الحوار المفروض يدور كده :


عماد: ازيك يا حبيبتي
نورا: واحشني قوي يا عماد
عماد: انتي قولتيلي انتي النهاردة هتقوليلي حاجات لازم اعرفها
نورا: فعلا يا عماد انا بشخر وانا نايمة زي البقرة تمام
عماد: يا شيخة ولا يهمك امال لو شوفتيني في النوم بقي..حلوف نايم وبيتقلب
نورا: بس انا عندي اللحمية
عماد: بس كده؟ ده انا عندي الغضروف وكمان ريحتي تقرف احيانا لو هتستحمليني يعني
نورا: انا هاستحملك يا عماد بس انت ممكن تزعل من اللي هاقولهولك ده
عماد: هتقولي ايه
نورا: انا حيوانة طبخ يعني م الاخر ي ي ي
عماد: ايه ي ي ي دي؟
نورا: يدوب يعمل شاي يا عماد امال انت فهمت ايه؟
عماد: لا متخديش في بالك
نورا: يعني هتعدي العيب ده كمان؟
عماد: ماهو انا عندي قصاده عيب برضه جامد..انا تقريبا هاشوف كل الماتشات في كل الدوريات يا حياتي يعني مش عارف هلاقي وقت اقعد معاكي ولا لأ اصلا
نورا: طيب انا عايز اصارحك كمان اني مش محجبة ولا حاجة انا لبساه منظر
عماد: ولا يهمك وانا مش فنان تشكيلي ولا حاجة انا نقاش
نورا: وانا كلمت قبلك حوالي 14 في مرحلة الجامعة
عماد: ياااه بس ..ده انا ...ولا بلاش دي
نورا: وعايز اقولك ان ماما كانت متصملة يوم الخطوبة انما الطبيعي انها بتردح وبتسب سلسفين العيلة
عماد: وانا ماما من حارة ميمون القرد مش من مصر الجديدة ده احنا نقلنا هناك بس والشقة دي ايجار مش تمليك يا حياتي
نورا: انا عملت عمليتين قبل كده في مراخيري
عماد: انا عملت ستة في كليتي
نورا: انا مبذرة قوي
عماد: وانا جلدة بجد
نورا: يا سلام انت صريح قوي يا عماد
عماد: وانا بحبك قوي يا نورا لصراحتك دي



طبعا دي الحوارات اللي بتعرف الناس ببعض في مرحلة الخطوبة او المفروض تكون كده لو عايزين يدخلوا البيت علي نور انما طبعا اللي بيحصل مش كده خالص انما احوارات الوردية وانا هزلزل الزلازيل وشوية الحبتين بتوع الخاطبين اكيد ولهذا مرحلة الخطوبة طالت ولا قصرت مش هتشوف فيها اي عيب الا ما ندر يعني انما لسه مشوفتش طبيعة البنت في البيت لان كل اللقاءات في كازينوهات او كافيهات او بيوت العيلة انما شوفتها في اوضة النوم؟ شوفتها في المطبخ؟ شوفتها في لبسها البيتي الطبيعي؟ ابدا يبقي متعرفش عنها الا نسبة 40 في المية والباقي اهو بيبان في العبارات دي والجمل دي :

"انتي مقولتليش ليه يا هانم ان طبيخك زي ريحة رجل عم محمود البواب؟ "
"انت مقولتليش ليه انك بتستحمي كل مولد نبي بس؟ "
"انتي مقولتليش ليه انك عاملة تاتو علي اسم حمادة..انا اسماعيل يا هانم مين حمادة ده ؟ "
"انت مقولتليش ليه ان ضهرك فيه ست الاف حباية؟ "
"طيب ما انتي مقولتليش ان في قفاكي ضربة مطوة يا شلق "


ودي بتكون صدمات كبيرة بعد الجواز كلها متعلقة باماكن ما شوفتش فيها العروسة زي اوضة النوم او المطبخ او حتت تانية كتير او اماكن اظهار العيوب ..اظن ان كافيه او كازينو عمره ما هيوريك عيب الا بعض العيوب البسيطة..انما البيوت هي المفتاح الطبيعي لاسرار حقيقية..



نقل الدبلة:

اكبر دليل علي انك هتشوف الويل في الجواز هو نقل الدبلة من اليمين للشمال تحس بعدها ان دول كانوا اهل اليمين والمتجوزين هم اهل الشمال اللي حاتهم صعبة قوي
وكلمة دبلة اصلا تحس فيها بالدبلان كده او ان في حاجة دبلت في حياتك او هتتدبل يمكن هي وردة حريتك ولا حاجة انما الكلمة غير مبشرة بصراحة
وعشان التجديد ممكن العروسين يلبسوا الدبلة في اماكن تانية عشان يبقي جواز جديد ونوع من التغيير :


1- لبس الدبليتين في صابعين الرجل الصغيرين..(اهو شئ يمنع الحسد ويريح الصابع ومش هتحس بيها في الصابع ده بالذات لانه صغير قوي والدبلة مش هتضايقك او تقعد تخلعها اما تعوز تغسل ايدك او تاكل)

2- لبس الدبلتين في المناخير: (ودي تفيد اللي بيحبوا بعض قوي بطريقة جنونية فيعلنوا قدام كل الناس انهم اتخطبوا بالطريقة دي ..بس ممكن تؤدي لخنف ولا حاجة كانك حاططط علي مراخيرك مشبك وبتتكلم وهيبقي حوار زي نقار الخشب)

3- لبس الدبلتين في السرة : ( ودي طريقة مختلفة شوية بس مش هتبان للناس انما هم هيحسوا بيها ان في نوع قوي م الارتباط السرري الجامد )

4- لبس الدبليتين في العضل: (وده زي اللي بياخد حقنة في العضل والطريقة دي معمولة للزوج اللي اتجوز بالعافية وكل ما يييجي قعد توجعه الدبلة فهو بيلوم نفسه ع اللي عمله في حق نفسه بالطريقة دي )

5- عدم لبس الدبلتين اصلا: ( والله دي احسن طريقة فيهم واهو تريح برضه وف نفس الوقت تعيد تفكير في حساباتك من غير ما تحس ان في حاجة في صابعك بتأنبك علي قرار انك تفلسع يا معلم وتنجي نفسك م المهالك )


هاشيلك علي كفوف الراحة:


وده بيعتمد علي وزنها بقي..كف الراحة مبيقدرش يشيل حد بعد الحمل والولادة والست تبقي في وزن وحيد القرن ..والواد الصغير ييجي يشب عليك ومراتك بتاكل فوق السرير والحالة بقت زي الجبلاية بالظبط وفي نفس الوقت وانت بتقول "سيب يا ولا الفازة" "سيب يا ولا التليفزيون متلعبش فيه" يخبط الباب..وتلاقي واحد جاي بشوية فواتير كهربا علي مية ..
مية بمتين جنيه ليييييه؟؟ ده انا مبستحماش..يا عالم يا ظلمة...كهربا ب 300 جنيه ؟؟ اتفضلي يا هانم هالاقيها منين ولا منين
والحوارات الزوجية الفكسانة دي اللي من ايام التلاتينات هي هي مبتتغيرش سواء عصر الكابلات ولا عصر البتنجان نفس الكلام هتلاقيه بين المتجوزين لو بعد متين سنة


انا هتجوز نفسي :


في فيلم رومانسي كوميدي شهير اسمه
i me wed

عن واحدة عملت عزومة وفرح وقالت انا بتجوز نفسي وهي فكرة جامدة قوي ياريت الشباب يطبقها وياخد الفيلم ده مبدأ في حياته..
متستغربش قوي من الكلمة كل العزاب هم متجوزين نفسهم الا لو بتكره نفسك يبقي اقدر اقولك "روح اتجوز" ..!



عيد جوازي:

مين الغبي اللي قال ان في حاجة اسمها عيد جواز؟؟
هو يوم ما اتجوزت ده كان يوم عيد؟؟
ايه لسه معرفتش انه كان اغبي قرار خدته؟؟ لسه بتقول انه عيد وبتقول انه في دباديب؟؟
دبايديب ليه؟؟ ما المتجوزين اصلا هيبقوا دباديب كده كده في وزنهم متقلقش
يعني قول لمراتك ايه عايزة دبدوب؟؟ وهزلها كرشك شوية وقولها انا الدبدوب يا حياتي
العيد الحقيقي ممكن يبقي عيد طلاق انما عيد جواز وهدايا كمان؟؟
الهدية دي زي ضريبة المبيعات كده دي ضريبة متزوجات




شيلني:


في الخطوبة : انا عايز اشيلك يا حياتي والف واقول قدام العالم بحببببك

يوم الفرح : العروسة : شيلني يا ممدوح
العريس: اشيل اجمل وارق فراشة بين ايديا واحضنك العمر كله

بعد الجواز بسنتين: العروسة: شيلني
العريس : اشيلك ازاي بس انا مهدود م الشغل ومكسر

بعد الجواز بعشر سنين: العروسة : شيلني
العريس: اشيلك ايه بس بكرشك ده ؟ شايفاني رافع اثقال؟؟ده انا لو شيلتك اروح اقدم في الاولمبياد بقي



واحب اقدم اغنية ممكن تغنيها في الفرح قدام المتجوزين كلهم وتوجه كلامك ليهم باغنية وائل جسار :


اعذروني يوم زفافي
طلعت اهبل زيكواااا
مدرتش ابدا اني ممكن
ابقي واحد منكواااا
ااااااااااااه
لطخ وبغني
ما هو غصب عني
بس ليه ايه اللي جابني؟
انا جاي اشوفكوا بس وامشي
وكان في يوم بضحك عليكم كلكوا اااااااااااااااااه