Friday, October 1, 2010

ميكســات حـــكومية للشعب المصري في الحكم العصري..الجــزء الثــاني






هكملكم الخدمات الحكومية الغير محسوسة للشعب واللي الحكومة بتقدمها مجانا :



عواميد النور المضاءة صباحا :


الحكومة بتقدم الخدمة دي علي كل الطرق في كل المحافظات تقريبا مخالفين كل نظريات ابن الهيثم عن الضوء والابصار وكده يعني عشان احتمال ولو واحد في المية لو واحد مش شايف من نور الشمس مثلا
او لعشاق نور العواميد عموما مثلا للشباب الروش " جروب عشاق نور العواميد" ع الفيس بوك..ويقولوا بليل نفتحها ليه ما عندك فوانيس في عربيتك يا اخي نورها
انما الصبح هو عين العقل وده راي الحكومة ومحدش يناقش ولا يجادل يا اخي..وبليل كمان في ناس نايمة في العربيات وانتوا راجعين م السفر فما فيش داعي تزعجهم الحكومة بنور العواميد انما الصبح افضل لان الناس كلها صاحية ونشيطة
وكمان نور العمود الصبح خير وتفاؤل كده انما بليل ما فيش احسن م الضلمة علي صوت اغنية هادية كده في العربية فالحكومة عاملة خدمة العواميد المضاءة صباحا لكل مرهفي الحس في الشعب المصري يعني دي لمحة لطيفة منهم اكيد




خدمات الطب التفاعلي :


دي خدمة بتقدمهالك حكومة في المستشفيات الحكومية بس مش الخاصة الطب يبقي تفاعلي ومعايش للواقع ومحتك بيه ودي نظرية مصرية رائدة يعني المريض يشوف جنبه ع الارض قشر موز وسوداني ولب ويوسفندي وكده ودي خدمة للنباتيين انما اللي مش نباتيين ممكن يلاقوا قطط وكلاب جوة المستشفي وحصلت في مستشفيات مصرية بالفعل ان كلب عض واحد علي سريره والكلب ده كان جاي م الشارع وحدث ولا حرج عن القطط داخل المستشفيات الحكومية بالاضافة لان الطبيب يسيب المقص او الفوطة جوة المريض ودي خدمة فاجرة جدا برضه ومن الطب التفاعلي كمان ان المريض في المستشفي الحكومي ممكن يصحي الصبح علي نور مفزع ضارب في عينيه م الشباك المفتوح ولا ستاير ولا نيلة وشوفت ده بعيني..
وايضا انك تحس انك مش في غربة من الزيارات اللي حواليك في العنبر وحلل المحشي اللي بتتفتح للمرضي حواليك من قرايبهم وممكن صباع محشي يا اخينا وكده يعني نوع من المشاركة لطمئنة المريض واحساسه بالامان




التوقيت الصيفي والشتوي:

ودي خدمة كل سنة رايحة جاية رايحة جاية وناس تزعق في مجلس الشعب وكده ومافيش فايدة لازم تتقدم وتتأخر كل سنة وساعات كذا مرة كمان عشان الساعة البيولوجية بتاعتنا تبقي مختلفة عن العالم كله لاننا ام الدنيا فلازم نكون في اختلاف كامل عن الساعات التانية احنا ساعتنا ماركة "اديها ادي بشكل ودي" انما هم ساعتهم مظبوطة وتخنق..

واصلا عشان احنا ساعات بنضرب يوم بالخمستاشر ساعة في مصر فالساعة البيولوجية اصلا ميتة تقريبا او عايزة ساعاتي عالمي عشان يظبطها عندنا قيلولة ونوم قبل المغرب ونوم في الشغل اصلا ونوم بعد العشا ساعة كده وكل انواع النوم فمش هتتأثر اوي الساعة لدرجة ان في ناس بيفوت عليها يومين علي ما تعرف ان الساعة اتغيرت لو كانوا في اجازة مش في شغل او يتفاجأ تاني يوم في الشغل..وتقف تمسك ساعتك في ميدان عاو وتقول انا عندي ساعة ساعة تروح هااااااه وساعة تيجي يا سي لطفي..ساعة تروح هااااااااه وساعة تيجي..
وبرضه الساعة دي بتعلم المشي ع الصراط المستقيم والالتزام والادب وده الحكومة عايزة ترسخه فينا
والشباب المرفه قوي بيتضايق من الساعة وتقديمها عشان مواعيد الافلام بيتغير ع القنوات المشفرة





الجواز بتكلفة اقل :


ممكن الاعلانات الحكومية تخلي الشباب متفائل من ان الجواز مش محتاج تكلفة قوي فمتخليش الشباب يقلق علي مستقبله يعني ..زي اعلان السكر اللي بيجيب العريس او اعلان كوفرتينا اللي بيقدمه للعروسة فتوافق علي طول طيب ما الشروط سهلة اهي امال معقدينها ليه يا جماعة..
وفي كمان اعلان الكتروستار اللي ممكن تجوز من غير فرش بس تجيب تلاجة وتدخل علطول ان شا الله تعيشوا ع البلاط والعروسة هتوافق اكيد حسب الاعلان
يعني الاعلانات دي لزرع روح التفاؤل في سهولة الجواز وعدم تعقيد الامور وهي اعلانات مسيسة




ارساء المبادئ الاخلاقية :

زي مبدأ انكار الذات : وده بيعمله الحكومي وعضو مجلس الشعب عن طريق انه بينكر ذاته من اهل منطقته فمش بيروح ليهم اصلا ولا بيشوفوه الا يوم الانتخابات

في العجلة الندامة : فلازم نمشي تاتا تاتا ف خطوات التطور والاصلاح والديموقراطية خوفا من العجلة وخوفا من الندامة

خير الامور الوسط : وده بيكون ان الحكومة ملهاش اتجاه معين ولا يسار ولا يمين فبيختاروا الوسط مش عشان هم فاهمين ايه الوسط ده وانما عشان خير الامور الوسط

حب لاخيك ما تحب لنفسك : وده بيطبقه كل الوزراء اللي بياخدوا اراضي وبيدوا اخواتهم الوزرا زيهم بدون غيرة وحقد عشان يعزموا بعض بعد كده في فيللهم في مارينا ويعيشوا شوية

ولا تنس نصيبك من الدنيا: وده بيطبقوه جدا في كل الوزارات ومحدش منهم بينسي نصيبه ابدا من الدنيا وبياخدوا نص الدنيا في عبهم




هتنتخب ولو في عمارتك :

عايز تنتخب؟ عايز تدي صوتك؟
ممكن في كل حتة الا في الانتخابات المهمة لانها هتتظبط انما ممكن تنتخب في النادي او في رئاسة الحي او حتي في مجلس ادارة عمارتك يعني الحكومة مدياك حقك كامل في الانتخاب ماعادا الانتخابات التانية اللي انت عارفها لكن انت مالك المهم هتدي صوتك ولو مرة في حياتك يا اخي
وبعدين الانتخابات الكتير مضرة جدا بالصحة في عرف الحكومة يعني متتعبش نفسك وتنزل احنا هنجيبلك ابن دايرتك ..ابن الدايرة علي حل شعرها




العاب الفراخ :


ودي لعبة هايلة عملاها الحكومة للناس اللي بتعدي الطريق والعربيات نازلة صاروخ من ع الكباري بتبقي شبه لعبة ع الاتاري لفرخة بتعدي الطريق بسرعة والمفروض العربيات متموتهاش والا تبقي خسرت الجيم واللعبة بتزداد اثارة لو فكرت تعدي بعيلتك كلها في مختلف الاعمار السنية ولد صغير وولد كبير ومراتك بتبقي في قمة الاثارة والمتعة بس حاول متخسرش الجيم ..




الوطنية والانتماء السهل :

الانتماء للنادي بتاعك وروابط والتراس وكل الهيصة دي عشان تلاقي حاجة تنتمي ليها بدل ما بلدك رمياك او حكومتك هي اللي رمياك ولا ليك انتماء سياسي ولا عايز تنتمي سياسيا اصلا لانك شايف كل اللي قبلك قعدوا يهاتوا ومافيش فايدة من سنيييين طويلة فاسهل حاجة تقول انا عضو في الالتراس او عضو في جمعية خيرية وخلاص واهو عمل تطوعي بدل العمل التطوعي في الحزب اللي مش جايب همه




مجلة طبيبك الخاص :

ودي مجلة تحس ان الحكومة بتطلعها عشان الكبت الجنسي عند الشباب وهي المفروض مجلة طبية بس صراحة هي مجلة جنسية بحتة تلات ارباع العدد عن الجنس وشوية مواضيع قليلة قوي عن باقي المواضيع الطبية بس الحكومة بتحاول تساعد الشباب الغلبان بس خلاص بقي الشباب معدش بيجيبها دلوقتي فيه انترنت




ميكروباصات موتورها مصنوع من الات الري:

وده اختراع مصري عظيم هو ميكروباص موتوره معمول من موتورات الات ري او موتورات خردة بيبيعوها في الوكالة واهي تبقي حاجة تلم فيها الناس وتوصلهم وخلاص فكك من موضوع الراحة بقي وبتاع ولا ريحة الشكمان اللي بتهريك جوة الميكروباص بس المهم توصل ودي ساعدت الالوف من الشباب انهم يبقوا سواقين بدل ميقعدوا ع القهاوي وباسعار رخيصة جدا يقدر الشاب يبقي سواق ميكروباص واهي بتنافس التوك توك برضه





خدمات الاتصالات البطيئة :

زي المحمول اللي بيقطع في وسط المكالمة او الانترنت اللي بيموت اكلينيكيا في مصر وانت بتفتح صفحة او تحاول لا سمح الله تشوف فيديو ولا تنزل حاجة وده بيعلم الشباب عدم الاعتمادية الكاملة ع الانترنت وبيحميهم من ادمان الانترنت بتخطيط من الحكومة المبجلة لدرجة ان الواحد دلوقتي من كتر البطئ ممكن لو صحي علي صوت بتاعة شركة الانترنت تقوله الخدمة اتصلحت يقعد يغني زي تمورة :

"انا النهاردة صحيت علي صووووتها
الله علي ده صوت..
قالتلي نتك فوووق..
يا عم نتك فوق..
وهاقدر افتح اي صفحة ولا فيديو كمااااان..
قالتلي يرجع بس بشروطها..
يا ستي متفقين..
واللهي و موافقين..
بس اعرف افتح اي صفحة .. انا خرمااان.."

ولا واحد يكلمك من شركة النت يقولك ما النت حلو اهو انت بتشتكي من ايه انت ممكن تغنيله :

"النت حلو لاااااااا اشك..
مش عارف افتح الفيس بووك..
لو مصلحتوا اليومين دول عليك هاسك..
وانااااااااااا انا ميت خرونج..
اااااااااااه انا ميت خرونج..
اني اشتركت معاكم انا ميت خرونج "


وياسلام علي رجوع النت بعد غياب سنين..وبيرجع يقطع تاني بعدها ويمشي زي وحيد القرن المتطاهر..




تطبيق نظرية الفوضي الخلاقة :

الفوضي الخلاقة في كل مكان في مصر وهي خلاقة عشان بتأدي لحاجة في النهاية زي طابور العيش مثلا قمة الفوضي لكن بتجيب رغيفك ابو زلط في النهاية
وبتخرج منتصر وطوابير الفوضي الخلاقة في البنوك الحكومية والحكومة بتطبق النظرية دي صح الصح



زيادة النسل :

الحكومة سايبة الشعب يلعب ويبرطع ويزيد النسل براحته وتعمل كام اعلان اهبل كده علي استحياء عشان تنصح الناس يحددوا النسل لكن هم في مصر فعلا بيحددوا النسل انما بطريقتهم يعني بيحددوا هيجيبوا كام واحد من النسل مش بيقللوه..والحكومة فرحانة عشان تلاقي حجة تقول ما انتوا كتير ناكلكم منين وفعلا بعض الحكوميين كانوا بيقولوا الكلام ده احيانا في تصريحات احنا عددنا كبير جدا قال يعني الصين مش كتير ..





والعبي يا حكوووومة ورقصني يا جدع











No comments: