دليلك التمام في مواصفات شقة الأحلام في مصر المحروسة

لو انت في مصر ..وعايز تنقل من شقتك لشقة جديدة اكيد انت اتعلمت الدرس وعرفت ايه مواصفات الشقة الجديدة.مش حكاية واسعة وبحري وكلام من ده ..لأ..انا بكلمك عن المواصفات المصرية اللي تبعد عنها لو لقيتها في الشقة الجديدة وازاي تتأكد انك مش هتاخد نفس العلقة لو نقلت لشقة جديدة

دليلك السكني في مصر :


1-اول ما تدخل الشقة اقف جمب المنور وارمي ودنك كده عشان ما تسمعش اصوات من الفئة اللي انا بسمعها في المنطقة زي مثلا اقف اجيب حاجة من التلاجة اسمع صوت رزع باب وواحدة بتقول بصوت ضعيف "انا عايزة ابني..انا عايزة ابني" هههه والغريبة ان محدش بيعرف هو في ايه بعد كده او ايه اللي حصل في العمارة بالظبط وايه مشهد فيلم الارض ده لكن الظاهر خناقات زوجية عميقة شوية فيها سحل ابدان فوق في الادوار العليا وبتتلم


2- أتأكد ان احباب الله واعداء الانسان اللي هم الاطفال مش كتير في الدور اللي فوقك وياريت ميكونش عندهم اسكوتر في الشقة لانك كده هتتنفخ لانهم هيلعبوا طول اليوم بالاسكوتر وكانهم ماشيين فوقك ومش هتسلم منهم ابدا طول الوقت او ميكونوش من سن 10 الي 16 اللي هو سن الاطفال بيجروا ورا بعض طول النهار بدون اسباب واضحة ويشدوا في شعر بعد وانت طبعا السقف بيتهز فوقك طول ما هم بيجروا


3- أتاكد ان مافيش جيران من نوعية "هزي يا سوسو" واللي بيعلوا سماعات الكمبيوتر لحد الفجر وساعات بيرقصوا علي اغاني زي اغنية فيلم "دكان شحاتة " وانا مش عارف ازاي دي اغنية يترقص عليها الصراحة لكنهم مبيرحموش ..تلاقي كلمات بتقول "معادش فاضل غير شوية لحم في كتافي " والناس بترقص والاغنية قمة المأساة...فلازم تتاكد ان العمارة خالية من النوعية دي عشان هتندم قدام


4- اعرف نظام بواب العمارة ضروري لانه هيفيدك في الطلبات وهيديك اخبار المنطقة دايما لو ظبطته بقرشين كل فترة ولو انت بتحب تعرف اخبار المنطقة المحيطة والبوابين في العمارات انواع متعددة :

النوع الأول: "البانجو احلي من المانجو": وده مش بيحرس العمارة لكن تقريبا السكان هي اللي بترعاه وتسأل عليه كل يوم الصبح لو كان مات ولا حاجة من كتر التعمير والشد والرص

النوع التاني: "القرش سيدي" : وده مستعد يعمل اي حاجة بخمسة جنيه انشا الله حتي ...........

النوع التالت: "البواب الروش" : وده من نوعية البواب اللي كان في فيلم عمر وسلمي الجزء التاني

النوع الرابع : "العميل رقم 13" : وده دايما يهمس ويقولك اسرار الشقق التانية وفاهم انك كده هتزودله البقشيش

النوع الخامس: "الارستقراطي" وده بيكون مهتم قوي بمنظره وبيعزم اصحابه تحت وممكن ميردش عليك لو قولتله سلاموا عليكم وكانه معاه دكتوراة في البوابات الحديثة

النوع السادس: "عم حمزة الغلبان" : وده بيكون في حاله واول ما تشوفه تلاقي نفسك بتطلع خمسة جنيه تديهاله ومش بعيد تدمع وانت بتدهاله ومش بعيد تبوسه

النوع السابع: ما فيش بواب : وده اريح حل بس امن علي الشقة بشوية ترابيس حلوين بقي




5- متسمعش اي كلمة للراجل اللي بيفرجك الشقة لانه بيكذب عشان عايز يبيعها او بيكذب عشان عايز يطفشك منها المهم انه اكيد بيكذب شوف انت الشقة بحكمك انت ومتسمعش منه كلمة لانه مش بعيد يكون عامل زي الافلام الاجنبي كل ما يقولك حاجة يزق الجثة المقتولة في الشقة برجله وانت مش واخد بالك ويداريها او يكون مخبي لحم بني ادمين ورا الجدران ويكون سفاح اصلا


6- اتاكد من روايح المنطقة اكتر من عشر مرات لان ممكن يكون بييجي عربية رش كل فترة او ناس بتشرب بانجو تحت بلكونتك كل يوم الساعة 1 بليل وانت تتكيف معاهم زي فيلم اللي بالي بالك هم بيشدوا تحت وانت متشعبط فوق والريحة طلعالك ويقولك زي الفيلم "انا بطمن بس " ..


7 - اتاكد ان مافيش شحاتين في المنطقة كيتر هييجوا شقتك خصوصا لو عازب لانهم بيعرفوا والخبر بينتشر "يوجد هنا شاب عازب" وكل يوم شحات هيجيلك من كهف الشحاتين وهيقرفك ومرة يبعتولك طفل "عشان يشوفوا لو قلبك رحيم" وبعدين يبعتولك ست عجوزة "عشان يشوفوا لو انت هتتأثر بحالها" وبعدين يبعتولك "شحاتة مزة " عشان يشوفوا "لو انت واطي وخسيس" وبعدين يبعتولك راجل بعضلات "عشان يشوفوا لو انت جبان" وبعدين راجل عجوز قوي "عشان يشوفوا لو هتخاف من لعنته او دعاه عليك "..يعني الشحاتين عندهم الحنكة الكافية والدهاء انهم يلعبوك ع الشناكل



8- اتاكد ان في سوبر ماركت محترم حواليك في المنطقة مش من نوعية السوبر "ماركو" ونوعية ياعمو عايز بربع لبان لان ده هتقوله عايز عشرة بريل لو سمحت هيبعتلك عشرة بريل مش عاشن تشربه ولكن عشان تنضف بيه الحوض قال يعني في انسان هيحتاج عشرة بريل في يوم ..هيغسل مواعين مصر كلها


9- حاول تتاكد ان الاسانسير مافيهوش "دعاء الركوب" اللي بيتقال كل ما واحد يركب بصوت عالي لانك لو قاعد في الصالة هتفضل تسمعه طول اليوم لحد متحلم وانت نايم انك بتقوله ولا ساعات كمان بيحطوا "دعاء السفر" مش الركوب علي اساس اني راكب الة الزمن وطالع ..لاما تنقل بقي قعدتك جوة خالص مش جمب باب الشقة لانك هتتنفح ادعية طول اليوم


10- متعرفش بعض الناس اللزقة بيتك الجديد فين لانهم هيستغلوا الحكاية وهيشبطوا كل فترة عندك وكانك فاتحها دريم بارك ومش بعيد تقف تقطع تذاكر خصوصا الناس اللي تقولك انا جاي ابات عندك ليلتين ..يا اخي حتي لو قاعد لوحدي اسالني الاول مش بنسيون السعادة هو


11- اهم حاجة اعرف ان المنطقة دي مش صحراء التعالب وانك مش هتسمع بليل وانت نايم اصوات كلاب غريبة و"اوووووااه" او القطط واصواتها المعفنة اما بتتخانق وتقعد تكلم بعض بليل واصوات الاشباح دي لانك مش هتعرف تنام في فيلم الرعب ده


12- اتاكد من كل حاجة في الشقة لانها ممكن تكون شقة "انكل زيزو حبيبي" اللي كل متمسك حاجة فيها تتخلع في ايدك وكانك شارب الشوربة السحرية وعضلاتك ضربت فجأة ..والشقة اصلا مخلعة ومهكعة وصاحب العمارة يقولك دي متيييييييييينة..


13- اتاكد من شبابيك البيت ان مافيهاش اخرام او فتحات كده ولا كده عشان لو قلعت في الشقة محدش يشوف حاجات انت نفسمك مش عايز تشوفها اساسا


14- ياريت ميكونش جمبك مدرسة وتصحي كل يوم علي اصوات الزفت اللي اسمه الطابور والجرس يضرب في ودانك وناس تقول "تحي جمهورية مصر العربية" يخلوك تكره البلد ومصر العربية ع الصبح


15- اتاكد ان مالكش جار عايزك تلاعبه دومينو او متطفل وعايز يعرف كل حاجة عنك وخصوصا لو كنت عازب وجديد في المنطقة وهو عجوز وعايز حد يشاركه اللحظة بس متطفل جداااا


16- اتأكد من عدم وجود واحد غلس يلطش كل يوم مكان عربيتك رغم انه عارف انك بتركن فيه كل يوم


17- لو انت عازب حاول تتاكد انك الوحيد في العمارة اللي كده.. لحسن لو صاحبت جارك العازب التاني هيقولوا عليك زي حاتم رشيد وعبد ربه


18- حاول تعرف مبدئيا اذا كان ليك اي جار حشري لان ده بيكون أسوأ من تمثيل سيمون في فيلم ايس كريم في جليم..




وياريت اي حد بينقل او بيجيب شقة جديدة يراعي المواصفات والشروط دي عشان ميندمش علي اختياره .