إزاي تبقي شـرير كيــك ؟؟

في ناس شريرة وفي ناس طيبة وفي ناس عايزة تبقي شريرة ومش عارفة ..وفي ناس عايزة تبقي طيبة ومش عارفة برضه..بس انا هاقولك ازاي تبقي شرير ده علي اساس ان انا ابو الغضب مثلا..
من واقع افلامنا المصرية وشارعنا المصري هاقولك ازاي تبان شرير حتي ولو بتمثل الشر ده ومش حقيقي :


1- عشان تتدرب علي الشر امسك سماعة التليفون واعمل زي احمد السقا واي حد يرد عليك قوله "انا معايا ورق يعيشك طول عمرك في السجن" واقفل السكة وانت ولا معاك ورق ولا نيلة اخرك معاك مجلة ميكي جيب جمبك

2- من واقع فيلم تيتو برضه ممكن تاخد جملة خالد صالح لما كان في ملعب الاسكواش وتيتو بيهدده ..ولو حد قالك وقعت المخدة دي ليه ع الارض قوله "وانا لو عايز أذيك هاوقع المخدة يا صرصار ده انا افعصك تحت رجلي "
بس ده رد فعل مبالغ فيه قوي علي اي حد وهتبقي شرير كيك

3- وبالنسبة لبعض جمل غسان مطر ممكن لو حد قالك رايح فين قوله "ثواني..رايح اشرب كاسين مع ابليس"..ده بقي يبين انك زعيم عصابة وحمش قوي

4- لو حد قالك في خدمة العملاء ممكن نتعرف بحضرتك ؟ قوله زي عزت ابو عوف "انا مش واحد يا ابني انا تلاتين واحد في بعض "

5- حاول تتدرب كتير قدام المراية علي ضحكتك الشريرة الجديدة وياريت تكون مختلفة عن ضحكات الف ليلة وليلة لانها مصطنعة قوي ومش شريرة دي هبلة

6- لو حد قالك ان شاء الله هنتعامل مع بعض قريب قوله زي خالد الصاوي "انا التعامل معايا زي التعامل مع القنبلة..لازم تعمل حساب كل خطوة "

7- ممكن برضه من جمل غسان مطر تقول لواحد بيرغي كتير "شكلك كده هتسحب كهربا كتير..شكلك معاكس مشاكس مخالف "

8- ومن جمل احمد السقا لو حد استعجلك وقالك تعالي بسرعة قولهم "قولهم الفرعون العاشق جاهز للاحتفال" ده علي اساس انك هتفجر قنبلة او هتعمل عملية كبيرة يعني شرير شرير يعني

9- حاول تتعود علي الاسامي اللي في الافلام عشان تتعود ع الشر دايما الاسامي الجامدة والشريرة في الافلام تلاقيها مثلا "عبده السيوفي" او "رفعت السلحدار" او اسامي كده تخوف لوحدها لناس واصلة قوي فادي نفسك برضه اسم حركي من دول عشان متخافش م الاسامي دول

10- من فيلم احمد الفيشاوي ممكن اما حد يسالك كان احساسك ايه اول مرة عملت كده ؟ قوله "عارف الفرارجي اول مرة بيبقي خايف وبعدين بيتعود علي الدبح" طبعا ده يوحي انك قتال قتلة ووش اجرام جداااا

11- ومن محمود عبد العزيز ممكن تقول "احنا لحمنا جملي منتبلعش وان اتبلعنا منتهضمش وانا اتهضمنا هيبقي طعمنا مر علقم " يعني وبقية الجملة كلها وهي جملة توحي انك بلطجي وبتاع حرب شوارع

12- لازم تشوف كتير فيلم "ابراهيم الابيض" و "حين ميسرة" و كوكتيل كده من الافلام اللي فيها شر وانتقام وحاجات من دي وتكون لابس نضارة سودا عشان تبقي شرير مودرن مش شرير فقير من حارة شعبية

13- ولو عندك عربية الافضل تبقي سودا برضه مع النضارة السودا وتلبس بدلة سودا طبعا ومن غير كرافتة عشان مافيش شرير بيلبس كرافتة

14- حاول تبحث في الاعلانات المبوبة في الاهرام علي اي وظيفة اجرام تحت قسم "وظائف بلطجة" ممكن تلاقي مكتوب مطلوب واحد ديلر لترويج الصنف يجيد لغة الشوارع ..او مطلوب عدد واحد قاتل مأجور وعلي من يكون فيه المواصفات التقدم لمقر الشركة او مطلوب واحد انتحاري والاحزمة جاهزة وجميع المقاسات والتشكيلات زورونا تجدوا ما يضركم

15- حاول تاخد رهاين م الشارع وتعمل زي بن لادن وتنزل الشريط ع اليوتيوب بس ده اظن مش هينفع لان الانترنت في مصر ابطأ من افغانستان بلاش الخطوة دي ..

16- اتجوز عرفي واخلع م البت بعد يومين بس دي حركة افلام قديمة قوي وفكست من زمان والبنات والرجالة بقوا حافظينها من كتر حالات الجواز العرفي في المسلسلات طول النهار

17- وانت نازل من عربيتك حاول تنزل باسلوب السلو موشن زي افلام الاكشن اما بيركزوا ع البطل بتاع الفيلم بالبطئ كده وياريت لو وانت نازل تشتغل بصوت عالي موسيقي دخلة الحانوتي في المصارعة

18- استعين بجملة خالدصالح وقول لاي واحد تقابله "اللي مالوش خير فيا مالوش خير في مصر ..الحكومة دي هيا انا "

19- حاول تعمل شعرك علي واحد لان الاشرار اللي بشعر طويل هم بودي جارد انما دايما اللي بيخطط حالق شعره زيرو او علي واحد

20- لازم تكون قاعد في عربيتك الواسعة ورا ومعاك بنتين علي رجلك اليمين والشمال والعربية فيها تلاجة بس ده شرط صعب قوي وعايز فلوس طائلة

21- حاول تستعين بطلعت زكريا من فيلم غبي منه فيه للتخطيط لسرقة مول تجاري لانه خبرة في الحكاية دي وشرير موت

22- ممكن تستعين بكلام قديم ليوسف وهبي وتقول "انها الفاجعة يا اولاد الشيطان انها خطيئتكم التي لا تغتفر مدي الحياة" وحاجات زي دي تديك ايحاء انك شرير من زمان

23- حاول تستعين بعملة معدنية في ايدك وتقلبها دايما وانت ماشي او ميدالية وتقعد تلفها باستمرار وتبص من تحت النضارة السودا بشر وغضب.

24- حاول تمشي بجملة شريرة باستمرار تكررها مثلا لو حد قالك اتفضل امضي الاستمارة قوله بشر "انا مبثقش في حد ولا حتي في نفسي..ولو دراعي وجعني اقطعه"



ياريت تكونوا استفدتوا من درس كيف تصبح شريرا وعايز اشوفكم اشرار جداااا المرة الجاية