Wednesday, October 27, 2010

لغــة "الأتشي " المصــرية..اختراع مصري





كلمة ليه يعني ؟ في مصر ليها اكثر من معني ومغزي ولكن بقت بتستخدم كتير في التشبيهات والمقارنات ..زي مثلا "ليه يعني يا اختي فاكرة نفسك مادونا" او زي كده ولكن احيانا بتدل علي اقصي طموح الشخص او بيئة الشخص او ساعات بتكون هزار


يعني مثلا واحدة قاعدة بتعمل شات بتقول لواحد "ليه يعني فاكر نفسك هيثم شاكر؟" وانا مش عارف الصراحة ماله هيثم شاكر يا انسة يعني عشان الولد ده اما يتغر يبقي هيثم شاكر؟؟ يبقي الواد ده شكله ايه بقي علي كده؟

ومرة سواق تاكسي بقوله شد شوية يا اسطي يقولي" ما انا بجري اهو هو انا راكب المجري" !!! ايه المجري ده ده بيتهيألي قطر عتيق من زمااااان لكن هو تشبيه دارج في الشارع المصري المجري او الاكسبريس

لكن اما واحد يقول لواحدة "ليه يعني فاكرة نفسك حنان شوقي؟"
يبقي هو لازم تقطعي معاه وفي نفس الوقت لازم تمسكي فيه ..تقطعي معاه لان ذوقه زبالة وتمسكي فيه لان ده اقصي طموحه فهيشوفك ملكة جمال ولكن في نفس الوقت ممكن يكون شايفك اقل من حنان شوقي فدي اهانة برضه بصراحة

ولو جيت تستعجل موظف عشان يخلصلك مصلحة يقولك "ليه يعني شايفني باربع ايدين؟" او "ليه يعني هي الدنيا هتطير؟"
ودايما موضوع الدنيا هتطير ده معروف انه ثقافة مصرية متأصلة عندنا دايما ان الدنيا مش هتطير مع انها في الحقيقة طارت خلاص واحنا لسه هنا

واحد صاحبي برضه شفنا مشهد واحد قاعد في اوضة مليانة كمبيوترات فبيقول "ليه يعني هو قاعد في رضوان العجيل" طبعا هو بيهزر انما لو واحد قالها بجد تبقي مصيبة يعني بدل ما يقول ليه يعني هو فاكر نفسه في جوجل او كده بيقول ليه يعني هو فاكر نفسه في رضوان العجيل
يعني ده اكبر مثل تكنولوجي احتك بيه مع ان اسمه لوحده كفاية..تحس انه عجيل في التكنولوجيا العالمية


ومرة بقول لواحد عن اجر لعيب كورة غالي جدا واجور المدربين وكده قالي حاجة غريبة قوي بقي "ليه يعني طلعت حرب؟"
وانا مش فاهم المثل ده لحد دلوقتي اولا هو عتيق طححححن ثانيا هو طلعت حرب كان ملياردير ولا حاجة؟ وحتي لو كان ملياردير ما فيه بعضه اجيال ورا اجيال
وبرضه واحد فاتح نغمة فواحدة بتقوله "ايه يا عم صوت العرب اللي في جيبك ده؟" طبعا طالما قالت صوت العرب تبقي دي اذاعتها المفضلة !
وكان اغرب تشبيه تشبيه اغنية اجنبية واحد فاتحها نغمة بصوت العرب


وساعات بتتقال الجملة "في زمانها" وهي شبه "ليه يعني" يعني يقولك الست دي "ولا زينات صدقي في زمانها" او "ولا تحية كاريوكا في زمانها"

او بتتقال "تكونشي" ..يعني زي "تكونشي عماد حمدي؟" ..طبعا دي امثلة للناس محبي الكلاسيكيات ولكن فعلا الكلام ده بيتقال ساعات من اللي اكبر منك في السن

وواحد مالوش في الكورة يقولك "تكونشي معتز اينو؟" يعني علي اساس ان ده امهر لاعب في العالم مقالش حتي ابو تريكة ولا ميسي ولا اي حد عدل يعني

وساعات واحد يقولك "مستعجل علي ايه تكونشي وراك الوزارة؟" مع ان الجملة دي غريبة جدا طيب ده الوزير اكتر انسان فاضي علي وجه الارض بالذات في مصر لانه مبيعملش حاجة.اي حاجة في اي حاجة اصلا يعني لو ورايا الوزارة ابقي فاضي وتمام التمام


و كلمة "تكونشي" هي احد الكلمات المصرية التي اشتقت من "اياكشي" زي "اياكشي تولع " مثلا "ملحوظة: اي كلام فاضي معقول "
وبعض الالفاظ التي اشتقت من الاتنين زي "تحبش؟" مثلا "تحبش الفاصوليا ع الرز؟" ودي بتتقال كده في بعض الاماكن في الريف

وممكن طفل يقول لحد م الجيل القديم "القناة دي احلي قناة اطفال بحبها" والراجل يقول "ليه يعني بتسمعي بابا شارو؟" مما يسير ذهول الطفل طبعا ..مين بابا شارو ده؟؟
الاطفال دلوقتي بتتفرج علي كارتون فيه بوس حنك يعني وكلام كبير "حنك اه لفظ معفن بس حبيت اقوله يعني لامؤاخذة"


واكتر جملة بتتقال "اكونشي غلطت في البخاري" ولحد دلوقتي مش عارف اشمعني البخاري؟؟؟ هو اشمعني ده بالذات الغلطة فيه قاتلة؟؟ طيب ما في ناس كتير اقوي منه انهم ميتغلطش فيهم..بس هو لفظ شائع قوي في مصر


واللغة دي شبه اللغات المريخية ولغات بلوتو كمان لغة "اتشي" انا مسميها لغة "اتشي" واللغة دي زي ما شوفنا كده اللي فيها "تكونشي/عملتش/تحبش/اياكشي/تجيش"

يعني زي "تكونشي عايز تنام/عملتش اللي قولتلك عليه/تحبش تاكل دلوقتي/اياكشي نخرج/تجيش نعيش"

من اغرب لهجات العالم لهجة اتشي دي ..ومنتشرة في كل قري ومدن مصر

وزي ما شوفتوا كلمة "ليه يعني" قد تدل علي كذا حاجة في اللي بيقولها ومثله في الجمال او في الموضة او التمثيل او التكنولوجيا واللي هو شايفه كبير قوي في المجال ده..

تكونشي بتقرا الموضوع ده ؟

3 comments:

Anonymous said...

الشين دي احتمال كبير تكون اختصار شيء
تحبش تاكل؟
"تحب تاكل شيء؟"
و كده يعني

و الأغرب من كده اللهجة الخليجية بتاعة
"كيف أخبارتش؟"و "إيش لونتش"
إحنا بتوع الشين
الزين راحت خلاص
و هاتاخد وقت على ما ترجع!

معـــــتز هــاني سعد said...

ايوه اللهجة الخليجية كلها كده برضه بالشين
دي بايظة اكتر من اللهجة اللي بتكلم عليها دي كمان ..والله ما قصرت سعادتك

بس ياريت تكتب اسمك تحت الرد والف شكر ليك

سكندري said...

أزيك يا معتز

أنت من أكثر الناس اللي بتضحكني
أسلوبك جميل بجد،

أنا في كلمات في اللغة الدراجة بتاعتنا عايزة الغيها أو أؤمر بعقوبة للي بيقولها
زي "كلشن كان" ، اللي أصلها كل شئ إن كان بمعني "عادي يعني مش فارقة"

و الاغلس بقي كلمة "بكش" بمعني كلام مش حقيقي أو fake هههههههه

بالمناسبة موضوع "أنا غلطت في البخاري" ده اعرف أنه لان الناس عارفة أن البخاري أصح كتاب في أحاديث النبي (صلي الله عليه و سلم) فعلشان كده الغلط فيه بيكون غلط في حديث صحيح 100 %

وكنت سمعت مرة واحد غلط في قراءة أية في القراءن فالناس قالت له انت غلط
قال لهم ايه يعني انا غلط في البخاري
هههههههه

سلام