Monday, August 4, 2008

الأمـــثال الـــشعبية

معظم أمثالنا الشعبية فشنك ..مضروبة بالنار واللي يقولك مثل ترد عليه بعكسه وفي نفس المعني مش عارف ازاي إخترعوا الحجة وبديلها في نفس الوقت يمكن تكون دي العبقرية اللي بيحكوا عنها..

مثلا المثل ده "الشاطرة تغزل برجل حمار" عكسه تماما "اطبخي يا جارية كلف يا سيدي"..
والمثل ده"القرش الأبيض ينفع في اليوم الإسود" عكسه تماما "اصرف ما في الجيب يأتيك ما في الغيب"
و"يا بخت من وفق راسين في الحلال" عكسه "يا داخل ما بين البصلة وقشرتها "
وبطريقة ما لفة شوية المثل ده "اللي ما يشوفش من الغربال يبقي اعمي" عكسه "اللي ايده في المية مش زي اللي ايده في النار "
واحد هيقولي ازاي يعني ..المثل الأول بيقولك المفروض تحس بالاخرين ..والتاني بيقولك كل واحد في وادي وعمرك م هتحس باللي انا حاسس بيه..

وكمان تاني "يا بخت من وفق راسين في الحلال" عكسه التام "امشي في جنازة ولا تمشيش في جوازة"
..أي كلام فعلا اللي كانوا يبقولوا عندنا أمثلة كانوا شاربين منقوع براطيش..

عندنا كمان امثلة الحرب بين الراجل والست زي مثلا
"يا مأمن للزمن والحريم يا أهبل يا غشيم"
الستات بيقولوا "يا مأمنة للرجال يا مأمنة للمية في الغربال"

وفي مثل عجيب عمري ما فهمت اي لفظ فيه "في الوش مرايا وفي القفا سلاية" يعني ايه ؟
what is the fuckin meaning?
ومثل "المنحوس منحوس ولو حطوا علي راسه فانوس" هو نفسه مثل"قليل البخت يلاقي العضمة في الكرشة" وهم الاتنين عكس "الحظ لما يهاتي يخلي الاعمي ساعاتي"
وياريت اللي عنده أمثلة غبية يضيفها برضه ..لأني اصلا موضوع أمثالنا الشعبية ده غريب جدا ومعقد..وبعضها مشكوك فيه ومين اللي قالوا اصلا غالبا بيكون مش معروف وبيكون واحد سبرسجي..




No comments: