يا إرهــــابي

وقتلتني ..ولسه وردة مفتحة..
ودبحتني..وعملت أرضك مدبحة..
تقتلني ليه ده أنا مسلمة..
هو إنت مين..ايه ربنا!!
هو انت علام الغيوب؟
ممكن أتوب..
من ذنب لسه مشوفتهوش..
معملتهوش..
خايف عليا قتلتني..
ليه تذلني..
وتقول شهيد..إنتم عبيد..
لا مش شهيد..
إرهابي ده مش رهبتك..
ده خوف عليك علي سكتك..
مش طالبة منك رحمتك..
مش شايفة فيك غير كسرتك..
إقتلني وأكفر بالوطن..
لكن هتدفع التمن..
لسه في جيل..
بين السواقي النعسانين..
هيبان حنين..
وحب أكبر للوطن..
صدق هأدفعك التمن..
علي كل باب..
عبد لكلاب..
عبد لأفكار مجرمة..
متصنمة ..مترحمة..
علي جيل أكيد ..
لكن أكيد بينهم شهيد..
بيحب دينا وعزته..
مش نكسته..
العز عين والعار ده عين..
بين العينين إسمك يا بلدي مفخرة..
للكلب منهم مقبرة..
الشمس طالعة هتحرقك..
هتنورلنا كل الدروب..
وهتحرقك..
هتخلي أمثالك تتوب وهتحرقك..
رهبنتوا ليه فينا المواجع ..
سكتكوا مش سكة شهيد..
سكتكوا دي سكة عبيد..
الحمل زور..
والزهرة علي قبري جميلة تعلمك..
إن البداية الله خلق بعدين رحم..
الرحمة طبع لربنا..
لينا كلنا..
وغنت علي قبرك خبر..
ده مات لأنه من الكلاب..
قتل الي ربي واللي أسلم واللي تاب..
والقبر نار..
وأنا بإختصار..
أنا بكرهك..
كداب شهادة..
مسلوب إرادة..
يا عبد للي عبدوك..واستنسخوا منك ألوف..
عملوك بطل ..
وإنت بهطل..
وبكل عرفان أو غباء..
تهت في سباق..
الكل خاسر الا واحد مننا..
هيموت شهيد من دمنا..
هيعيش بطل ويموت بطل..
ايه اللي عجبك يا قذر في شريط خبر..
فيه اللي تاه واللي إحتضر..
واللي أنفجر..
والأم سابت طفلها..قتلوها اه ..قتلوا ابنها..
وهي اه من فمها..
طلعت وشايلة السنبلة..
مش قنبلة..
لكن ببرد هتحرقك..
من بقها لباب السما..
يرجم ملامحك بالحجر..
ينزل مطر..
ويدمرك..
يا مخنث الفكر القديم..
سجادة الشئ الرجيم..
يا ربع روح تجري في جروحنا دموع وطن..
علي خدنا علي جسمنا..
والحل ايه؟
نقتل وطن؟
اللي مالوش حل اقتله..
ده حلكم ..ده علمكم..
علمكوا مختبر النجاسة..
علمتوا أجيال النخاسة..
ان الوطن بالصوت خدوه..
يا هتخسروه..
ده شيعي ده سني اقتلوه..ولاترحموه..
انتم حجر..انتم لا اشباه البشر..
انتم تراب ريحته النتانة..
يا عرابين يا دباحيت يا قتالين..
انتوا التشرد والخيانة..
وانا مسلمة..
وهأموت وأنا مطمنة..
يارب خدني لجنتك..
يارب خدني برحمتك..
هم خدوني ببطشهم وبشرهم..
ابني هاشوفه في جنتك..
والكلب منه لبطشتك..
سيبه في نار سيبه في زقوم..
ويموت يقوم ويموت يقوم..
ورينا ده فيه قدرتك..
او شوهوه أو اقتلوه..
يارب هادعيلك سنين..
ده مترحموش..جرح الوطن..
ارهابي ده جرح الوطن..
طب بعت إنسانك لمين..
وبعت قلبك للشيطان..
وسط الحيطان مرعوب قوي..
علي كل حيطة تلاقي دم..
دي عيشة هم..
خطوتها موت وضميرها صوت..
مخنوق جبان ومالوش أمان..
يتغرب الحب اللي فيك..
ويدمع النبل اللي فيك..
يعمل شهيد..
هتعيش كده؟هتكون سعيد؟
ضحكوا عليك..
قالوا هنا كتاب ربنا..
اقراه بجد..
قلب سطوره وعيش بنوره ورحمته..
ملاقتش صفحة عليها دم؟
ولا لاقي كلمة تقولك اقتل اي حد..
ولا لاقي ضلمة أو ضحية بحيط وسد..
يبقي اعرفكم ببعض..
ده ضميرك اللي سبته مات..
سلم عليه..
او بوس ايديه..
كتب التاريخ..
راح تحكي ايه غير الصريخ؟
غير المنايا والضريح؟
ارجوك كفاية دول مش ضحايا..
انت الضحية..
ايوه قتلك قتل مية..
بيصرخوا منك أوي..
صرخنا ياما عليك أوي..
بس اوعي صرخة الوطن..
تعمل كفن اسود كبير..
وتعيش في ناره وضلمته تفضل اسير..
إرهابي ايه عندك رهاب..
خايف تدوس علي خطوتك..
لكل خطوة تفكرك بجثث ودود..
مات الوجود..
مالهاش حدود ولا ليها حصر..
ده يبقي نصر؟
والله نصرك ده هزيمة..
وكل افكارك عقيمة..
يا مشوهين يا سفاحين يا حروف ضلام..
يا صقور علي جثة أمل..
ايه العمل..عايزينا ايه غير مقتولين؟
انا سكتي جنة وحور..
ليه سكتك من نار قصور..
مش قلتلك دي سكتك..
سكتنا دي سكة شهيد..
وانت هنا في سكة عبيد..