المجلس...كلاكيت تاني مرة

المجلس ولع بجاز ولا ولع بس؟

طيب حد كان نفسه في كده وليه؟

طيب اسمع القصة دي ..تخيل لو كل الأعضاء جوة والمجلس بيولع وبحضور الوزراء ايه كان هيحصل؟..

في مساء يوم عادي جدا وقرص الشمس كان بيميل للغروب وجلسة مجلس الشوري كانت تميل للإنعقاد ..

داخل القاعة:

الرئيس:هدوء يا جماعة لو سمحتم في القاعة..مينفعش كده وبعدين فين دول اللي معترضين علي القانون الجديد ..طيب ناخد تصويت كده..

أهو..إجمااااااع ..أمال ايه بقي معارضة ووجع دماغ ..

معارض:طاجن الكوسة إستووووووووي..

الرئيس:طيب لو راجل إظهر نفسك ..وهأجيبك من دقن أمك..

أحمد عز:بعد إذن سيادتك يا افندم أنا هأخرج بقي اصلي سايب الأولاد في بورتو مارينا ولازم أسافرلهم دلوقتي..

الرئيس:ايوه يا سيدي البحر بقي وكده عموما هنحتاجك عشان نطبخ القانون الجاي..

أحمد عز:عيب يا باشا ..تلميذك..

وفجأة يصرخ أحمد عز:إفتحولي الباب ده..

ويسمع صوت مجموعة بالخارج تقول في سخرية:"الجاموسة والدة"..

ويصفق باقي الأعضاء"افتحولي الباب ده ..الجاموسة والدة"

الرئيس:لو سمحتم هدوء..ايه يا احمد؟

أحمد عز:مش عارف حد قافل الباب وبيهرج أنا هأربيه..

وفجأة يدخل القاعة دخان غريب لا نعرف مصدره وأصوات طقطقة خشب..

وتسود حالة الهرج والمرج داخل القاعة "حررررررررريقة" الحقونااااااااا..

أحمد عز:حريقة ..يعني ايه؟..هأموت ..؟يا نهار اسود..طيب وحفلة هيفاء اللي قاطع تذاكرها..؟

الإخوان:تبت هيفاء بنت وهبي..

عضو معارض:متطفي يا أحمد يا عز ولا خايف تعمل مجهود لشعرك يتنكش..

أحمد عز:أان هأكلم رجالتي ييجوا يطفوا حالا..

وفجأة يخلع كل الأعضاء الجاكيت لتطفئة النيران مع ازدياد الحريق إلا أحمد عز

بدري فرغلي:متقلع وتطفي ولا انت هتقف باشا..

أحمد عز:انت عارف الجاكيت اللي انا لابسه ده بكام ..انت اتجننت؟

معارض:فينك يا مرتضي كان زمانك طلعت تجري بملفاتك القديمة وغسيلك الإسود..

معارض أخر:هأموت وسمعتي سودا لأ وايه بيعملوا لي سي دي بفضايحي مع بنات بترقص..طيب هي يعني جت ع الرقص..ما كانوا يظبطوني زي حسام ابو الفتوح ان شا الله اتحبس بعدها يا عم..

الريس:يا جماعة ركزوا في الحريق..

المجلس:موافقة

الرئيس:الله يخرب بيوتكم ده انتم متبرمجين معدتوش بتفكروا أساسا..

المعارض:البركة في سيادتك يا ريس

الرئيس:حتي المجلس اللي قريتولنا فيه اهو ولع يا اخويا ..

حزب وطني:والملفات المهمة يا أفندم؟

الرئيس:ولا الفلوس اللي تحت البلاطة

إخوانجي:ألا لعنكم الله يا أخي..

حزب وطني:هو كان في حاجة مهمة في الملفات؟

الرئيس:نعم يا اخويا ده كل تاريخ البلد جوة..

معارض:تاريخ البلد؟سلملي ع التاريخ؟أنا أسمعهولك يا عم خدنا امم افريقية 98 و2008 ادي تاريخنا من 98 قبل كده اسأل عضو تاني..

إخوانجي:تفتكروا ده إنتقام إلهي؟دي بؤرة من بؤر الفساد برضه

الرئيس:متحترم نفسك يا عم فساد ايه اللي بتتكلم عليه؟

الإخوانجي:عند أم اللالي..

أحمد عز:بيطفوا من برة وسايبينا نولع جوة..مطافي غبية..

عضو صعيدي لزميله الصعيدي:هو في ايه؟

العضو الصعيدي:لا مافيش ده بيقولك حريقة كمل انت الجيم وهات الهاي سكور

الصعيدي:طيب ما تصحي الجماعة اللي ورا ولا هم وافقوا وناموا؟

وزير الداخلية:مش هنلحق نفرح بقانون المرور الجديد

إخوانجي:قانون هشك بشك

وزير الخارجية:دي مؤامرة أكيد دي مؤامرة عشان يلهو الناس..

معارض:هاهاهاها..النبي حارسك نبيه ماشاء الله اي حاجة مؤامرة واخد دكتوراة في المؤامرات..وبعدين قانون المرور ايه طيب شيلوا المطبات الأول وبعدين اتكلموا ده الواحد بياخد كل كام مطب لما زوري بقي في مراخيري..وحطينلي صورة بقرة علي اللوحات الإرشادية؟يعني "هدي السرعة منطقة بقرية"؟ده منظر قدام العالم؟

وزير الخارجية:بس اما هنخرج من هنا ..هظبطك..

المعارض:يا عم كلنا هنتظبط متستعجلش..كلنا في الهم سوا..

أحمد عز يصاب بالجنون:مش هموت وأسيب حديدي..مش هأموت وأسيب حديدي

العضو الصعيدي:هو قريب الحديدي بتاع الأهلي ؟

العضو الصعيدي التاني:باين كده ده مش عايز يموت ويسيبه..بيحبه قوي..كمل الجيم كمل

المعارض:يعني في أول جلسة يحضر السادة الوزراء تولع القاعة دي ضربة معلم ومقصودة بقي..من أعمالكم يا حضرات..

وزير المالية:طيب انا عملت ايه ما انا ظبطت الشعب في القانون الجديد وعملتله اعلان جامد جدا..

المعارض:"الضرايب مصلحتك أولا"قصدك مصلحتك يا سيادة الوزير مش كده؟

وزير المالية:اخرس يا كلب

معارض:حد منكم كان بيصلي ولا هنموت أورديحي؟

معارض أخر:يا عم ده حتة زبيبة الصلاة ساعات بيركبوها..ده المستحيلات تلاتة الخل الوفي وطائر الرخ ووزير بيركعها

معارضين:لا حرام عليك ده حاجة بينه وبين ربنا

معارض:يا عم ده حتة فيفي عبده بتقول كده دي حاجة بيني وبين ربها ..قال يعني بتخلع البدلة وتخش تتوضي هاهاهاها

الصعيدي:ايه طائر الرخ ده؟

الصعيدي الأخر:مش عارف بس مش عندنا ده في الصعيد القاهرة بقي عليهم حاجات غريبة حتي الطيور عندهم مختلفة..

الرئيس:النار وصلت لتاريخ المجلس هنعمل ايه؟

المعارض:سيبه يولع ده هو ملف من ألف صفحة ممكن نلخصهم بكلمة "موافقة" وصلي ع النبي

وفي خارج القاعة صوت مجموعة شباب يقول وهو ينصرف "ما قولنالكم كادر كادر ..يا ولاد الكادر"..

وولعت القاعة وانهار المجلس الخشبي ..

طبعا لازم نحط الحتة دي"لو شابهت احداث القصة دي اي قصة في بلد تانية ماليش دعوة يا عم هو العمر بعزقة"