يا مــــريخي

في أول حوار بين الطالب الدحيح والطالبة الدحاحة وهم يعشقون العلم لحد الثمالة فلم يجد طريقة غير هذه للتعبير عن مشاعره:

الطالب: بسم الله الرحمن الرحيم أنا بحبك بس لسه بشوف معتطيات الحب ده عشان أوصل لبرهان..
الطالبة: برافو عليك أحسن..
الطالب: ثواني بعيد صياغة المعادلة دي ..اه وصلت لحل..يبقي بسم الله الرحمن الرحيم واحد انا بحبك..اتنين مقدرش اعيش من غيرك..تلاتة انتي نور عنيا..
الطالبة: رقم تلاتة مش فاهماها ممكن تعيدها وجزاك الله خير..
الطالب: انتي نور عنيا يعني فيها خيال شوية لأن منطقيا وعمليا مستحيل تبقي كتلة نور وعلي حجم عنيا كمان طبعا ده كلام فارغ يعني انتي مش نور ولا حاجة انتي مخلوقة من طين عادي يعني..
الطالبة: طين ..يا سلام علي الرومانسية ظبطتني..
الطالب: بصي هنخش المحاضرة وبعدين ممكن نقعد مع بعض أشرحلك مشاعري في نقط مركزة كده وممكن تلخصيها في ورقة..
الطالبة: طيب وهأجيب معايا كتاب سيكولوجية الحب البوهيمي عشان تشرحلي منه..
الطالب:اه يا ريت والله لأن ده مرجع مهم في حبنا..


وبعد المحاضرة....


الطالب: فهمتي المحاضرة؟
الطالبة:لا كنت سرحانة في حبك ليا..
الطالب: لا لازم نركز ونخلي حبنا في إطار متمنطق وثابت القيم..
الطالبة: ممكن نعلي سقف الحرية لمشاعرنا المتركزة الدوال..
الطالب:ماشي بس في حدود الأطر المسموح بيها تحت الأثير المخملي للإحساس الغير روتيني..
الطالبة: ممكن تطلبني من بابا..
الطالب:طبعا ..


وفي صالون العائلة:


الأب:اهلا وسهلا يا ابني خطوة عزيزة..
الطالب: كناية حلوة عن عزة الخطوة وفيها شموخ ونبل من سيادتك..
الأب"لنفسه: "لا حول الله ..كل ده من كلمة!"..ماشي اتفضل يا ابني
الطالب:يا عمي أنا جاي بيتك عشان معطيين مهمين الأول ان الكيميا اللي بيني وبين بنتك بقت واضحة المعالم وغير منسقة وغير منخرطة مع العالم الواقعي..وتاني سبب أن قلبي بقي علي المحك ..
وبيعيش زوبعة في فنجان دلوقتي ومرابط لعنق الزجاجة..
الأب: يا ابني زجاجة ايه وزوبعة ايه ..انت كده علطول ولا تعبان شوية..
الطالب: مزاح..مزاح ..ها ها ها ها
الأب:ايه يا ابني انا حاسس اني بكلم كمبيوتر هو انت كده ولا مدبلج؟ولا ايه حكايتك بالظبط..
الطالبة: يا بابا مسمحلكش تتعدي معاه رسميات الجلسات الودية داخل المجمعات الثابتة..
الأب:اه يا بنت المجنونة واللهي لايقة علي امه..
الطالب: لا يا عمي هي هتتجوزني انا مش امي ها ها ها ها
الأب:تصدق اني مشوفتش اسخف من كده في الأتون العالمي والزنابق المختلة..
الطالب:أنا شوفت يا عمي ولكن تحت مظلات انعدام الثوابت..
الأب:بص يا ابني الجوازة دي مش ممكن تتم..
الطالب: ليه يا عمي أنا شايف اني ذكر وهي انثي ومسموح بالتزاوج بين الجنسين بشكل طبيعي ..انا زهرة وهي زهرة ومن حقنا التلقيح الطبيعي..
الأب:التلقيح؟طيب إطلع برة يا ابني ودورلك علي زهرة تلقحها برة ..برررررررررة
الطالب:أعتبر نفسي مهان وكده يعني..
الأب:ده انت عليت عليا الضغط تحت تأثير الفسافس المنبثقة واللهي..بررة يا ابني..ايه اللي بقوله ده انت باينك معدي يا ابني بررة ..


وللأسف لم يتم الزواج بين الطالبين وبجد كده احسن عشان ابنهم لو كان جه كان هيبقي طفل أثيري مريخي..