مسلسل عيون عليا

كل سنة وإنتم طيبين بمناسبة أحسن شهر وأحلي أكل في رمضان..طبعا انا كنت عايز أخس في رمضان بس المشروع فشل بسبب التخطيط للأكل لوحده بيتخن..هناكل ايه بكرة هناكل ايه بعده ده الكلام ده لوحده سعرات..المهم شدوا حيلكم في المسلسلات بقي عايزين نخلص 40 مسلسل كده ع الماشي هاهاهاا طبعا الإعلام مفتري أوي ازاي بأي منطق 40 مسلسل طيب لو صحيت الصبح مرحتش الشغل وقعدت مخصوص برضه مش هينفع بأي حسبة مش هينفع..ده حتي كمان ساعة الفطار في 4 مسلسلات طيب ازاي يعني حتي وانا بفطر الحق اتفرج ايه الحصار ده..هو اللي مجنني حاجة طالما عندنا كمية القصص دي ليه مبناخدش أوسكار؟؟كمية مسلسلات عربية غير طبيعية نعمل قصة عشرة منهم فيلم واحد ونوصل للعالمية بدل ما تيسير فهمي تضرب وسميرة احمد تدينا القيم والمثل ويسرا اللي مبتغلطش والهام شاهين اللي ورانا ورانا..نعمل فيلم واحد عالمي من عدة مؤلفين وناخد جايزة مرة في حياتنا بقي لكن بجد المسلسلات السوري التاريخية ملهاش حل سيبك من درامتهم انما التاريخي تحفة يعني..

انا متوقع ان مسلسل عيون عليا السنة دي يبقي حديث العالم العربي كله ..هيبقي احلي قصة واحلي موسيقي تصويرية لأني سمعت عنه كتير من أخوة من سوريا وغيره وسمعت موسيقته ايه الابداع ده بجد مافيش كده ده مسلسل متسيبوش بجد وهتدنك تفتكره طول عمرك ..يحي الفخراني بقي غير جلده شوية بعد سطحية حمادة عزو السنة اللي فاتت..واللي رجع بقي بعد غياب أحمد عبد العزيز أحسن ممثل مسلسلات في العالم العربي مالوش مسلسل واحد وحش ..شخصية مستحيلة أداء مقنع تمثيل قدير براعة في اختيار الدور ..نجم النجوم ..

طيب الجرايد المعارضة هتبطل تشتم بقي في الحكومة في رمضان؟ولا الشتيمة في الحكومة تجوز في كل وقت ..طيب والجرايد الحكومية هتبطل تكذب علينا ولا الكذب منها حلال في كل وقت؟
وياتري الريس بيصلي التراويح؟..هاهاها تراويح انت بقي..ولا احمد نظيف بقي تخيل شكله كده وهو بيركع وبيسجد هاهاهاها حاجات مستحيلة طبعا الناس دي مخلوقة عشان حاجات تانية اخر تفكيرها العبادة طبعا..بس ممكن مبارك بيبقي امام ووراه سوزان وجمال وعلاء وكده يا سلام اسرة مسلمة جدا مؤمنة جدا..ويديهم حسني بقي خطبة بعد الصلاة وجمال يقوله ايه يا بابا انت هتشتغل نفسك ده نص الكلام اللي بتقوله ده مبتعملوش..هاهاهاهاها
بالنسبة اللي جعان قوي قبل الفطار ممكن يشوف تمثيلية تيسير فهمي وهيتسد نفسه فورا..أو تكلم الأخ ممدوح فرج تسأله أعمل ايه يا ابو البغال اخس ازاي واعمل ايه في رمضان..؟
هيقولك دقيقة ونرررررررررررجع لبعض تاني بطريقته الغريبة الأطوار..

انا ساعات بصلي التراويح وألاقي واحد جنبي نايم والتاني بياكل والجامع بيبقي عجيب في رمضان والله لو في يوم عادي اللي هياكل هياخد علي قفاه انما في رمضان اي حاجة بتحصل ..طيب ليه بقي بيسرقوا جزمي انا بالذات في كل صلاة
انا من هنا بوجه نداء للأخ الحرامي اللي سرق جزمتي رمضان اللي فات وبقوله انا جبت جزمة تانية اوعي تقربلها لأنها غالية واتقي الله بقي يا حرامي..لا مش لايقة اتقي الله يا حرامي دي..

ماهو انا مش هأدني أروح بقبقاب هدية من الجامع عشان كل شوية جزمة تتسرق دي مش طريقة بقي طيب هاربطها جنبي بقفل بقي المرة الجاية هو انا جاي اصلي ولا اراقب الجزمة يعني؟
وهنتفرج بقي علي البرامج الدينية والشغل العالي والأسئلة العبقرية بقي "هي الكنافة بالقشطة حرام يا مولانا؟"ولا الكنافة بالكستر ؟..كستر خيرك يا ابني..ايه الاسئلة الذكية دي يا سلام الله اكبر عليك..
بجد ياريت تخفوا شوية من الأسئلة دي وياريت الكنترول يبقي واعي ويشيل اي غباء بيتقال ويسيب الأسئلة المهمة بس..ولا كل شوية واحدة تتصل بخالد الجندي تقوله ادعيلنا يا شيخ متدعي لنفسك بقي يا اختي هو الشيخ هيدعي لمصركلها؟حتي الدعاء مكسلة تدعيه؟
المهم كل سنة وانتم طيبين وعقبال ميت رمضان كده وصيام مقبول ان شاء الله