محمد نور بيغني

"لا أعرف أن أختار أسوأ أغنية ..في كل ليلة قاع جديد"

بجد خلاص مش عارف أقول أيه اسوأ أغنية سمعتها مش بلحق أضحك علي أغنية امبارح تيجي بتاعة النهاردة اسوأ ميت مرة ..محمد حماقي بيغني ويقول انه "هيظبط" وحمادة هلال "بيتكتك وواقع في شبكتك" وتامر حسني "واخد حبه قفش"..ايييييييييييييه!

الرحمة شوية علي وداننا حرام عليكم..محطات الأغاني لازم تغير اسمها كلها ويبقي اسم موحد "أي كلام شانل" ..ويقولوا أي كلام بقي علي راحتهم..والأصوات المقرفة اللي بقت بتطلع عمت الناس طربيا لدرجة ان البعض بقي بيقول ان نانسي عجرم صوتها حلو"جنون"

نانسي عجرم الخنفة اللي مبتخرجش لفظ واحد صحيح من بقها بيقولوا عليها صوتها حلو ..هاهاهاها..وده ليه حالة الصمم اللي حاصلة من حدة الأصوات المقرفة الكتير عملت طبقة ألحان فاسدة فوق الودن بقت مصفي للكويس وبوابة للبذئ..

مريام فارس ..نانسي عجرم..ماريا..هيفاء..مايسة..قمر..نيكول سابا..كل دول عايزين الزبالة العمومية يتترمي فيها أصواتهم البشعة اللي بوظتلنا وداننا اه ومتنساش تاخد محمد نور الأخنف المريض وهتاخد معاه عمدة وسعد الصغير ورزان مغربي اوعي تنساها..من أقبح الأصوات اللي سمعتها..

كان زمان الناس بتخجل تطلع ع المسرح لحسن الجمهور يرميها بالطماطم وكده..طيب تخيل عبد الحليم حافظ بصوته الأسطوري ده كان في أول حفلة خايف جدا والجمهور هاجمه..يا خبر ابيض تخيل عبد الحليم حافظ مش واثق في صوته ده ..طيب سؤال ..ايه اللي خلي محمد نور يثق انه هينجح؟؟؟؟؟

بصوته الحقير ده؟؟

اكيد السبب هو الجمهور هو اللي تقبل نانسي وخدها في حضنه وتقبل مريام فارس وغيرها وده خلي محمد نور يقول "وأنا مين هيوقفني ؟ما أنا أكيد مش اوحش من كده"

وبعد مرحلة الإسفاف الطربية..دخلنا بقي في مراحل التقبل الجديدة..اننا تقبلنا جاد شويري وشلته..وبعد كده والجديد بقي ان مبدأ التقبل ده خلاص وصل لكل حاجة ومسورة الاسفاف ضربت في كل مجال..وبقي ممدوح فرج البغل بيقول هأخسسكم..وأمينة شلباية القبيحة بتقول هأجملكم..وده ليه..لان محمد نور قال هأسمعكم..

ولما نشوف روبي في قناة إقرأ بعد كام سنة أما تتوب .ما هي بقت موضة..وتنصحنا بالدين ونظام..أنا مش هأسكت وهأقول كفاية بقي..كفاااااااااااااااااية..

عبير صبري اتكلمت في الدين..وميرنا وحتي أحمد الفيشاوي يا نهار اسود..مين كمان ..أنا خفت انزل الجمعة اللي فاتت لأحسن ألاقي جاد شويري بيخطب في الجامع..

انا عايز أعمل زي أيمن نور واللهي..ابعت رسالة لرئيس أمريكا بس أستغيث بيه من محمد نور وأقوله خده عندك بس بجد مش عايز أسمع صوت الخنفساء ده..يعني كانوا بيقولوا صوت الحمار نهيق..وصوت الثور خوار..طيب وصوت محمد نور ايه؟؟ماهو لازم يتسمي..ممكن نسميه بغبغة..

المشكلة اني بدأت أتجنن خلاص ..مرة جبت قناة ميلودي وشوفت محمد نور ده قعدت اشتم الريموت.طيب ما أنا كده لسعت خلاص ..عايز علاج..حرام عليك يا محمد بطل غنا بقي يا ابني وارحمني انت والعسيلي اللي حنجرته مخرومة ده كمان ..وبرضه وللأسف المجتمعي بقي ناس بتحب العسيلي وأنا معاهم انه كلماته جديدة والحانه حلوة لكن صوته قذر ومغلف بالصدي الحنجري..حرام عليكم بقي عسيلي ايه اللي صوته حلو؟؟

يا ناس اعقلوا ..وتلاقي واحدة زي ماجدة الرومي غريبة ويقولك يا عم دي خنيقة ..عارف ليه؟عشان التعود علي مصل واحد خلي الجسم نحس واستباحت الأصوات دي هيكل الودان كله مسبتش حتي واحدة توحد الطرب الأصيل..أنا أسف كنت عنيف بس كل ده بعد ما شوفت أغنية محمد نور ..واتنرفزت جدا..

يا نور خلاص بطل مغني..

وليه بتوجع في دماغنا؟..

قالي يا عم أشوف نفسي..

إشمعني هيفاء أو نانسي؟

يعني انت ليه سمعت ماريا..

"العب" دي غنوة معدية..

وعسيلي قولتوا عليه مطرب..

دخل عليك وفرد عوده..

وبقي الكلام ملو خدوده..

واهو كله طاير في الهوجة..

طب ليه مش أمشي علي الموجة؟

"عندك حق"