حمدان وفيــليبس والأولمبــياد

"فيليبس عمال ياخد في ميداليات ميداليات واحنا أخرنا نجيبه لمبة أو تليفزيون.."
أم حمدان:مين فيليبس ده يا ولا ؟انت بتكلم نفسك ؟بتكلم اللمبة يا ولا؟
حمدان:يا أما ارحميني ..واحد اسمه فيليبس مش لمبة ..هو يعني بوحة الصباحي كان اخو حمدين صباحي؟
أم حمدان:يخيبك يا مضروب حلوة يا ولا..
حمدان:انا لازم أكثف محاولاتي في الترعة بتاعتنا يا أما..
أم حمدان:هتغسل المواعين يا ولا؟
حمدان:أنا سايبلك القطر كله وماشي يا اما ..بقولك فيليبس تقولي لي مواعين..


وخرج حمدان متوجها لترعة بلدهم مرتديا مايوه موف حصل عليه من صديقه المشارك السابق في الأولمبياد والذي عاد بخفي حنين طبعا..
وكانت نساء البلدة تغسل الأواني وما رأت الشورت الموف حتي سادت حالة من الهلع بين النساء وخرجت تقول "حمداااان بيتهجم علينا..حمدااان بيتهجم عليناا"
حمدان:اه يا ولاد المجانين يا بلد فلاحة بنت كلب..ده مجرد شورت يا ولاد الفرطوس..عايز أكون فيليبس..
زوج أحد النساء: ده أنا هاخليك توشيبا يا عنية..بوم..طخ..بوم

خرج حمدان في اليوم الأول حزينا بعد تعرضه لهذا الموقف وقال لنفسه"طيب دول فلاحين خافوا من اللون ده بس في مكان محترم أكيد هيعتبروه عادي زي مركز شباب أبو قرقاص مثلا بيقولوا فيه طشت كبير هناك عملوه حمام سباحة"
وأخذ حمدان الموبايل محدثا صديقه عضو النادي ليصبح واسطته ليعوم في الطشت"الو ازيك يا ولا يا سعيد عامل ايه؟"
سعيد:ازيك يا حمدان وازي أمك ؟
حمدان:كويس يا ولا ..بقولك ايه انا عايز اجي حداكم النادي عشان اعوم في الطشت واتدرب عايز أجيب كام ميدالية زي الواد فيليبس..
سعيد:لا والله يا حمدان بس المحل اللي حداكم الرياضي بيبيع ميداليات وكئوس كمان وعنده فانلات..
حمدان:لا انت فهمتني غلط أنا عايز أخدها بمجهودي...
سعيد:ايوه ما انت هتاخدها بمجهودك ما انت هتدفع حد قاللك حاجة..بس مين الواد فيليبس ده؟
حمدان:يا سعيد إفهمني أنا عايز أخدها في الأولمبياد يعني البس شورت وابلبط وافوز زي فيليبس بطل العالم..
سعيد:هاهاهاهاهاهاها..حلوة يا ولا هو انت بتعرف تعوم في ترعتكم أما هتاخد ميدالية ..ما أنت فوزت السنة اللي فاتت بسبحة من السعودية اما نطقت الكورة عشر مرات وقالوا انت أمهر واحد في البلد..يبقي ايه اللي دخلك في السباحة..وبعدين هو الواد فيليبس يقدر يفوز بسبحة زيك؟
حمدان:لا هو ميقدرش ياخد سبحتي بس أنا طمعان في ميداليته..
سعيد:ايوه بس انا معتش عضو في النادي ده الأشتراك السنوي غلي بقي بخمسة وعشرين جنيه ..
حمدان:يااااه ده ولع قوي خمسة وعشرين جنيه في السنة ده مبلغ يا واد يا سعيد..امال النادي الأهلي اللي بيحكوا عليه ده تلاقيه بكام؟
سعيد:لا ده معدي قوي تلاقيه فوق المتين جنيه ..
حمدان:يا قوة الله متين جنيه ؟بس اكيد بيقسطوهم ولا حاجة مين يقدر في البلد دي يدفع متين جنيه في السنة اشتراك نادي؟
سعيد:مش عارف يا اخويا بس انت هتعمل ايه ؟هتعوم فين؟
حمدان:أنا لازم أتصرف..



وذهب حمدان لأمه يسألها عن المال:
حمدان:أما انا عايز منك متين جنيه
أم حمدان:متين جنيه؟؟؟؟؟؟؟انت اتجننت يا ولا؟ليه تعمل بيهم ايه؟؟؟
حمدان:يا اما لازم أخد ميداليات من الواد فيليبس ده اللي وجعلنا دماغنا..
أم حمدان:سوي خلافاتك مع اصحابك بعيد عني يا اخويا
حمدان:يا اما اصحاب مين بس هو انا اعرفه؟
أم حمدان:اماال ناوي تسرقه؟
حمدان:ابوس ايدك يا اما اديني الفلوس عشان اشترك في النادي الأهلي عشان ابلبط..
أم حمدان:م الترعة اهي يا ابني بدون اشتراك شهري وعم فارس واقف عندها بيوزع حبوب لمكافحة الدودة الخبيثة..
حمدان:طيب يا اما النادي ده مافيهوش دود في ترعته ايدك بقي ع الفلوس..



وحصل حمدان علي البلغ وسافر الي القاهرة معتمدا علي كلام صديقه ان اشتراك النادي وصل الي مائتي جنيه..


حمدان:سلاموا عليكم
حارس النادي:عليكم السلام اي خدمة
حمدان:انا جاي أشترك في النادي لو سمحت..
حارس النادي:اهلا وسهلا تاني اوضة يمين..

حمدان:سلاموا عليكم
المسئول عن الإشتراك:وعليكم السلام يا سيدي اتفضل تشرب ايه
حمدان:أهل كرم والله لا متشكر اوي انا بس عايز اشترك واروح علطول..
المسئول:طيب العقد معايا اهو وياريت تجيبلي بطاقتك أصورها..
حمدان:انا عايز اقابل المسئول عن السباحة..
المسئول:قوي قوي ثواني واتفق معاه لو عايز تتدرب..
حمدان في ثقة:وأدي المبلغ يا سيدي..
المسئول: ده عشان الدمغات والتصاوير وكده ؟بس دول كتير..مية كفاية..
حمدان:دمغات؟؟؟؟وتصاوير؟؟؟؟ هو مش ده الإشتراك؟؟

بوم طخ بوم برررررررررررة..

لم يفلح حمدان في حلمه وذهب الي نادي شعبي في منطقة واطية واطية يعني..

حمدان:عايز اتدرب عندكم
المسئول:وايه اللي مورم وشك كده يا اخينا؟
حمدان:لا ده النادي الأهلي كان بيني وبينه خلاف كده..
المسئول:طيب تعرف تعوم ايه بقي..
حمدان:انا عايز اجيب الواد فيليبس واديله علي قفاه ..
المسئول:مين فيليبس ده؟
حمدان:مدرب سباحة ومتعرفش فيليبس؟
المسئول:لا واللهي محصليش الشرف..
حمدان:ده بطل العالم..
المسئول:هاهاهاهاها بطل العالم ده انت لو طلعت بطل المنطقة من عندنا يبقي امك دعيالك ده التدريب في بانيو..
حمدان:واي نوع سباحة؟
المسئول:كلابي يا عين امك .. انت جاي تألس علينا
بوم طخ بوم برررررررررررة..


وسار حمدان في الشوارع ..جايلك يا فيليبس..جايلللللللللك..